Tĭng ƀư ăp trong nkra rgop hun hao cà phê jŏ jong, kloh uĕh an neh ntu ntŭk gŭ rêh, mhe aơ, âk ƀon lan kan lŏ mir ta Dak Lak hŏ nsĭt geh wăng sa, mât rơ̆ trĭch, gay njrăng, n’gang ăp ntil tu ndrŭng chuh sa n’ging tơm, bu tuh nđôch, krêp rsap….ta tơm cà phê. Nău dja mô dơn kơl hŭch bah huach prăk tơm lăp kan, mât njrăng n’hâm suan ma hôm săk kah uĕh cà phê.

          Lôch dŏng ăp ntil phân poh hóa học, dak si mât njrăng tơm tăm an mir cà phê, wa AMa Hồng (Y Đức Êban) ta buôn Sút M’grư, xã Cư Suê, nkuâl Cư M’gar saơ lah, rnoh nđĭr uĕh jêng bah mir tơm lah ăp nău rvê ji  bôk rngok bah păng. Jêng rnôk cán bộ ntrŭt nsôr tuch tăm nkoch trong ntĭt leo mât trĭch njrăng n’gang tu ndrŭng chuh sa, păng hŏ đăng ký râng. Lôch 1 năm tĭng ƀư, păng saơ geh nău tam kloh bah nău mât trĭch tâm mir cà phê.

“Gâp mô dơi ât dak si ndrŭng yor ntơm nơh tơm cà phê rnăk gâp puh dak si lơn lah dak si ndrŭng chuh n’ging hôm krêp rsap. Yơn lôch rnôk geh trĭch bah nê tât aƀaơ gâp mơ saơ lah mir dja mô puh dak si ndrŭng ma n’ging cà phê rngơ̆ mô saơ geh tu ndrŭng chuh n’ging. Tâl bar đŏng lah phân poh đêt lơn đŏng, năm aơ gâp đêt poh phân ngăn”

Hôm đah wa Đặng Văn Huy ta thôn 3, xã Cư Suê, nkuâl Cư M'gar, hŏ krêp dêh, mĭn rvê ndrel cà phê hữu cơ, ri nău dŏng trĭch gay njrăng n’gang tu ndrŭng chuh sa lah trong nkra jŏ jong n’hanh kloh uĕh đah neh ntu bri dak đŏng.

 Ăp năm ân dŏng dak  si mât njrăng si tăm nklăp 10 tơ̆ ri aƀaơ dŏng trĭch hŭch hôm dŏng 2- 3 tơ̆ dơm, ri păng hŭch dơi dŭt âk prăk roh mât chăm. Lơn  lah rnôk puh dak si mât njrăng si tăm ntil mô ir khêh âk. Rnoh khêh dơn hôm gưl 2-3 dơm mô ir tât puh dak si dŭt khêh djơh âk”.

Tĭng wa Huỳnh Văn Tấn, Groi jrô kan Kỹ thuật – ndơ̆ rgâl mpeh Ntŭk rgum mât njrăng si tăm miền Trung: nău khlay dŭt mha êng bah trĭch lah nău khlay gŭ rêh bah păng tâm nău sa lĕ tu ndrŭng lơh khuch djơh tât tơm tăm.  Trĭch lah ntil ndơ joi sa lĕ tăp ndrŭng rdjăt, lĕ ma tu  ndrŭng lôk chuh play cà phê, bu tuh nđôch.  Bah meng nê, trĭch dơi gĭt tât lah ntil geh nău dơi bên âk n’hanh mbra ngăch bên đah nău rgâl bah ntŭk gŭ rêh. Ăp mir tơm ta Tây Nguyên lah ntŭk dơh kơl an trĭch gŭ  rêh rơ̆ jêng uĕh. Ntŭk rgum mât njrăng si tăm miền Trung mbra gŭ mĭn tay n’hanh yơng lam  hvi mô dơn ta tơm cà phê ma hôm ăp ntil tơm jong nar geh rnoh khlay wăng sa âk let năp tay đŏng.

“ Ta Tây Nguyên ăp tơm khlay rmen đôlar ri rlău ma tơm cà phê hôm geh tơm sầu riêng đŏng, năm aơ mpôl hên dŏng lĕ ma ta tơm cà phê lơn âk  ta bar n’gor Dak Nông n’hanh Dak Lak. Tât năm tay, mpôl hên mbra ƀư tơm ta tơm sầu riêng. Nău ŭch lah kơl an ƀon lan  kan lŏ mir he  wât âk lơn nău uĕh bah nău mât trĭch tâm njrăng n’gang tu ndrŭng chuh sa mô dơn ta tơm cà phê ma hôm ta tơm sầu riêng đŏng”.

 He mbra dơi  saơ, mât trĭch tâm mir tơm cà phê dôl lah du trong nkra sinh học geh nău dŭt tam, đêt roh huach  prăk mât chăm n’hanh lơn lah mô khêh djơh neh ntu ntŭk gŭ rêh, tâm di đah trong rƀŏng tuch tăm tĭng trong jŏ jong. N’gâng kan tuch tăm mât rong n’gor Dak Lak dôl ntrŭt nsôr nuĭh ƀon lan kan lŏ mir dŏng n’hanh yơng rơ̆ jêng âk trong ntĭt leo mât trĭch gay njrăng n’gang tu ndrŭng chuh sa an tơm tăm./.