Rlău ma ƀư âk nar rgum nchră, tiăr gay ntop kơl ăp ntŭk kan, doanh nghiệp ta n’gor gĭt tât n’hanh n’hao wât rgum lăp lam ntŭr neh, n’gor Lâm Đồng dôl rgum ntrôl dăng trong kan ntrŭt ngăch tăch rgâl, boăt nthoi tăch rgâl, pơk hvi ntŭk tăch ăp ndơ lŏ mir geh ta ntŭk. Lâm Đồng lah n’gor geh âk mpeh nkra njêng lŏ mir công nghệ mhe, đah âk ntil ndơ lŏ mir ntoh lư dơi nkret njêng bah biăp, trà, cà phê, atiso n’hanh du đêt ndơ play khlay wăng sa âk.

Gay đăp mpăn nkra njêng, đăp mpăn ntŭk tăch, pơk hvi ntŭk tăch ndơ tâm dak n’hanh tăch n’gluh, n’gor Lâm Đồng ƀa ƀơ ƀư ăp jrô tiăr nti tăch rgâl, năp nău wât mpeh râng ăp tâm ton tăch rgâl an ăp doanh nghiệp. Nkre, nsrôih mbơh ƀư ăp bôk nău rgop an tâm nchră ntop kơl doanh nghiệp hun hao tăch rgâl điện tử, mpla nsơ ndơ moh êng, n’hao dơi tâm rlong, joi ntŭk tăch ndơ ăp rgum mpla tăch ndơ, mpla nsơ n’hanh nkoch mbơh ndơ.