Lôch geh ƀư neh, tâm ndrĭh jŭr ntil bâh khay 12/2023 tât aƀaơ, ăp nar ta mir tơm sâm Ngọc Linh ma Thủ tướng chính phủ pă an ntil an rnăk ach o bâh nkuăl Tu Mơ Rông,n’gor Kon Tum lĕ geh nuĭh ƀon lan kâp chăm, mât tăm. Nô A Phai, thôn Tân Ba, xã Tê Xăng an gĭt, thôn bâh nô geh 22 rnăk ach o geh nkuăl pă an ăp rnăk 40 tơm sâm Ngọc Linh ntil ma Thủ tướng pă an. Gay ma ăp tơm sâm khlăy hun hao ueh jêng, lĕ rngôch ăp rnăk ach o geh kơl tơm sâm ntil an geh nău mât kơl, mât chăm na nê̆ an ăp tơm sâm.

 “Ƀon lan 22 rnăk ach o ƀư ntưm ma jal gay ma ntru đe, sĭm, kraih. Lôch nĕ sŏk mbŭh si gay ma tăm sâm an jêng. Lôch ƀư an ueh lah 3 rnăk ƀư du rmôt tŏ dak, uănh mât tơm sâm, mât ueh sâm an ƀon lan”.

Nô A Phát, nuĭh tâm lĕ ăp nar Tết Nguyên đán mhe nơh way tât râng mât chăm tơm sâm Ngọc Linh nkoch kơt aơ.

 “Geh Thủ tướng Chính phủ pă an ntil tơm sâm mpôl hên dŭt rhơn ngăn n’hanh pah kan dŭt nđơr yor hên lah rnăk ach o. Let năp tay tơm sâm ueh jêng,lah geh jêng hên mô hôm ir ach o kơt aơ mbra bah ach o kơt rnăk êng đŏng”.

Nta nău nơih gay ma 300 rnăk ach o ta 23 thôn ta 8 xã tâm nkuăl geh neh tăm 12 rbăn tơm sâm Ngọc Linh Thủ tướng pă an ntil, n’gâng kan nkuăl Tu Mơ Rông lĕ pă an du xã geh dŭt đê̆ ngăn lah 0,5ha neh ta yôk Ngọc Linh ta rnoh neh 6, nkual bri 218 ta xã Măng ri.

Rnoh neh aơ ta nău prêh rlău 1.500m đah măt dak lêng, ta n’hâm bri dŭt ueh dơh an nău tăm sâm Ngọc Linh. N’gâng kan nkuăl lĕ nchrăp rnoh ƀư bâh mir tơm 12 rbăn tơm sâm geh Thủ tướng pă an, ăp rnăk ach o tâm ăp năm tay mbra geh tŏng neh gay ma yơng ntil pơk hvi rnoh neh tăm sâm, nkre lah, kơl mpeh kĩ thuật mât tăm an ueh tơm sâm hun hao jêng nta nău pah kan jŏ jong an ƀon lan. Wa Võ Trung Mạnh, kruanh UBND nkuăl Tu Mơ Rông, n’gor Kon Tum an gĭt.

 “Thủ tướng pă sâm an rnăk ach o njêng nău rêh pah kan jan sa jŏ jong n’hanh bah ach o nâp nâl an ƀon lan. Bâh nău kơl an bâh Thủ tướng nkuăl lĕ pă an ntŭk kan tuch tăm, ntŭk kan mât kơl nău tuch tăm ntĭm leo mpeh kĩ thuật mât tăm an ƀon lan gay ma ƀon lan rgum, mât đăp mpăn kĩ thuật pah kan an geh ueh jêng ngăn. Rdâk njêng nău kan mât uănh mir tơm sâm bâh nĕ pă kan an nê̆ đah n’gâng kan ăp xã tâm pleh mât uănh n’hanh mât uănh tâm ban kơt mât chăm mir tơm sâm. Bâh rnoh kơl bâh bôk nău kan nkô̆ mpŏng ngih dak mpeh rnoh kơl an gay ma rdâk njêng mpêr n’gar”.