Rmôt tanh njuh tâm ƀon Mùi 2, xã Cư Né, nkuăl Krông Búk, n’gor Dak Lak rnôk aơ geh rlau 20 nŭih. Aơ lah ăp nŭih lôch nti jrâu ntĭm nti nau kan yor Rmôt kan bu ur nkual tâm rgop nsum ma ntŭk kan ntĭm nti nau kan-ntĭm nti ƀa ƀơ tâm nkuăl Krông Búk ƀư tâm năm 2017. Jêh lôch nti, ăp yuh rgum gay ndâk kan, joi năch rvăt. Yuh Hoàng Thị Niệm, rnoi Tày, Kruanh rmôt tanh njuh bah ƀon Mùi 2 mbơh, đah ăp ndơ geh tăch, rmôt kan mra ndơn ndrel pă ân ăp nŭih kan đah rnoh prăk nkhôm ƀư lah 300-500 rbăn tâm du blah. Nau kan ƀa ƀơ geh, ndăn rnôk ru yơn hŏ kơl an ăp yuh nkre geh prăk, nkre dơi mât nau kan ơm:

 ‘Săk gâp kŏ ŭch ma nau kan tanh njueh bah rnoi Rđe. Ăp rnôk ru ngăn, ăp rnôk bri mih ri kŏ ƀư tanh đŏng gay ma ntop tay nau geh. Rnôk aơ, rmôt tanh njuh hŏ pơk trong nơih, pă kan pah ân oh nur ân geh tay prăk”.

Nthoi nau dơi, năm aơ, nkuăl Krông Búk lŏ pơk tay jrâu nti kan tanh njuh tal 2. Jrâu tanh njuh aơ geh ntĭm ntơm tâm khay 3 mhe rlau, rgum geh 35 nŭih râng. Yuh H’Hà Kpă, rnoi rđe, tâm ƀon Ktơng Drun, xã Cư Né, nkuăl Krông Búk, nkoch:

‘Rnôk bôk năp ri nti kŏ jêr đŏng, yơn lah rnôk ntơm nơm ƀư tât jŏ oi ri kŏ mơng đŏng, saơ ŭch ngăn ma nau ntĭm nti aơ. Rnôk aơ oh, nur ŭch ngăn ngên, ăp nar hăn nti, jêh aơ lôch nti ri geh tanh ndơ ân nơm, jêh aơ lah geh nau dơi ri nơm tanh gay ma tăch đŏng, geh tăch ndơ nơm tanh geh tay prăk ân nơm đŏng”.

Ndrel ma nau tanh njuh, tâm năm aơ, nkuăl Krông Búk mra pơk tay 9 jrâu nti nau kan gleh khay ân rlau 300 nŭih, đah ăp nau kan êng êng, kơt: Hàn điện, rnglăp điện dak, tanh công nghiệp, mât rong mpa, tăm sêt. Wa Nguyễn Thị Thu Trang, Groi Giám đốc ntŭk ƀư nau ntĭm nti kan, ntĭm nti ƀa ƀơ nkuăl Krông Búk, mbơh, ăp ntŭk kan bah nkuăl hŏ tâm rgop gay ma uănh, mbơh nau ŭch nti nau kan bah ƀon lan gay ndâk nau ntĭm nti ân tâm di:

“Nŭih hăn nti kan ri bu ŭch ngăn râng, êng nau geh nti nau kan mô roh prăk ri ăp oh geh kơl an ăp nau êng đŏng. Bah năp măt lah ntĭm nti ân ăp oh blau nau kan, geh mât nau kan ueh ơm bah nkuăl. Ăp jrâu aơ lah ntĭm nti nau kan ƀa ƀơ ân ăp oh, nklăp 3 khay lah khân păng geh pă săm ƀŭt kơp dơn lôch nti kan”.

Tâm lam n’gor Dak Lak, ntơm năm 2021 tât rnôk aơ, n’gor ntĭm nti kan ân rlau 7000 nŭih tâm ƀon lan, tâm nê geh rlau 6000 nŭih rnoi mpôl đê̆. Tĭng Sở Lao động-Thương binh ndrel Xã hội n’gor Dak Lak, jêh lôch nti, rlau 80% nŭih geh kan pah mhe mô lah geh n’hao nau blau kan ân geh nau dơi, geh tay prăk âk lơn. Wa Nguyễn Quang Thuân, Groi giám đốc N’gâng kan Lao động-Thương binh ndrel xã hội n’gor Dak Lak mbơh, gay nau kan ntĭm nti kan ân geh săk tam, bôk nau kan ntĭm nti geh ƀư tâm nau leo uănh nau ŭch bah nŭih nti ndrel nau ŭch bah ntŭk ndơn kan kŏ kơt lah nau văng sa, rêh jêng bah nkuăl:

‘Phung hên hŏ geh nau ký ton bôk nau kan rgum nsum đah ntŭk kan tâm, bah dih n’gor geh nau ŭch săch nŭih kan, tâm nchră, pah kan đah ngih săm ƀŭt Trung cấp, Cao đẳng tâm n’gor gay n’hao nau nkoch mbơh nau, leo ăp nau kan dôl ƀư gay ma ntĭm nti. Đah nŭih geh nsôih pă kan pah ri nơm kŏ geh nau pah kan nsum ma ngân hàng chính sách. Tâm nau kan bah ăp nŭih mra kơl an ân manh prăk, nklăp geh 50 rkeh du hê”.

Bah nau kan ntĭm nti, nŭih kan tâm ƀon lan tâm Dak Lak geh nchrăp ăp nau blau mhe mpeh nau kan ndrel nau dơi ƀư ngăn, n’hao nau blau, kơl an ân geh nau dơi ndrel nau nkhêp geh kan ân tâm di, n’hap nau geh. Kan ntĭm nti tĭng nau ŭch kan, nau kan văng sa, pơk trong dơi ân hun hao văng sa, rêh jêng./.