Nkuăl Kon Rẫy, n’gor Kon Tum geh bơi 75.ha ha bri hôn êng. Tâm ăp năm bah năp n’gâng kan ƀon lan nkuăl lĕ ƀư hăn uănh nđôi, uănh lah rnoh neh bri geh tơm dak si gay ndơ̆ an nchoeng rwêl mât rong, hun hao jêng tay joi nău rêh an nuĭh ƀon lan. Wa Nguyễn Văn Thủy, Groi Kruanh UBND nkuăl Kon Rẫy, an gĭt, ntoh lư kơt ta xă Đăk Tờ Re lĕ ƀư mât njrăng, joi tơm si ndăl bôk tâm rnoh neh 100ha bri. Geh tay prăk bah tơm dak si, nuĭh ƀon lan geh tay soan mât njrăng uĕh lơn rnoh neh bri dơi jao. Aơ lah du trong mkra bah nkuăl Kon Rẫy gay mât njrăng, hun hao bri nâp nâl.

Tă aơ 5 năm lĕ rngôch bri tâm nkual ma dơi tăm sâm Ngọc Linh công ty jao an nâp nâl lĕ rngôch an nuĭh ƀon lan, an nsum mpôl ƀư tơm ngăn ngên. Nuĭh ƀon lan, nsum mpôl dơi geh bah prăk mât uănh bri jêng lah bah nău rhŏ an ntŭk ntô bri. 2 tay nuĭh ƀon lan dơi tăm tơm dak si ta nâm bri lơn lah tơm sâm Ngọc Linh.

Rlău 2 năm bah năp đah mât uănh njrăng n’gang bri, nuĭh ƀon lan n’gor Kon Tum lĕ ƀư geh 694 tấn tơm dak si ta nâm bri, tâm nĕ dŭt âk lah tơm cu ly n’hanh srê huyết đẳng. Ndrel đah tơm dak si tâm bri, tât aƀaơ n’gor Kon Tum lĕ pơk hvi, hun hao geh rlău 10.800 ha tơm dak si, tâm nĕ geh rlău 2.400ha tơm sâm Ngọc Linh. Nău khlay lơn âk ntil tơm dak si bah n’gor Kon Tum dơi tăm n’hanh knŭng hun hao uĕh ta nâm bri hon êng, ntoh lư kơt sâm Ngọc Linh, sâm rse, ngũ vị tử... Yuh Y Hlang, ƀon Pu Tá, xă Măng Ri, nkuăl Tu Mơ Rông, an gĭt, knơm tăm sâm Ngọc Linh, sâm rse ta nâp bri nuĭh ƀon lan geh prăk hao rklaih luh ach o n’hanh ƀư ndrŏng bah bri.

Lah nsum ri ta xă Măng Ri, êng rnăk wâl kơt nuĭh ƀon lan aƀaơ dơi hun hao wăng sa bôk năp mpeh hồng đẳng sâm, du đêt ri geh sâm Ngọc Linh. Kônh wa dôl rgum mât njrăng bri gay mât bri gay kônh wa tăm sâm rse, sâm Ngọc Linh.

Ta Nghị quyết mrô 14, lơ 19/5/2011 mpeh ntuh kơl, hun hao n’hanh nkret njêng dak si ta n’gor tât năm 2025, rƀŏng tât năm 2030, N’gor ủy Kon Tum mĭn lah: “Ndơ̆ n’gor Kon Tum jêng nkual tơm dak si khlay neh dak n’hanh jêng ntŭk tăm tơm dak si têh bah lam dak tâm năm 2025. N’hao jâng nsan moh êng ndơ sâm Ngọc Linh Kon Tum ta ntŭk tăch tâm dak n’hanh dak bah dih”. Ăp nău kan, ăp ntŭk ntrôl nkoch trêng, mbơh rblang lam hvi mpeh nău ntrŭnh, nău kơl, hun hao tơm dak si bâh n’gor. Tâm nĕ, N’gâng kan tuch tăm mât rong n’hanh hun hao ƀon lan tâm rgop đah ăp nău kan geh tât nchrăp ndâk ƀư bôk nău kan, trong nchrăp ƀư tĭng săk rnglăy ăp rnoh an ƀư, nău kan dơi jao; tâm ôp tâm nchră an UBND n’gor jao rnoh an ƀư trong nchrăp mpeh tơm dak si tâm di đah nu nău ngăn bah tĭng ntŭk. Nkre, ntĭm rđău ăp ntŭk mpeh mbơh ƀư ăp trong mkra pơk hvi, hun hao nkual tăm; nsrôih uănh nđôi, gĭt nu nău n’hanh ngăch mkra ăp trong mkra jêr jŏt, mô hŏ dơi ƀư tâm trong kan ntuh kơl, hun hao n’hanh nkret njêng dak si ta n’gor.

Lah nkual khlay tăm tơm dak si bah n’gor, wa Võ Trung Mạnh, kruanh UBND nkuăl Tu Mơ Rông, an gĭt, dơi geh săk rnglăy na nê̆ nău nchoeng rwăng, mât tăm tơm dak si ta nâm bri lĕ ƀư nuĭh ƀon lan tâm nkuăl rgâl trong uănh đah bri:

Bah ntŭk kônh wa bah jŏ phah bri ƀư mir ri kônh wa lĕ hăn tăm bri. Năm aơ kônh wa sŏk êng prăk tăm 194 ha. Nĕ lah du nău rgâl wât bah phah bri jêng nuĭh tăm bri n’hanh mât njrăng n’gang bri. Trong way ƀư bah jŏ gay an kônh wa rklaih ach o lah mât uănh, njrăng n’gang, hun hao bri, tăm tơm dak si, mât rong ta nâm bri ndrel đah pâl nđaih.

Geh rnoh neh bri hon êng tâh ngăn nkual Tây Nguyên, đah rlău 550.000 ha, nău n’gor Kon Tum ntrôl dăng hun hao tơm dak si dôl nsĭt tay nău geh nsum an lĕ nuĭh ƀon lan n’gâng kan ta ntŭk, nkre hun hao wăng sa nkre mât njrăng bri. Năm mhe rlău rnoh khlay hao tay nău nkra njêng tơm dak si bah n’gor Kon Tum geh 1.650 rmen prăk, geh nklăp 24% dĭng lĕ rnoh khlay hao tay an nău kan tuch tăm./.