N’gor Dak Lak mhe geh nău lư mpeh lôch jêh khay klêh cà phê 2022-2023. Dŭt njrăng, rlău du năm aơ cà phê lơn âk tĭng trong rƀŏng hao rnoh khlay hŏ ƀư n’hao rnoh mpŏng an nău kan mât chăm. Yơn trong rƀŏng dja ƀư hao âk ntul rlong an ăp doanh nghiệp tăch n’gluh đŏng, ndơ̆ luh nău ŭch geh âk lơn đah nău mât rmoh rman.

Aƀaơ Dak Lak n’hanh ăp n’gor Tây Nguyên dôl klêh cà phê năm 2023 – 2024 đah rnoh khlay cà phê rnglăy hŭch hao ntơm bah 58.000 tât 69.000 prăk/1kg, lah rnoh dŭt khlay bah ntơm tât aƀaơ. Tĭng wa Lê Thanh Sơn, Giám đốc Marketing Công ty TNHH MTV tăch n’gluh n’glăp 2-9 Dak Lak, rnoh khlay aƀaơ lah dŭt nsĭt geh an  ƀon lan kan lŏ mir n’hanh  n’gâng kan cà phê, yơn n’gluh âk nău tât ntul rlong an ăp nuĭh rgum rvăt- tăch n’gluh đŏng. Ndrel đah du rnoh ŭch tât mpeh rnoh âk, doanh nghiệp tăch n’gluh ŭch geh tơm prăk âk rlău  du tơ̆ n’gul năm bah năp nơh, nkre tâm rdâng đah nău tât rmoh rman hŭch hao mpeh rnoh khlay mô gĭt njrăng năl lor./.