ꪩꪱꪫ ꪀꪱꪥ: ꪭꪒꪰ ꪁꪒꪰ ꪋꪳ ꪡꪮꪉ ꪵꪣꪉ ꫃ꪛꪉ ꪘꪉꪰ ꪝꪉꪳ ꫄ꪀ ꫄ꪎ ꪄꪱꪣ ꪤꪱ ꫃ꪛꪉ

ꪘꪉꪰ ꪹꪭꪙ ꪤꪱ ꪎꪱꪙ - ꪑꪲ ꪔꪉꪸ ꪩꪱꪫ ꪀꪱꪥ ꪘꪱ ꪫꪀꪸ ꪋꪳ ꪡꪮꪉ ꪵꪣꪉ ꫃ꪛꪉ ꪼꪒ ꫄ꪊꪚ ꪙꪣꪾ ꪢꪽ ꪁꪒꪰ ꪘꪉꪽ ꪀꪱ 18 ꪅꪪꪱ ꪡꪮꪉ. ꪀꪚꪾ ꪹꪭꪙ ꪤꪱ ꪩꪺꪉ ꪕꪒꪰ ꪜꪙꪴ ꪀꪣꪸ ꪎꪫꪱꪒ ꪵꪣꪉ ꫃ꪛꪉ ꪘꪉꪰ ꪅꪫꪱ ꫄ꪏ ꪏꪉꪲ ꫄ꪩꪉ ꪑꪽ ꪝꪱꪫ ꪵꪘꪙ ꪘꪱ ꪢꪽ ꪁꪒ ꫄ꪐꪒ, ꪹꪝ ꪨꪱꪙ ꪙꪮꪥ ꪬꪉꪲ ꪮꪮꪀ ꪻꪢ ꪑꪉꪰ ꪮꪮꪙ, ꪩꪣꪾ ꪣꪰ ꫃ꪭ ꪣꪲ ꪵꪭꪉ ꪁꪣꪾ ꪔꪰ ꪵꪣꪉ ꫃ꪛꪉ. ꪹꪝ ꪹꪏꪉ ꪙꪽ, ꪚꪮꪙ ꪙꪲ ꫄ꪩꪉ ꪼꪒ ꪄꪱ ꪵꪣꪉ ꫃ꪛꪉ, ꫃ꪕꪉ ꫃ꪢꪒ ꪙꪣꪾ ꪵꪝꪀ ꪂꪴ ꪁꪰ ꪼꪒ ꪀꪱꪥ ꪼꪢ ꪖꪮꪉ R.O ꪊꪮꪙ ꫄ꪋ ꪹꪮꪱ ꪹꪄꪱ ꪎꪴ. ꪚꪱꪀ ꪎꪲ ꪶꪬ ꪁꪣꪲ ꪗꪫꪱ, ꪠꪰ ꪤꪱꪣ ꪶꪒꪀ ꪹꪭꪙ ꪤꪱ ꪎꪱꪙ - ꪑꪲ ꪔꪉꪲ ꪩꪱꪫ ꪊꪱꪥ ꪫꪱ:ꪘꪱ ꪫꪀꪸ ꪀꪣꪸ ꪎꪫꪱꪒ ꪵꪣꪉ ꫃ꪛꪉ ꪘꪉꪰ ꪅꪫꪱ ꪨꪱꪙ ꪙꪮꪥ ꪮꪮꪀ ꪻꪢ ꪶꪀꪀ ꪵꪅꪫꪀ ꪨꪰ ꪻꪬ ꪝꪉꪳ ꫛ ꪣꪲ ꪵꪣꪉ ꫃ꪛꪉ ꪵꪜꪒ ꪝꪱꪙ ꪤꪴ ꪤꪉꪸ. ꪋꪴ ꪹꪋꪉ ꪄꪮꪉ ꪹꪋꪉ ꪎꪴ ꪻꪬ ꪨꪱꪙ ꪙꪮꪥ ꪹꪚꪱ ꪻꪬ ꪣꪲ ꪵꪣꪉ ꫃ꪛꪉ. ꪀꪱꪙ ꪶꪛ ꪯꪲ ꫃ꪔ ꪢꪮꪥ ꪹꪕ ꪹꪄꪱ ꪹꪣ ꪩꪣꪾ ꪒꪴ ꪨꪱꪙ ꪙꪮꪥ ꪼꪒ ꫄ꪊꪚ ꪙꪣꪾ ꪕꪀꪴ ꪝꪰ 5 ꪥꪱꪙ ꪎꪴ ꪤꪱ ꪄꪱ ꪵꪣꪉ ꫃ꪛꪉ ꪫꪽ, ꪀꪱꪙ ꪶꪛ ꪻꪒ ꪣꪲ ꫃ꪛꪉ ꪵꪜꪒ ꪝꪱꪙ ꪨꪰ ꪻꪬ ꪥꪉꪰ ꪫꪀꪸ ꪹꪚꪱ ꪻꪬ ꪵꪜꪒ ꪝꪱꪙ ꪼꪎ ꫛ ꪮꪙꪳ.

          ꪵꪩꪫ ꪘꪉꪰ ꪹꪭꪙ ꪤꪱ ꪒꪱ ꪅꪫꪱ ꪔꪉꪲ ꪩꪱꪫ ꪀꪱꪥ, ꪜꪮꪣ ꪀꪚꪾ ꪫꪀꪸ ꫄ꪅꪉ ꪕꪀꪴ ꪝꪷ ꪠꪴ ꫛ, ꪹꪋꪉ ꪄꪮꪉ ꪐꪽ ꪝꪱꪫ ꪩꪱꪉ ꪮꪱꪫ ꪀꪣꪸ ꪎꪫꪱꪒ ꪁꪰ ꪹꪏꪉ ꫃ꪥꪒ ꪵꪝ ꪻꪎ, ꪚꪱ ꪤ ꪱꪄꪱ ꪵꪣꪉ ꫃ꪛꪉ, ꪕꪮꪚ ꪬꪮꪣ, ꪕꪮꪙ ꪣꪙꪸ ꪐꪉꪲ ꪹꪐ...ꪹꪭꪙ ꪤꪱ ꪑꪉꪰ ꪵꪔꪉ ꪮꪮꪀ ꪤꪉꪸ ꪅꪫꪱ ꫜ ꪀꪣꪸ ꪎꪋꪱꪒ ꪵꪣꪉ ꫃ꪛꪉ ꪼꪫ ꪩꪣꪾ ꪵꪩ ꫄ꪊꪚ ꪙꪾ ꪘꪱ ꪫꪀꪸ ꪤꪉꪸ. ꪀꪚꪾ 500 ꪹꪥꪉ ꪙꪮꪙ ꪻꪬ ꫛ ꫃ꪛꪉ ꪵꪀꪉ ꪨꪰ ꪹꪭꪙ ꪤꪱ ꪔꪫꪙꪸ ꪔꪉꪲ, ꪹꪏꪉ ꪙꪽ ꪶꪎ ꫛ ꫃ꪊꪚ ꪣꪱ ꪙꪮꪙ ꪹꪭꪙ ꪤꪱ ꫄ꪩꪉ ꪨꪱꪥ, ꪹꪝ ꪘꪱ ꪫꪀꪸ ꪋꪳ ꪡꪮꪉ ꪵꪣꪉ ꫃ꪛꪉ ꫄ꪩꪉ ꪼꪒ ꪹꪭꪙ ꪤꪱ ꪑꪮꪉ ꪑꪰ ꪶꪀꪀ ꪵꪅꪫꪀ. ꪚꪱꪀ ꪎꪲ ꪡꪱꪣ ꪮꪱꪙ ꪬꪉꪴ, ꪤꪱꪣ ꪶꪒꪀ ꪹꪭꪙ ꪤꪱ ꪒꪱ ꪅꪫꪱ ꪔꪉꪲ ꪩꪱꪫ ꪀꪱꪥ ꪻꪬ ꪭꪴ:

          ꪎꪣꪴ ꪄꪮꪥ ꪁꪰ ꪮꪺꪙ ꪝꪱ ꪅꪫꪱ ꪐꪣꪸ ꪄꪮꪉ ꪹꪭꪙ ꪤꪱ ꫄ꪊꪚ ꪙꪾ ꪵꪣꪙ ꪕꪮꪥ ꪕꪒꪰ ꪜꪙꪴ ꪄꪮꪉ ꪶꪛ ꪯꪲ ꫃ꪔ ꪢꪱ ꪔꪱꪉ ꪘꪱ ꪫꪀꪸ ꪀꪣꪸ ꪎꪫꪱꪒ ꪵꪣꪉ ꫃ꪛꪉ. ꪊꪣꪴ ꪢꪴ ꪀꪱꪙ ꪶꪛ ꪯꪲ ꫃ꪔ ꪄꪮꪉ ꪅꪫꪱ ꪼꪒ ꪋꪙꪸ ꪀꪱꪥ ꪵꪮꪚ ꪭꪮꪀ ꪣꪲ ꪙꪱꪉ ꪣꪲ ꪩꪺꪉ ꪝꪮꪣ ꪀꪚꪾ ꪝꪉꪳ ꪹꪋꪉ ꪄꪮꪉ ꪝꪮꪣ ꪝꪚꪾ, ꪕꪀꪴ ꪝꪰ ꪭꪳ ꪁꪰ ꪁꪒꪳ ꪔꪮꪚ ꪼꪒ ꪩꪱꪉ ꪮꪱꪫ ꪣꪱ ꪕꪱꪉ ꪀꪣꪸ ꪎꪫꪱꪒ ꪵꪣꪉ ꫃ꪛꪉ ꪘꪉꪰ ꪹꪭꪙ ꪤꪱ, ꪶꪭꪣ ꫄ꪡꪙ ꪑꪽ ꪎꪉꪴ ꪩꪱꪉ ꪒꪲ ꪄꪱꪣ ꪤꪱ ꫃ꪛꪉ.

          ꪔꪉꪲ ꪩꪱꪫ ꪀꪱꪥ ꪼꪅ ꪣꪲ 14 ꪹꪭꪙ ꪤꪱ ꪄꪮꪉ ꪹꪭꪙ ꪹꪘꪀ, ꪹꪭꪙ ꪤꪱ ꪚꪮꪣ ꪤꪉꪸ, 32 ꪬꪮꪉ ꪄꪱꪣ ꪒꪱ ꪅꪫꪱ ꪀꪺꪉ ꪶꪠꪉ ꪵꪀꪉ 164 ꪋꪱꪣ ꪯꪲ ꫃ꪔ. ꪭꪮꪒ ꪼꪅ , ꪫꪀꪸ ꪀꪣꪸ ꪎꪫꪱꪒꪵꪫꪣꪉ ꫃ꪛꪉ ꪁꪰ ꪼꪒ ꪵꪈꪉ ꪯꪲ ꫃ꪔ ꪔꪉꪲ ꫄ꪊꪚ ꪙꪾ ꪝꪮꪚ ꪜꪚꪾ ꪀꪚꪾ ꪩꪺꪉ ꪜꪙꪴ ꪢꪽ ꪁꪒꪰ ꪘꪉꪰ ꪋꪴ ꫄ꪀ ꫄ꪎ. ꪝꪉꪳ ꫄ꪨꪚ ꫄ꪕꪚ ꪬꪺꪙ, ꪜꪱꪉ ꪬꪮꪚ ꪋꪫꪙꪸ ꫃ꪒ ꪣꪱ ꪕꪱꪉ ꪋꪳ ꪡꪮꪉ ꪵꪣꪉ ꫃ꪛꪉ ꪁꪰ ꪼꪒ ꫄ꪊꪚ ꪙꪾ ꪼꪫ ꪑꪰ ꪎꪉꪴ ꪩꪺꪉ ꪭꪴ ꪏꪉꪸ  ꪻꪬ ꪀꪱꪙ ꪶꪛ ꪯꪲ ꫃ꪔ ꪚꪱꪙ ꪀꪺꪉ ꪀꪱ ꪔꪉꪲ. ꪎꪮꪉ ꪣꪱ, ꫄ꪎ ꪔꪒꪲ ꫄ꪔꪙ ꪝꪉꪳ ꫄ꪀ ꫄ꪎ ꪯꪲ ꫃ꪔ ꫄ꪁꪙ ꫄ꪅꪉ ꪋꪙꪸ ꪝꪱꪫ ꪻꪬ ꪊꪉꪲ ꫛ ꫃ꪛꪉ ꪵꪀꪉ ꪼꪕ ꪹꪭꪙ ꫛ ꫃ꪛꪉ ꪼꪫ ꫄ꪅꪉ ꪋꪳ ꪡꪮꪉ ꫃ꪫꪙ ꪘꪀꪲ ꪎꪸ ꪵꪣꪉ ꫃ꪛꪉ ꪼꪈ ꪀꪺꪉ ꪥꪱꪙ ꪄꪱꪣ ꪵꪀꪉ ꪹꪤꪱ ꪤꪱ.

                                                          ꪯꪱꪙ ꪁꪙꪸ - ꪵꪭꪉ ꪥꪀꪲ

Lao Cài: Hặt cặt chự phong manh bệnh nẳng pưng

 cơ sở khám dà bệnh

          Nẳng hươn dà Sản - Nhi tỉnh Lao Cài, nả vịa chự phong manh bệnh đảy chấp năm mẳn cặt nẳng cá 18 khoa, phòng. Cắp hươn dà luông tặt pun kiểm soát manh bệnh nẳng khoa sơ sinh lâng nhẳn pao nẻn nà mẳn cặt nhất, pưa lan nọi hính ók máư nhăng ón, lăm mo hê mả nháư. Pưa xương nặn, bón nị lâng đảy khả manh bệnh, tênh mết nặm pẹk xủ cọ đảy cài máy thong R.O cón chơ àu khảu xủ. Bác sỹ Hồ Thị Kim Hoa, Phó Giám đốc Bệnh viện Sản - Nhi tỉnh Lao Cai va: nả vịa kiểm soát manh bệnh nẳng khoa sơ sinh cốc khoẹ lỏ hảu pưng côn bệnh mi manh bệnh pét pan dú riêng. Chu chương khong, chương xủ hảu lan nọi báu hảu mi mạnh bệnh. Cán bộ y tế mỏi tưa khảu mưa lăm đu lan nọi đảy chấp năm tục po 5 dan xủ dà khả manh bệnh văn, cán bộ đàư pên bệnh pét pan chi hảu dặng báu hảu pét pan sáư côn ứn.

          Lẹo nẳng hươn dà Đa khoa tỉnh Lao Cài, pọm cắp vịa khâng tục po phủ côn, chương khòng nhẳn pao lang áo kiểm soát cọ xương vịa dệt pẹk sàư, bao dà khả manh bệnh, tọp hòm, tọn miện nhính nhửa...hươn dà nhăng tánh ók riêng Khoa nưng kiểm soát manh bệnh vạy lăm le, chấp năm nả vịa riêng. Cắp 500 giương non hảu côn bệnh cánh lỏ hươn dà tuyến tỉnh, xương nặn số côn chếp ma dú hươn dà lâng lài, pưa nả vịa chự phong manh bệnh lâng đảy hươn dà nhọng nho cốc khọe. Bác sỹ Phạm An Hùng, Giám đốc hươn dà Đa khoa tỉnh Lao Cài hảu hụ: Xum khỏi cọ uôn pa Khoa Nhiễm khuẩn khong hươn dà chấp năm men toi tặt pun khong Bộ Y tế ma tang nả vịa kiểm soát manh bệnh. Chủm mú cán bộ y tế khong khoa đảy chiên cái ép học mi nang mi luông pọm cắp pưng chương khong pọm pặp, tục po hư cọ cựt tóp đảy lang áo ma tang kiểm soát manh bệnh nẳng hươn dà, hôm phân nho xùng lang đi khám dà bệnh.

          Tỉnh Lao Cài khay mi 14 hươn dà khong hươn nước, hươn dà bóm riêng, 32 hỏng khánh đa khoa cuông phổng cánh 164 trạm y tế. Họt khạy, vịa kiểm soát manh bệnh cọ đảy ngành y tế tỉnh chấp năm pọm pặp cắp luông pun mẳn cặt nẳng chu cơ sở. Pưng lớp tập huấn, pang họp chuyên đề ma tang chự phong manh bệnh cọ đảy chấp năm lâng chơ vạy nho xùng luông hụ xiêng hảu cán bộ y tế bản cuông cá tỉnh. Xong ma, Sở cọ tít tơn pưng cơ sở y tế cận khâng chiên páo hảu chính côn bệnh cánh tay hươn côn bệnh vạy khâng chự phong vện ník xia manh bệnh ngay cuông dan khám cánh dàu dà./.

                                                                   An Kiên - Hạnh dịch