Rƀŭn boăt nthoi nkra njêng n’hanh tăch ndơ lŏ mir Dak Nông 2023 lĕ dơi ƀư ôi 5/12, ta nkual ƀon têh Gia Nghĩa. Rlău 200 nuĭh ƀon lan, kan ndrel ta n’gor Dak Nông lĕ geh rơh mâp, tâm rgâl, joi nău ngơi nsum đah ăp doanh nghiệp tâm n’hanh bah dih n’gor. Tât aƀaơ, Dak Nông lĕ hun hao geh 23 ndơ tơm khlay, nău kan ndoh ndơ têh dăng, nău kan ndoh ndơ đah geh âk n’hanh uĕh ndơ lŏ mir mbrơi mbrơi mĭn lah jâng nsan ta ntŭk tăch.

Tâm nĕ geh 140.000 ha cà phê, rnoh geh rlău 350.000 tấn, rnoh neh tiêu 34.000 ha dâk bôk năp lam dak. Bah meng nĕ hôm e geh ăp ntil tơm sa play kơt sâu riêng, bơ, mắc ca đah rnoh neh n’hanh rnoh geh geh ndơ âk. Ta rƀŭn, ăp doanh nghiệp tât bah âk nkual ƀon têh ndrel đah ăp Hợp tác xã, ƀon lan ta n’gor Dak Nông lĕ sŏng dăng tâm rgâl, joi nău ngơi nsum gay kan ndrel hăn tât ndâk njêng ăp trong nkra njêng-tăch ndơ lŏ mir.