Ôi lơ 13/12, UBND nkuăl Tu Mơ Rông, n’gor Kon Tum ntơm ƀư nau tăm 12 rbăn tơm sâm Ngọc Linh du năm tâm nâm neh bri. Rnoh tơm aơ yor Thủ tướng Chính phủ Phạm Minh Chính pă ân rnăk ach o bah nkuăl tâm rnôk hăn kan tâm nkual tâm khay 8/2023. Ntơm bah 12 rbăn tơm sâm Ngọc Linh ntil, Thủ tướng Chính phủ Phạm Minh Chính pă ân rnăk ach o, UBND nkuăl Tu Mơ Rông hŏ pă, kơl an 300 rnăk ach o tâm 23 thôn tâm 8 xã bah nkuăl. Tâm nê, xã Măng Ri geh rnoh rnăk ach o geh kơl tơm sâm Ngọc Linh âk ngăn, đah 135 rnăk, đê̆ ngăn lah xã Đăk Tờ Kan đah 10 rnăk.

Lor ma tăm sâm Ngọc Linh, Ntŭk ƀư nau kan tuch tăm nkuăl Tu Mơ Rông tâm rgop ma n’gâng kan xã ndrel rmôt kan ƀư ndâk rmôt tăm sâm, ntĭm, jao nau tăm, pă ntil, ndơ dŏng...ndrel uănh nau tăm bah ƀon lan tâm neh. Nkuăl Tu Mơ Rông kŏ ŭch tă bah mir sâm Ngọc Linh 12 rbăn tơm ma Thủ tướng Chính phủ Phạm Minh Chính pă, nau kan rnăk ach o tăm sâm Ngọc Linh mra rêng âk, lah nau nsôih gay ƀon lan nkuăl pơk hvi tay neh tăm tơm dak si khlay aơ./.