Năm 2023, ndơ grăp mắc ca bah Công ty Cổ phần Damaca Nguyên Phương, nkuăl Krông Năng, n’gor Dak Lak lĕ geh măt ta lĕ rngôch ăp n’gor, nkual ƀon têh ta lam dak n’hanh tăch n’gluh di trong tăch têh an ntŭk tăch Nhật Bản. Wa Nguyễn Thị Thu Phương, Giám đốc công ty an gĭt, gay rlet rlău ăp jêr jŏt n’hanh ntŭl rlong bah nău rgâl wăng sa, doanh nghiệp lĕ dơi nchrăp ndơ bah nkual tăm, doanh nghiệp uănh khlay tay mpla nsơ nkoch mbơh ndơ luh ăp ntŭk tăch n’gluh têh.

Mpôl hên dôl pah kan đah du đêt ntŭk tăch têh kơt Trung Quốc n’hanh du đêt dak ta ntŭk tăch Ả Rập ri mpŏng tâm năm tât mbra dơi dơn âk nău mbơh uĕh dơi ntŭk rwăt gay geh ntŭk tăch đăp mpăn.

Năm aơ, bah meng hun hao ntŭk tăch tâm dak, Hợp tác xã Lŏ mir tăch rgâl Công bằng Ea Tu, xă Ea Tu, nkual ƀon têh Buôn Ma Thuột, n’gor Dak Lak, rƀŏng tât tay ntŭk tăch n’gluh tă bah ndơ cà phê uĕh kah âk n’hanh cà phê kah. Wa Trần Đình Trọng, Kruanh Hội đồng quản trị nkre ƀư Giám đốc hợp tác xã an gĭt, nkra njêng cà phê kah lĕ n’hao khlay grăp cà phê, nsĭt tay nău uĕh ngăn ngên, an nuĭh ƀon lan rnôk rnoh khlay cà phê đăp mpăn n’hanh âk lơn nkôp đah ntŭk rwăt bah 2-2,5 rkeh prăk/tấn. Aƀaơ, Hợp tác xã Lŏ mir tăch rgâl Công bằng Ea Tu dôl ndâk ƀư trong nchrăp âk ntil ndơ tĭng nău ŭch bah ntŭk tăch, nar lơ n’hao uĕh kah ndơ tă bah nkra njêng nkret pâr cà phê kah.

Mhe aơ mpôl hên lĕ dơi ƀư mã tâl dŭng an cà phê grăp wâr, cà phê môi n’hanh cà phê mbli gay tăch an Trung Quốc. Đah cà phê uĕh kah âk n’hanh cà phê kah êng nar lơ âk bu ŭch nău aơ dŭt dơh n’hanh dŭt uĕh đah nuĭh ƀon lan dơi mât trong nkra njêng uĕh, mô dŏng dak si tu ndrŭng âk, mô dŏng dak si pih ri mbra nâp nâl.

Tĭng wa Nguyễn Hoài Dương, Giám đốc N’gâng kan tuch tăm mât rong n’hanh Hun hao ƀon lan n’gor Dak Lak, năm 2023 lah du năm lôch uĕh bah lŏ mir n’gor nơm rnôk ngăch hao jêng geh 4,88%. Aơ lah rnoh hao jêng wăng sa bah n’gor. Ndrel đah nĕ, nău rnoh khlay bah du đêt ntil ndơ lŏ mir kơt: sầu riêng, cà phê, tiêu, phe ba hao âk n’hanh Dak Lak ntrôl dăng dơi tăch n’gluh di trong têh lăp du đêt ntŭk tăch jêng nău geh khlay bah kônh wa ƀon lan, ăp nuĭh na nê̆ tuch tăm luh ndơ dơi rgâl âk, hao 15.000 rmen prăk nkôp đah năm 2022. Prăk geh tăch n’gluh âk bah n’gor rơh bôk năp hao tât 1,6 rmen đôlar.

Năm 2024, n’gor Dak lak mât uĕh tay nsan dăng tâm nkra njêng lŏ mir, ngăn lah uăh khlay pơk hvi ntŭk tăch n’gluh ăp ndơ lŏ mir khlay, n’gor mpŏng kâp mbra rgop ndơ̆ wăng sa rêh jêng bah n’gor hao. Gay ƀư tĭng rgop mpŏng kâp aơ, wa Nguyễn Hoài Dương, Giám đốc N’gâng kan Tuch tăm mât rong-Hun hao ƀon lan n’gor Dak Lak an gĭt:

Ntŭk tăch lah nău ntrŭnh. Năm 2024, nău kan mbra mĭn njêng 16 tâm ton tăch rgâl dah rŏng ma Việt Nam lĕ ký ton đah ăp nkual, ăp dak gay dŏng ăp nău dơh ăp jâng nsan bah ăp tâm ton tăch rgâl dah rŏng aơ n’hanh mĭn njêng ăp nkual geh âk nău ŭch tăch n’gluh ndoh ndơ bah Việt Nam ma Dak Lak dơi geh bah nĕ nchrŏng trong nkra njêng đăp mpăn tâm di ăp nău ŭch tâm di uĕh kah bah ăp ntŭk tăch gay bah nĕ n’hao khlay n’hanh tăch nâp nâl./.