Khù hiểm hại khòng vịa kìn nhứa tồ chuốp thứk dà sàng nù,

dà pảy chự cò púk bồng

          Nẳng chợ lạt khạy nị côn khài nhứa mà cọ áo lài. Pưng hươn hang, quán kìn khài nhứa mà cọ lài khửn. Pưa ăn nị lỏ tàng căm kìn đảy lài côn mặc kìn xương nặn pưng hươn quán cọ hền ók lài.

          Ăn nị lỏ tàng tồ báu chư hịa liệng vạy àu nhứa, xương nặn lài côn pưa khù lợi đì tó nả cọ lặc mà ma khài. Luông dệt nưng khòng pưng côn lặc mà ặn lỏ àu chương kìn xắư dà sàng nù hẳư mà kìn vạy báu hẳư mà họng.

          Côn pày lặc mà lâng àu căm kìn qua  xắư dà khả bổng, dà sàng nù vạy hẳư mà kìn. Pưng tồ mà kìn thứk dà sàng nù cọ đảy khả khài hẳư pưng quán kìn cánh hươn hang. Côn xự cọ báu xương đằư hụ đảy nhứa mà đằư lỏ chuốp kìn thứk dà sàng nù. Pưng tàng nhứa nị đảy dệt ók lài tàng căm kìn chẹp cuồng pưng quán kìn.

          Vịa kìn thứk nhứa mà chuốp kìn dà sàng nù cọ hiểm hại hẳư côn xủ, Pưa cuồng nhứa mà nhăng mi chất độc, chất độc nị chí hòm dú cuồng lăm mo dệt ók san tàng bệnh hiểm hại xương chếp tắp, chếp mák sáy lằng…

          Toi bác sĩ Lương Lễ Hoàng, côn kìn nhứa mà chuốp thứk dà sàng nù cọ hiểm hại lài, côn kìn cọ chí chuốp bứa mau, mi xương chí chuốp pét pan pưng tàng bệnh chếp pùm tháo tọng chơ kìn nhứa. Nọk tồ mà chuốp thứk dà sàng nù mi xương dệt hiểm hại hẳư côn kìn san tồ tảnh liệng ứn kìn thứk dà sàng nù xương tồ cáy, tồ pết… chuốp tài va côn xủ xlài khả kìn nhứa cọ mi xương chí chuốp bứa mau cánh chếp pùm pày tọng.

          Pưa xương nặn, va pi nọng ék xự nhẳm nhứa ma kìn pền xự nẳng pưng bón chảu tin chưa. Chơ dệt đảy tổm xúc. Va hướng ngơ tồ mà, tồ cáy kìn thứk dà sàng nù lỏ pày phằng xìa báu pền khả kìn nhứa, pưa măn mi hại họt pặc hanh./.

                      Thu Thuỳ ST-Huyền dịch

ꪄꪴ ꪬꪣꪸ ꪭꪱꪥ ꪄꪮꪉ ꪫꪀꪸ ꪀꪙꪲ ꪹꪐ ꪶꪔ ꪵꪔꪉ ꪩꪉꪸ ꪀꪙꪲ ꪖꪀꪳ ꪤꪱ ꪎꪱꪉ ꪘꪴ ,ꪤꪱ ꪼꪜ ꪋꪴ ꪀꪷ ꪜꪀꪴ ꪶꪚꪉ

          ꪘꪉꪰ ꫄ꪋ ꪩꪱꪒ ꪼꪅ ꪙꪲ ꫛ ꪄꪱꪥ ꪹꪐ ꪢꪱ ꪁꪷ ꪮꪱꪫ ꪨꪱꪥ. ꪝꪉꪳ ꪹꪭꪙ ꪭꪱꪉ ,ꪀꪫꪱꪙ ꪀꪙꪲ ꪄꪱꪥ ꪹꪐ ꪢꪱ ꪁꪷ ꪨꪱꪥ ꪄꪙꪳ .ꪹꪝ ꪮꪽ ꪙꪲ ꪨꪷ ꪔꪱꪉ ꪁꪣꪾ ꪀꪙꪲ ꪼꪒ ꪨꪱꪥ ꫛ ꪣꪀꪰ ꪀꪙꪲ.

          ꪶꪔ ꪢꪱ ꪨꪷ ꪔꪱꪉ ꪶꪔ ꪹꪚꪱ ꪋꪳ ꪭꪀꪸ ꪩꪉꪸ ꪼꪫ ꪹꪮꪱ ꪹꪐ ꪹꪏꪉ ꪙꪽ ꪨꪱꪥ ꫛ ꪹꪝ ꪄꪴ ꫄ꪩꪥ ꪒꪲ ꪔꪷ ꪘꪱ ꪁꪷ ꪩꪀꪰ ꪢꪱ ꪣꪱ ꪄꪱꪥ .ꪩꪺꪉ ꫃ꪥꪒ ꫜ ꪄꪮꪉ ꪝꪉꪳ ꫛ ꪩꪀꪰ ꪢꪱ ꫄ꪩꪉ ꫃ꪥꪒ ꪯꪽ ꪨꪷ ꪹꪮꪱ ꪤꪱ ꪎꪱꪈ ꪘꪴ ꪣꪱ ꪁꪫꪱ ꪻꪎ ꪹꪋꪉ ꪀꪙꪲ ꪻꪬ ꪢꪱ ꪀꪙꪲ ꪼꪫ ꪶꪔ ꪢꪱ ꪹꪚꪱ ꪭꪮꪉ ꪼꪒ.

          ꪝꪉꪳ ꪶꪔ ꪢꪱ ꪀꪙꪲ ꪖꪀꪳ ꪤꪱ ꪎꪱꪉ ꪘꪴ ꪁꪷ ꪼꪒ ꪄꪱ ꪄꪱꪥ ꪻꪬ ꪀꪫꪱꪙ ꪀꪙꪲ ꪵꪀꪉ ꪹꪭꪙ ꪭꪱꪉ. ꫛ ꪏꪳ ꪁꪷ ꪹꪚꪱ ꪹꪏꪉ ꪻꪒ ꪭꪴ ꪼꪒ ꪹꪐ ꪢꪱ ꪻꪒ ꪨꪷ ꪋꪺꪚ ꪀꪙꪲ ꪖꪀꪳ ꪤꪱ ꪎꪱꪉ ꪘꪴ. ꪝꪉꪳ ꪔꪱꪈ ꪹꪐ ꪙꪲ ꪼꪒ ꫃ꪥꪒ ꪮꪮꪀ ꪨꪱꪥ ꪔꪱꪉ ꪁꪣꪾ ꪀꪙꪲ ꪵꪋꪚ ꪀꪺꪉ ꪝꪉꪳ ꪀꪫꪱꪙ ꪀꪙꪲ.

          ꪫꪀꪸ ꪀꪙꪲ ꪹꪐ ꪢꪱ ꪊꪺꪚ ꪀꪙꪲ ꪤꪱ ꪎꪱꪉ ꪢꪴ ꪁꪷ ꪬꪣꪸ ꪬꪱꪥ ꪻꪬ ꫛ ꪎꪴ ,ꪹꪝ ꪀꪺꪉ ꪹꪐ ꪢꪱ ꪑꪉꪰ ꪣꪲ ꫄ꪊꪒ ꪶꪒꪀ ,꫄ꪊꪒ ꪶꪒꪀ ꪙꪲ ꪋꪲ ꪬꪮꪣ ꪤꪴ ꪀꪺꪉ ꪩꪣꪾ ꪣꪷ ꫃ꪥꪒ ꪮꪮꪀ ꪏꪱꪙ ꪔꪱꪉ ꫃ꪛꪉ ꪬꪣꪸ ꪭꪱꪥ ꪹꪏꪉ ꫃ꪊꪚ ꪔꪚꪾ ,꫃ꪊꪚ ꪢꪱꪀ ꪼꪎ ꪨꪉꪰ.

          ꪕꪮꪥ ꪚꪱꪀ ꪎꪲ ꪹꪩꪉ ꫃ꪨ ꪭꪫꪱꪉ ꫛ ꪀꪙꪲ ꪵꪐ ꪢꪱ ꪊꪺꪚ ꪖꪀꪳ ꪤꪱ ꪎꪱꪉ ꪘ  ꪁꪷ ꪬꪣꪲꪸ ꪭꪱꪥ ꪨꪱꪥ ,ꫛ ꪀꪙꪲ ꪊꪺꪚ ꪹꪚ ꪹꪣꪱ ꪣꪲ ꪹꪏꪉ ꪋꪲ ꪊꪺꪚ ꪵꪜꪒ ꪝꪱꪙ ꪝꪉꪳ ꪔꪱꪉ ꫃ꪛꪉ ꫃ꪊꪚ ꪜꪣꪴ ꪖꪱꪫ ꪕꪮꪉ ꫄ꪊ ꪀꪙꪲ ꪹꪐ .ꪙꪮꪀ ꪶꪔ ꪢꪱ ꪊꪺꪚ ꪖꪳꪀ ꪤꪱ ꪎꪱꪉ ꪘꪴ ꫃ꪥꪒ ꪬꪣꪸ ꪭꪱꪥ ꪻꪬ ꫛ ꪀꪙꪲ ꪏꪱꪙ ꪶꪔ ꪵꪔꪉ ꪩꪉꪸ ꪮꪙꪳ ꪀꪙꪲ ꪖꪀꪳ ꪤꪱ ꪎꪱꪉ ꪘꪴ ꪹꪏꪉ ꪶꪔ ꪼꪀ ꪶꪔ ꫃ꪜꪒ ꪊꪺꪚ ꪔꪱꪥ ꪫꪱ ꫛ ꪎꪴ ꪎꪱ ꪨꪱꪥ ꪄꪱ ꪀꪙꪲ ꪹꪐ ꪁꪷ ꪣꪲ ꪹꪏꪉ ꪋꪲ ꪶꪊꪚ ꪹꪚ ꪹꪣꪱ ꪵꪀꪉ ꫃ꪊꪚ ꪜꪉꪴ ꪖꪱꪫ ꪕꪮꪉ.

          ꪹꪝ ꪹꪏꪉ ꪙꪽ ꪫꪱ ꪝꪲ ꪙꪮꪉ ꪵꪮ ꪏꪳ ꪐꪣꪾ ꪹꪐ ꪣꪱ ꪀꪙꪲ ꫃ꪜꪙ ꪏꪴ ꪘꪉꪰ ꪝꪉꪳ ꪚꪮꪙ ꪕꪙꪲ ꪹꪋ .꫄ꪋ ꫃ꪤꪒ ꪀꪙꪲ ꪼꪒ ꪶꪔꪣ ꪎꪀꪴ ꪒꪲ ꪋꪽ .ꪫꪱ ꪹꪬꪉ ꫄ꪉ ꪶꪔ ꪢꪱ ꪶꪔ ꪼꪀ ꪀꪙꪲ ꪖꪀꪳ ꪤꪱ ꪎꪱꪉ ꪘꪴ ꪨꪷ ꪼꪜ ꪠꪉꪰ ꪎꪸ ꪹꪚꪱ ꫃ꪜꪙ ꪄꪱ ꪀꪙꪲ ꪹꪐ ꪹꪝ ꪢꪽ ꪣꪲ ꪭꪱꪥ ꪬꪮꪒ ꪝꪀꪰ ꪵꪭꪉ.

ꪬꪫꪙꪸ ꪥꪀꪲ