N’goang rong ka bâh wa Đinh Văn Thắng ta nklang dak nđir rsang ta dak bât pă điện Dak Rtih ta dăch meng nkuăl ƀon têh Gia Nghĩa, n’gor Dak Nông. Wa an gĭt, dak bât pă điện dŭt kloh, rsang, tâm di gay ma mât rong âk ntil ka kơt: ka chep, trắm, diêu hồng, ka koi...râng geh ăp năm, rnăk vâl wa nău geh đăp mpăn bâh 500-700 rkeh prăk bâh ntŭk n’goang rong ka nĕ.

 Dak aơ dŭt kloh rsang yor ta aơ dak bât pă điện hoch dŭt ueh mô geh ƀơ̆. Rong kan rĭ kanŭng hoach mông nar bôk năp dơm, rĭ he an geh mât ueh bôk năp, bâh 10-15 nar, rnôk ka lĕ bên đah ntŭk gŭ rêh hôm rĭ păng mbra mô geh khĭt”.

Ngai đah Gia Nghĩa klâp ma 100km, ta dak me Krông Nô, bâh âk năm aơ, rnăk vâl wa Bùi Văn Xô, ta Ƀon Choah, nkuăl Krông Nô rong 15 n’goang rong ka diêu hồng. Wa an gĭt, ăp năm rnăk vâl geh 120 tấn ka, lôch n’hâp lĕ prăk dŏng kan hôm nha rmeh klâp ma 400 rkeh prăk đŏng. Ta nkual aơ măt dak hôm nha hvi, rnoh dak hoch tâm di gay ma mât rong kan, bol ma hôm nha geh ăp nău khuch khat.

 Nău jêr ngăn lah dak sĭt âk rĭ ka dơh ngăn khĭt, tal 2 lah khay wai rĭ dak jur soăt ka roh đŏng. Rong ka rĭ aƀaơ rnoh ntil lah dŭt mô geh âk ngăn.

N’gor Dak Nông geh lĕ rnoh neh măt dak mbra dơi rong tui ka klâp ma 17.500ha, đah âk dak bât pă điện têh jêt kơt ƀon Tua Srah, ƀon Kuôp, Đồng Nai 3, Đồng Nai 4, Đak Rtih, ndrel đah rlău 250 dak bât tŏ djrah n’hanh du đê̆ dak me têh jê̆. Tât aƀaơ, rnoh neh mât tui ka ta n’gor geh bơi tât 2 rbăn ha, đah klâp ma 1.200 n’goang rong, rnoh âk rlău 7.300 tấn ăp năm. Tĭng nău mbơh bâh wa Ngô Xuân Đông, groi Giám đốc ntŭk kan tuch tăm mât rong n’hanh hun hao ƀon lan n’gor Dak Nông, aƀaơ hôm nha geh âk nău kŏ jêr tâm trong mât rong tui ka ta n’gor, yor mô tŏng nău kan pháp lý gay ma mât tui ka ta ăp dak bât n’hanh ê hŏ geh  ăp ntŭk pă ntil ueh di. N’gâng kan dôl joi trong doh rklaih nău jêr gay ma ntrôl nău mât rong tui ka tĭng trong geh săk rnglăy, nâp nâl, mât ntŭk gŭ rêh đăp mpăn, mât ăp ntil ndơ tui ka geh rnoh khlăy.

Bôk năp lah uănh năl tay nău kan pháp lý n’hanh mĭn uănh ăp nău kơl kan gay ma nta nău dơh nơih gay ma mât rong tui ka ta ăp  dak bât, dak me ta n’gor Dak Nông ta ăp dak bât pă điện mô lah ta dak me Krông Nô. Tal 2 lah n’hao nău nti nău kan rgâl mhe mbơh mpeh kĩ thuật n’hanh uănh năl pơk hvi ăp nău kan mât rong tui ka geh săk rnglăy gay ma ntrôl hun hao n’gâng kan aơ”.

Đah âk dak bât têh, ntŭk mât kloh ueh dak rsang, Dak Nông hôm nha geh âk ntŭk gay ma hun hao mât rong tui ka. N’gor geh nău mpŏng nsrôih tât năm 2030, lĕ rnoh dak mât tui ka geh klâp ma 4.500ha, rnoh geh rlău 20 rbăn tấn.