Ôi ntri (3-1), ta nkual ƀon têh Buôn Ma Thuột, n’gor Dak Lak, Công ty cổ phần tăch n’gluh n’glăp Nutrisol ƀư “tăch n’gluh container Macca Dak Lak tĭng trong me lor bôk năp tâm Hàn Quốc”. Aơ lah ndơ tuch tăm tăch n’gluh lor bôk năp bah n’gor Dak Lak tâm năm 2024 đŏng.

Găr mắc ca tăch n’gluh tĭng trong me lor bôk năp tât Hàn Quốc geh rnoh âk 10 tấn dơi tăm ta n’gor Dak Lak. Ndơ tăch hŏ rlău dŭt âk rêng uănh năl bah nhih pah kan way kan mpeh uănh năl bu chuh khuch play, đăp mpăn kah uĕh ndơ sa, trong nklâm tâl n’hanh ƀoi tĭng tơm luh. Nchrăp rnoh ndơ dja mbra dơi tăch ta ăp siêu thị têh ta Hàn Quốc. Lah ta rơh lễ, wa Huỳnh Ngọc Dương, Groi Giám đốc Sở Công Thương n’gor Dak Lak an gĭt: nău găr mắc ca dơi tăch n’gluh tĭng trong me tât Hàn Quốc (bah kơi Nhật Bản) du tơ̆ tay đŏng pơk luh trong soih an găr kah khlay dja bah Dak Lak tât ăp dak châu Á n’hanh lam ntŭr neh.