Tâm bah ri aơ nơh, nkuâl Lạc Dương, n’gor Lâm Đồng hŏ uănh khlay tăm rơ̆ jêng ăp ntil tơm tăm săk geh âk ta ntŭk, dŏng kỹ thuật tâm nău kan tuch tăm gay n’hao geh wăng sa. Ntơm nơh, tơm atiso dơn tăm nchah nchrai dơm ri aƀaơ, hŏ dơi tăm rgum ta du đêt ăp xã Đa Nhim, Đa Sar, Đa Chais, Lát. Lam nkuâl hŏ geh bơi 100 rnăk râng tâm ăp rêng kan tâm rgop tăm n’hanh tăch atiso, nsĭt tay nău geh wăng sa âk an ƀon lan nkual jru nkual ngai ta ntŭk.

Tâm bah ri aơ nơh, tât đah ăp xã nkual jru, nkual ngai Đạ Sar, Đa Nhim, nkuâl Lạc Dương, n’gor Lâm Đồng mbra măt saơ ăp mir atiso nđĭr uĕh lam jâng yôk bah kônh wa rnoi mpôl đê̆. Ăp rnăk ƀon lan ta aơ klaih rlău ach o bah tăm tơm dak si. yuh Liêng Jrang K’Sáu, thôn 6, xã Đạ Sar, nkuâl Lạc Dương an gĭt, ntơm nơh way bên đah nău tăm cà phê n’hanh ăp ntil biăp glêh nar, nsĭt geh wăng sa đăp mpăn. Dơi geh nău ntop kơl n’hanh ntrŭt nsôr bah n’gâng kan ta ntŭk, rnăk yuh hŏ râng rmôt tâm boh tăm tơm atiso n’hanh nănh rgâl rlău 3 sào neh tuch tăm rlong tăm lor. Dơi ntop kơl lam lĕ rngôch mpeh tơm ntil săk jêng uĕh, phân bón n’hanh kỹ thuật mât chăm, lôch 4 khay kơp ntơm bah jŭr ntil, yuh hŏ nsĭt geh rlău 10 rkeh prăk. Yuh Liêng Jrang K’Sáu an gĭt:

“Rêng tăm dŏng phân vi sinh, phân ăch ndrôk, mô dŏng phân ka poh tơm atiso. Tơm dja an tôch lha, gâm gay ngêt trà n’hanh ƀư dak si jêng mô puh dak si ndrŭng. Công ty nchih săk dak si puh lah ân tĭng ƀư”

Tâm bah ri aơ nơh, âk kônh wa rnoi mpôl đê̆ ta xã Đạ Sar, xã Đa Nhim, nkuâl Lạc Dương, n’gor Lâm Đồng hŏ klaih rlău ach o nơm geh tăm tơm atisô, tâm rgop kan na nê̆ đah doanh nghiệp. Kônh wa rgâl âk neh  tăm cà phê kro ranh, mô uĕh jêng tăm tơm atisô. Lôch 4 khay, tơm ntơm an tôch lha n’hanh dơi công ty ton rvăt lĕ rngôch. Ăp pơh, rmôt nuĭh kan kỹ thuật bah doanh nghiệp luh hăn tât mir ndrel kônh wa hăn ŭanh năl tơm, ntĭm nti kỹ thuật mât chăm. Nkre, kônh wa dơi ntop kơl phân poh, kỹ thuật mât chăm n’hanh tôch lha. Tât aƀaơ, lam nkuâl Lạc Dương hun hao 3 rêng tâm rgop kan tuch tăm nkre đah tăch ndơ geh ƀư tơm dak si atisô. Wa Sử Thanh Hoài, Bí thư Huyện ủy Lạc Dương an gĭt, ăp trong ntĭt leo tăm ta nkuâl rƀŏng tât ntĭm nti kônh wa trong râng tuch tăm da dê, tâm rgop kan nsum na nê̆ đah doanh nghiệp ton rvăt lĕ:

“Aƀaơ mpôl hên uănh năl nklăp 1.000 mét vuông tâm 1 năm, n’hâp lĕ prăk dŏng kan an kônh wa nha hôm nsĭt geh sa ntơm bah 25 tât 30 rkeh prăk. Aơ lah ntil tơm dŭt tâm di đah trôk nar, neh ntu, tuch tăm bah kônh wa aƀaơ, mpôl hên dôl nchră trong pơk hvi tay. He mbra dơi lah kơt nê ri ân nkra dơi dŭt âk nău kan an nuĭh ƀon lan. Doanh nghiệp mât uănh rêng kan tuch tăm n’hanh ton rvăt ndơ geh ƀư. Nê lah du trong hăn ma nkuâl Lạc Dương hŏ njuăl tât gay đăp mpăn săk geh nău rêh an nuĭh ƀon lan n’hanh nuĭh rvăt dŏng”.

          Ndrel đah nău dŏng rêng tăm tĭng di rnoh ri nău tâm rgop  kan tuch tăm nar lơn ma dơi pơk hvi gay đăp mpăn trong tăch luh an nuĭh tăm tâm ban kơt săk geh trong tăch luh an ăp doanh nghiệp nkret njêng dŭt khlay đŏng. Wa Hoàng Sỹ Bích, Giám đốc Sở Nông nghiệp n’hanh Phát triển Nông thôn n’gor Lâm Đồng an gĭt, trong nkra tơm ntơm bah aơ tât năm 2030 lah rgum nkre tuch tăm đah tăch rvăt an tơm atiso lah êng n’hanh ăp ntil tơm dak si săk geh ta n’gor lah nsum. Rgum dŏng công nghệ têh uĕh mhe tâm gŭ mĭn sơch yơng ntil n’hanh kỹ thuật tăm, mât chăm an săk geh, kah uĕh tâm nău kan tuch tăm, nkret njêng, gay njêng luh ăp ndơ geh ƀư dak si tâm rlong ta ntŭk tăch rgâl. Nkre, ntrôl dŏng âk công nghệ thông tin tâm pah kan mât uănh, ƀĭt juet bah rêng tăm tât nkret njêng, dŏng ăp ndơ geh ƀư bah tơm dak si; ntop kơl đăng ký săk ntơ lư, ntô lĭr, mã mbrô nkual tăm, nkret njêng n’hanh tăch ndơ geh ƀư bah tơm dak si, đăp mpăn ăp rnoh di bah neh dak, dak bah dih ta ntŭk tăch rgâl tâm dak n’hanh tăch n’gluh:

          “Rlău ma nău nkoch n’hơ dja, hôm mât dŏng ri pah kan an ƀư mât uănh săk kah ndơ geh ƀư êng dơi uănh khlay đŏng. Ndrĭ jêng mpôl hên geh du trong nchrăp bah n’gâng kan tuch tăm n’hanh hun hao ƀon lan gay an ƀư nău mât uănh săk kah uĕh ndơ geh ƀư tuch tăm tâm rnôk rdâk njêng, hun hao n’hanh mât njrăng săk ntơ lư.”

          Ngăn ta âk nkuâl an saơ, rnoh khlay wăng sa nsĭt tay bah nău tăm tơm dak si âk rlău rđĭl đah ăp ntil tơm tăm êng ƀa ƀă. Ta âk xã, tơm dak si atiso mô dơn jêng tơm tăm jut jăng ji ngot, n’hŭch ach o ma hôm dôl kơl âk rnăk ta Lâm Đồng nsĭt geh wăng sa mbơm oi n’hanh nsan hao ƀư geh ndrŏng./.