Khay klêh sầu riêng 2023 ta n’gor Dak Lak hŏ dŭt jêh đah nău dơi mô hŏ tă geh mpeh rnoh âk geh play, rnoh khlay nchroh tât rlău 15 rbăn rmen prăk, rlău âk  tơ̆ đah nău mpŏng n’hanh kơl n’gor geh tay hang rbăn nuĭh ƀon lan kan lŏ mir geh ndrŏng. Ndrĭ yơn, aơ hôm lah năm klêh play rngot đah ăp doanh nghiệp rvăt tăch n’gluh, rnôk lơn âk ntŭk tăch mô nsĭt geh mô lah nsĭt geh tăch rgâl mô tât dah nău mpŏng, n’hanh nău dja lơn ma mpơl kloh ăp nău rvê ta ndơ tăch geh âk nău mpŏng. Phóng viên Đình Tuấn way gŭ kan ta nkual Tây Nguyên, ôp wa Vũ Đức Côn, Groi Giám đốc Sở Nông nghiệp n'hanh Phát triển nông thôn, Kruanh Hiệp hội Sầu riêng Đăk Lăk mpeh nkô̆ nău dja, ndrel ăp trong nkra bah n’gor.

-Hơi wa Vũ Đức Côn, Groi Giám đốc Sở Nông nghiệp n'hanh Phát triển nông thôn, Kruanh Hiệp hội Sầu riêng Dak Lak, tât aƀaơ Dak Lak hŏ klêh lĕ sầu riêng 2023, may mbra an gĭt ntŭk nău dơi bah năm klêh play dja lah moh ndơ mêh?

-Wa Vũ Đức Côn: Ntŭk rgum khlay bôk năp lah rnoh hvi neh klêh hao 3.000 ha. Rnoh khlay hao âk đŏng n’hanh rnoh âk geh play hŏ rlău 200 rbăn tấn. Tâl bar lah ƀon lan kan lŏ mir tăm sầu riêng geh play klêh ri geh nău dơi dŭt âk, nău geh mô dơi mĭn tât.

-Kơt may lah, năm aơ ƀon lan kan lŏ mir geh nău dơi mô mĭn tât, yơn rlơ̆ tay, ăp doanh nghiệp ri hôm mâp âk jêr jŏt đŏng. Hơi wa, nău nê tă bah ndơ lơh mêh?

-Wa Vũ Đức Côn: Nklăp lah tă bah rnoh khlay hao ri nău lor bôk năp păng jêng tât lah tâm rlong mô kloh rvah, tâm pit rvăt, tâm pit tăch… Hôm tă bah nsrôih pit mât nkual ntŭk tăm ri âk doanh nghiệp hŏ ntrôl rnoh khlay hao. Tâl bar lah âk nuĭh tâm rlong ƀư tăch rgâl n’gluh n’glăp mô hŏ rƀah gĭt kloh nău lư kơt nău đêt geh mpeh nău gĭt blău.

-Ndrĭ, tâm păch pêng đah nău dơh uĕh n’hanh jêr jŏt kơt nê̆, ri tâm năm bôk năp kan, Hiệp hội Sầu riêng Dak Lak hŏ moh geh nău ring tam tât ndơ tăch mêh?

-Wa Vũ Đức Côn: Hiệp hội mhe njêng luh bah khay 3 năm 2023 tât aƀaơ, ri lôch nê hŏ lăp ƀư dơi du đêt nău kan n’hanh geh ring tam âk tât nău kan tăch rgâl. Mpôl hên tâm ban kơt ƀư dơi tâm nchră tâm mâp đah doanh nghiệp rvăt nkret njêng đah nuĭh tăm đŏng; nkre đah nê lah mpeh nhih pah kan mât uănh ngih dak, nhih pah kan rnâng kan. Mpôl hên hŏ mbơh kơl dŭt âk nău lư nkrum lam mpeh ndơ tăch, n’gluh ăp nău năl mpeh trong rƀŏng, dơh soih, jêr  jŏt đah ndơ tăch sầu riêng bah Dak Lak.

- May mbra moh geh nău nchroh mpeh khay klêh play sầu riêng Dak Lak năm 2024 mêh? Du đêt doanh nghiệp mĭn lah, mô tât jŏ ma rnoh âk play sầu riêng bah Dak Lak mbra tât n’gul rkeh tấn, n’hanh ntoch jong tâm rlău 2 khay, ri Dak Lak mbra mhâm geh trong nkra mêh wa?

-Wa Vũ Đức Côn: Nklăp Dak Lak lah n’gor geh rnoh hao dŭt ngăch tâm ăp n’gor râng tăm ndơ tăch dja. Yơn lah hun hao bah n’gor Dak Lak mô hŏ ring tam ân tât nău hun hao bah lam dak lah êng n’hanh ăp dak râng tăm sầu riêng lah nsum đŏng. N’hanh păng mbra geh tât ring tam yơn gâp mĭn lah mô hŏ khuch âk yor nău ŭch geh bah mpeh Trung Quốc nha hôm âk đŏng. Rlău ma nê, he hăn tât joi âk ntŭk tăch mhe đŏng.

-Mpeh nău dơi leo ƀư njêng, lơn lah ndơ dŏng logistics bah Dak Lak, gĭt ban đah rnoh âk play dôl hao ngăch đŏng lah mô?

-Wa Vũ Đức Côn: Di, di nê mơ lah nău dŭt rvê ngăn. Sầu riêng bah Dak Lak mhe hun hao prăm prao năm aơ. Ăp nău kan tâm rgop nsum đah ăp nuĭh tăm mô hŏ lhăt đŏng, n’hanh đah nuĭh tăm đah ăp doanh nghiệp rvăt nkret njêng mô hŏ lhăt đŏng. Măt êng ri ăp ntŭk nkret njêng bah he nha mô hŏ hun hao ơm. Đah aƀaơ nklăp 2 năm ri n’gor hŏ uănh saơ nkô̆ nău ndơ tăch sầu riêng lah ndơ tăch dŭt khlay đah n’gor tỉnh ủy Ủy ban hŏ rđău đă Sở Nông nghiệp phát triển nông thôn hun hao du đề án hun hao ntŭk rgum tơm bah bôk nău kan dja lah bôk năp ân mĭn uănh lĕ ma rêng nkret njêng lĕ ma bah ntil tât tâm rgop kan n’hanh tâl pe lah ntrôl dăng nkret njêng tăch n’gluh n’hanh tâl puăn đŏng lah ntik uĕh nău khlay kan bah hiệp hội n’hanh nhih pah kan rnâng kan ntơm ma nău ntrŭt nsôr rgŏ jă lôch dăn đă ăp nhih pah kan jêng rnoh di kah uĕh ndơ tăch gay mât uănh lhăt lơn.

Ơ, dăn lah uĕh wa!