Ƀư tĭng nău ntĭm mboh bâh n’gâng kan n’hanh n’gâng kan tuch tăm nkuăl Kon Plông tâm ăp nar nđik srŏ hô, trôk geh tŭk lêm, mih phŭ, 145 rnăk ƀon lan Xơ Đăng ta ƀon Kon Vơng Kia, nkuăl têh Măng Đen lĕ geh ƀư âk trong kan gay ma mât răm an sur ndrôk rpu. Ndrel đah nău mô geh mbơk lêng ndrôk rpu tâm bri ăp rnăk ƀon lan tâm jă ƀư ndrung 35 ndrung krŭng nsum ndrôk rpu gay ma dơh mât uănh. Nô A Ka Riăc du hê ƀon lan tâm ƀon an gĭt ăp nar ăp rnăk ƀon lan tâm pleh mât njrăng ndrôk rpu an bah srŏ nđik.
“Ăp nar mơh rnăk i hăn nchiă rnăk nĕ hăn koh pih ta mir an ndrôk rpu sa. Nđâp ma mât kloh ndrung n’gar kơt nĕ đoñg, mơh rnăk i nar nĕ chiă ndrôk rpu rnăk nĕ kuaih ueh kloh ndrung n’gar. Jêng lah ntŭk mât rong kloh ueh mbro ngăn. Ntưm n’king ndrung an răm, su rse lâk an răm ndrôk rpu bich ta măng”.
Lah ntŭk way gêh nău tât hô bâh srŏ nđik tâm khay puh, ăp năm dăch aơ nkuăl Kon Plông, n’gor Kon Tum way geh ntrôl dăng nău mbơh tơih, rgŏ jă ƀon lan rnoi đê̆ mât uănh tât nău njrăng rdâng srŏ nđik an ndrôk rpu.
Bâh mô hôm mƀơk lêng ndrôk rpu tâm bri, ta nkuăl mô hôm geh nău ndrôk, rpu khĭt srŏ nđik tâm ăp nar khay puh, ndrôk rpu bâh nkuăl aƀaơ hao râk đah lĕ rnoh bơi tât 24 rbă mblâm. Wa Võ Đình Tân groi kruanh ntŭk kan tuch tăm mât rong n’hanh hun hao ƀon lan nkuăl Kon Plông an gĭt ta năp khay puh nđik năm aơ ntŭk kan lĕ pă an 1 rbăn sƀ mbơh tơih ƀon lan njrăng nău srŏ nđik an ndrôk rpu.
“Sial puh tât, sial nđik nuĭh ƀon lan lĕ gĭt nching, ƀư nâp răm ndrung n’gar. Mpeh ndơ sa nuĭh ƀon lan gĭt dŏng rhe an sa. Rlău ma nĕ hôm nha geh tăm pih, lôch nĕ sŏk tơm ju an ndrôk rpu sa tay . Rnôk ma trôk nđik krŭng tâm ndrung. Dŭt âk ƀon lan aƀaơ gĭt mât rong n’hanh ta măng leo sĭt ta ndrung , ƀa ƀơ mât kloh ueh ndrung n’gar, rao kloh kaman ăp khay”.
Viết bình luận