Ntoh măt ntơm bah nar 7/11 mhe aơ, trang thương mại điện tử Chonongsandaklak.vn tă bah Hội Nông dân n’gor mât dŏng, dơi njêng êng an ntil trong wăng sa mpôl n’hanh tâm rgop ƀư njêng, geh nău nkoch mbơh, nkơnh n’hơ ndơ geh ƀư, tâm rgop rêng rnoh khlay ndơ tuch tăm n’hanh tăch chrai ndơ tuch tă, 500 ndrơng ndơ bôk năp ta Chonongsandaklak.vn dơi rdâk njêng gay nuĭh ƀon lan nkoch mpeh ndơ geh ƀư ntơm bah rnôk srih tăm tât rnôk klêh play, nklâm tâl jêng geh ndơ tăch.

Dôl gŭ nkra uĕh di tay nkô̆ nău nchih gay n’glăp ta trang chonongsandaklak.vn, nô Y Pốt Niê, Giám đốc Công ty TNHH Êđê cà phê an gĭt, trang thương mại điện tử dja dơi ƀư uĕh măt uănh, dơh ntơ an nuĭh tăch n’hanh nuĭh rvăt yor geh ăp nău lư kloh rvah bah tĭng ntil ndơ.

“Lor bôk năp lah nsĭt tay nău dơh ntơ an nuĭh rvăt n’hanh tâl bar lah doanh nghiệp kơt mpôl hên mbra n’glăp âk ndơ tăch tâm nê dơh ngăch, an trong he mât dŏng n’hanh an he n’glăp ndơ tăch tâm nê dơh, lĕ mpeh nuĭh mô gĭt mpeh công nghệ thông tin ri khân păng mbra dŏng smartphone mô lah laptop mbra dơi ƀư đŏng, jêng săk gâp nơm dŭt nđơr n’hanh mpŏng lah chonongsandaklak.vn nar lơn ma hun hao lơn n’hanh dơi âk  nuĭh gĭt tât lơn, mô dơn ta Dak Lak ma lam dak Việt Nam, lĕ ma dak bah dih gĭt tât mpeh ntŭk tăch ndơ tuch tăm dja đŏng.”

Tĭng yuh Lê Thị Nga, nuĭh mât bôk kan Công ty cà phê Vương Thành Công, rlău ma dơh dŏng tâm nău rêh nuĭh rvăt n’hanh nuĭh tăch tâm rŭn rnoh khlay, mô kâp geh nuĭh ƀư ndranh nklang n’gul đŏng, ntŭk tăch ndơ tuch tăm Dak Lak online hôm lah ntŭk ăp doanh nghiệp pơk uănh, joi tơm luh, săk ntơ lư ndơ geh ƀư du trong ngăch, di đŏng.

Mpôl hên nsing nơm dŭt têh đah rơh tăch ndơ dja n’hanh mpôl hên mpŏng  lah rơh tăch ndơ dja mbra pơk luh trong chuat hăn mhe an ndơ tuch tăm Việt Nam lah nsum n’hanh Dak Lak lah êng”.

Tĭng wa Lại Thị Loan, Kruanh Hội Nông dân n’gor Dak Lak, nău râng ntŭk tăch ndơ tuch tăm Dak Lak online mbra ntrŭt ntrôl ăp hợp tác xã, rmôt tâm boh, chi hội, tổ hội nghề nghiệp, ƀon lan kan lor mir lor nchrăp n’hao rnoh khlay ndơ geh ƀư, tuch tăm đăp mpăn kloh uĕh, tĭng di rnoh n’hanh đăng ký săk ntơ lư. Nkre kơl ƀon lan kan lŏ mir rƀah gĭt nău ŭch geh bah ntŭk tăch rgâl, ntơm bah nê tâm pă tâm ban nău kan tuch tăm n’hanh geh trong rƀŏng rgâl ndơ geh ƀư tâm di đah ntŭk tăch rgâl; rgop nkoch n’hơ săk geh, dơh uĕh têh hvi ndơ tuch tăm bah n’gor, lôch nê kuăl jă ntrŭt nsôr ngăch ntuh kơl, ƀư njêng tĭng rêng rnoh khlay ndơ tuch tăm….

“Mpôl hên geh njêng Ban mât ntŭk tăch ndơ mbra way tĭng groi nđôi mbro gay ăp ndơ geh ƀư tŏng di rnoh uĕh kơt hŏ đăng ký, tâm ban kơt ntop kơl an nuĭh tăch tâm nău rhŏ dŏng gay đăp mpăn tĭng di rêng n’hanh đăp mpăn nău dơi an nuĭh tăch n’hanh nuĭh rvăt. Nău ŭch tât n’glĕ dŭt nê lah n’hao nău geh, n’hao nău rêh bah ƀon lan kan lŏ mir hun hao jâng nsing tuch tăm bah n’gor lah tuch tăm nđĭr uĕh, tuch tăm rmŭ ôm n’hanh hun hao jŏ jong tâm ban kơt dŏng công nghệ mbrô tâm nău kan tuch tăm, tăch ndơ gay nuĭh ƀon lan nkre lah nuĭh kan lŏ  mir n’hanh nkre lah du doanh nhân ta lŏ mir he nơm.”

Wa Nguyễn Thiên Văn, Groi kruanh UBND n’gor Dak Lak an gĭt, ta n’gor geh 152 ndơ geh ƀư tuch tăm dơi dăp ntil 3 sao let lơ, yor kơt nê̆ nău nkoch  n’hơ buăt nthoi đah nuĭh tuch tăm đah nuĭh dŏng sa ma trong tâm pă tăch ta trôm ndơ tăch rgâl điện tử lah dŭt khlay. Wa Nguyễn Thiên Văn lah rjăp, tâm let năp tay, ăp nău  kan tăch rgâl  ta thương mại điện tử mbra jêng rĭng grep lơn, ăp tŏng rêng lơn n’hanh tâm rlong uĕh lơn. Hội Nông dân ân ntop kơl ăp hợp tác xã, rnăk tăch rgâl, kônh wa kan lor mir nchrăp na nê̆, ăp kôp bah rêng tuch tăm, klêh, mât prăp…gay đăp mpăn têh uĕh tâm ban, ăp tŏng rêng ƀoi tĭng tơm luh ndơ geh ƀư tuch tăm.

“Dăn đă Hội nông dân n’gor nkoch trêng tay lam hvi mpeh trang thông tin điện tử tâm ban kơt mbơh gĭt ăp nkô̆ nău way geh tât nău n’glăp ndơ tăch bah he. Tâl bar lah tâm rnôk an tĭng ƀư nău săk kah uĕh ndơ geh ƀư, nău rnoh khlay tâm rlong, nău n’hao rnoh khlay kơi ntop tay bah ndơ geh ƀư ri dăn đă Hội nông dân rđău đă tay grêt dêh lơn đŏng gay ăp hội viên mô rlu n’hao săk kah uĕh ndơ geh ƀư, ƀoi gĭt tơm luh tâm ban kơt ntô lĭr đŏng.”

Phóng viên nkô̆ way nkoch hŏ geh rơh tâm ôp đah  wa Lại Thị Loan, Kruanh Hội nông dân n’gor Dak Lak- nhih pah kan tơm mât dŏng bah Chonongsandaklak.vn mpeh ăp rnoh di râng ntŭk tăch ndơ tuch tăm online tâm ban kơt nău khlay kan bah Hội tâm nău mât dŏng trang thương mại điện tử dja.

-Hơi wa, rnôk râng lăp tâm chonongsandaklak.vn nuĭh tăch ân tŏng geh moh ntil ndơ uĕh êh?

-Wa Lại Thị Loan: “Rnôk râng tâm trang thương mại điện tử ntŭk tăch ndơ tuch tăm Dak Lak.vn ri đah hội viên nông dân ăp hợp tác xã, doanh nghiệp chi hội nghề nghiệp n’hanh tổ nghề nghiệp way kuăl lah nuĭh tăch ân tŏng geh bôk năp nê lah kah uĕh ndơ geh ƀư, ăp ndơ geh ƀư tuch tăm n’glăp ta ntŭk ndranh tăch ân đăp mpăn tŏng geh ăp rnoh uĕh di nsum n’hanh nkre ân tĭng jăp ăp quy định bah pháp luật tâm ban kơt nău way bah ntŭk tăch ndơ mpeh trong tăch tâm ban kơt rvăt đŏng; tâl pe đŏng lah rnôk râng ntŭk tăch ndơ ri nuĭh tăch mbra geh trong rƀŏng mhâm ƀư gay hun hao ndơ geh ƀư bah he kah uĕh lơn gay tŏng đah nău ŭch geh bah nuĭh dŏng. Hôm đah nuĭh rvăt ri rnôk râng tĭng ƀư tâm tăch rgâl ân đăp mpăn geh nău mbơh kloh rvah n’hanh lhăt tâm ban kơt đăp mpăn ăp nkô̆ nău tâm rgop kan nsum đah nuĭh tăch mbra dơi tĭng ƀư jăp đŏng.

-Ndrĭ râng tâm ntŭk tăch ndơ tuch tăm online dja khân păng mbra moh ndơ geh êh wa?

-Wa Lại Thị Loan: “Nău geh bôk năp nê lah đah nuĭh tăch, mô dơn tăch dơi ăp ndơ na nê̆ ma nău khlay nê lah he nkoch n’hơ dơi ăp nău nkoch mpeh ndơ geh ƀư bah he tât lĕ rngôch ăp nuĭh; nkô̆ nău đŏng nê lah rnôk râng ntŭk ndranh tăch bah dih nău nkoch n’hơ ndơ geh ƀư ri nuĭh tăch mbra tât đah nău lư mpeh ntŭk tăch rgâl tâm n’gor tâm dak tâm ban kơt nău ŭch geh mpeh khay klêh play gay rƀah gĭt dơi nău ŭch geh ntŭk tăch rgâl mhâm ƀư an khay klêh donh mhâm geh gay ntơm bah nê rƀah gĭt dơi lah aƀaơ nău ŭch geh ntŭk tăch rgâl mhâm geh khay klêh donh mhâm geh gay rgâl di nău kan tuch tăm; tâl pe đŏng lah geh ntŭk gay tâm rgop kan nsum tuch tăm đah doanh nghiệp gay jêng rêng rnoh khlay ndơ tuch tăm n’hanh lơn lah doanh nghiệp mbra geh dơi dŭt âk nău dơh uĕh nê lah nău mbơh kloh rvah bah ndơ geh ƀư, ta aơ dŭt âk ntil ndơ tăch mbra tâm rđĭl mpeh săk kah rnoh khlay n’hanh tơm luh n’hanh đăp mpăn mpeh rnoh kah uĕh ndơ geh ƀư.  

- Đah nău ƀư lah Nhih pah kan tơm mât dŏng bah trang thương mại điện tử dja, Hội nông dân n’gor mbra mât dŏng, n’hanh ntop kơl ăp nuĭh tơm ndrơng ndơ tăch ta trang mhâm ƀư gay nkre đăp mpăn kah uĕh ndơ tăch tâm ban kơt ăp quy định bah pháp luật êh hơi wa?

-Wa Lại Thị Loan: Hội Nông dân n’gor njêng Ban mât dŏng ntŭk tăch ndơ n’hanh hŏ geh nău way đă tĭng na nê̆ đah nău dơn kan bah Ban mât dŏng n’hanh kruanh Ban mât dŏng ăp nuĭh lăp kan nsum tâm Ban mbra geh nău dơn kan na nê̆ tâm nău mât uănh di nău lư ăp tơ̆ tăch rgâl ta trang thương mại điện tử gay nkre đăp mpăn dơi nuĭh tăch n’hanh nuĭh rvăt lor nchrăp yơn ta nâm nău mât uănh groi nđôi lhăt ăp nău lư ăp ndơ tăch n’hanh lah geh nău tih mbra mhâm rmal tĭng di nău way n’hanh mô geh an nău tih mpeh nău way đă tĭng hŏ ndơ̆ luh. Nău mĭn aơ lah ntŭk ndranh tăch ndơ bah Hội Nông dân n’gor roh âk mông nar gay njêng yor an nău geh nuĭh dŏng mô di an ma nsĭt geh êng wăng sa ma nkoch n’hơ ndơ geh ƀư săk ntơ lư ndơ geh ƀư bah n’gor dja rdâk njêng săk ntơ lư ndơ geh ƀư bah n’gor ntơm bah nê năl dơi săk ntơ lư bah ndơ geh ƀư tuch tăm Việt Nam

          -Mpeh jŏ jong, Hội mbra geh ăp trong pơk hvi trang thương mại điện tử dja mhâm êh wa?

-Wa Lại Thị Loan: Đah ăp ntil trong ƀư tăch rgâl điện tử mô lah du ndơ pơk dŏng mpeh công nghệ mbrô ri ăp nar ân rgâl mhe gay tâm di nsum đah nău hun hao bah rêh jêng kon nuĭh ri Trang thương mại điện tử Chonongsandaklak.vn mbra ƀư kơt nê đŏng, mbra geh nău rgâl mhe, nău n’hao têh uĕh tay. Lah kơt 500 ndrơng ndơ mô tŏng an nău ŭch geh ndơ rvăt ri mbra pơk tay n’hanh mpôl hên tâm pă trong nchrăp tĭng gâl n’hanh geh trong nchrăp n’hao têh tâm ban kơt pơk hvi ndrơng ndơ đŏng lah nău ŭch geh ndơ rvăt bah nuĭh râng pơk hvi n’hanh way dơi rgâl mhe n’hanh pah kan mât dŏng ri mbra lhăt lơn đŏng gay mhâm ƀư nê lah ntŭk ndranh tăch rgâl điện tử kan geh nău tam lah nău khlay lơn mô di lah tăch geh âk ndơ tâm nar ma lah nkoch n’hơ dơi ndơ geh ƀư tuch tăm bah n’gor tâm ban kơt bah Việt Nam n’hanh ăp ndơ geh ƀư OCOOP bah 63 n’gor nkual ƀon têh.

- Ơ, dăn lah uĕh wa mpeh ăp nkô̆ mhe nkoch bah lơ nê nơh!