Dơn nău jă bah Trung ương Đảng Cộng sản Trung Quốc, Mpôl ntơh măt Đảng Cộng sản Việt Nam tă bah wa Phan Đình Trạc-Kruanh Ban Nội chính Trung ương, ƀư kruanh mpôl leo hăn khâl n’hanh pah kan ta Trung Quốc ntơm bah nar 11 tât nar 15/11/2024.

Ta Thủ đô Bắc Kinh, wa Phan Đình Trạc n’hanh mpôl hăn hŏ ôp srĭng nău wa Lý Hy, Bí thư Ủy ban Kiểm tra Kỷ luật Trung ương Đảng Cộng sản Trung Quốc; tâm nchră đah wa Trần Văn Thanh, Bí thư Ủy ban Chính pháp Trung ương Đảng Cộng sản Trung Quốc; pah kan đah kruanh Ủy ban Kiểm tra Kỷ luật Trung ương, Ủy ban Groi nđôi neh dak Trung Quốc. Ta ăp rơh mâp gưl têh, Kruanh rđău  kan bar ding lah rjăp nău khlay mha êng bah ăp trong hăn khâl bar ding bah kruanh rđău kan dŭt têh bah bar Đảng, bar dak, ma dŭt mhe aơ lah hăn khâl Trung Quốc dŭt geh nău dơi bah Tổng Bí thư Tô Lâm; rnê âk ăp njuat hun hao khlay, ngăn ngăn, lam lĕ rngôch bah tâm boh bar Đảng, bar dak ta ăp trong kan, lơn lah tâm nđŭr gưl têh dơi mât mbro, tâm boh wăng sa, tăch rgâl n’hanh ntuh kơl hun hao đăt ndal, tâm boh pâl nđaih n’hanh tâm nđŭr ƀon lan ƀư khuh n’gôr, ntrŭt ntrôl tâm boh Việt - Trung hun hao prêh mhe.