Măng nđaơ (12/11) ta Hà Nội, mbah rhơn nkah gĭt 94 năm nar way ơm Mặt trận Tổ quốc Việt Nam (18/11/1930-18/11/2024), Tổng Bí thư Tô Lâm lĕ tât râng Nar Tâm rnglăp lĕ rnoi nuĭh đah âk kônh wa nuĭh ƀon lan 2 ntŭk gŭ phường Quán Thánh, quận Ba Đình. Tổng Bí thư lah rjăp, soan dăng bah tâm rnglăp lĕ rnoi nuĭh lah ngoăy tâm âk nău khlay ngăn, têh dăng ngăn lam Đảng, lam ƀon lan, lam tahen he rlet rlău ăp jêr jŏt, ntŭl rlong, ƀư tĭng dơi nău kan rgâl mhe, hun hao neh dak lah nsum n’hanh ndâk njêng Thủ đô đăp mpăn, uĕh lăng, rgâl mhe lah êng.

Nkoch kloh neh dak he lĕ rgum tŏng ăp nău ŭch khlay n’hanh dôl dâk bah năp nău têh gay lăp rach năm mhe, rach năm rŭn hao săk nơm bah rnoi nuĭh, yơn lah gay dơi geh nău aơ, Tổng Bí thư an lah, năm tât an mât uănh jru nău mĭn êng nơm “sŏk Nuĭh ƀon lan lah khlay, nuĭh tơm bah ăp nău ntrŭnh, nău kơl”, “sŏk uĕh lăng hơm răm bah nuĭh ƀon lan lah nău rƀŏng an nsrôih”, rgum dôh rklaih jêr jŏt, “ntŭk wăk kol” an soih luh, rgŏ jă n’hanh mbơh ƀư geh săk rnglăy ăp ntil nău, mkra ăp nău geh, ntrôl têh dăng hun hao wăng sa-rêh jêng, n’hao nău rêh drăp ndơ, nuih n’hâm bah nuĭh ƀon lan, đăp mpăn ăp nuĭh ƀon lan dơi geh ăp ndơ bah rgâl mhe, hun hao, mô an geh nuĭh ntlơi bah kơi.