Báu vạy pền chua hươn cặt lằng chu chếp hại sảy nào nưng

          Khảu hươn dà Bạch Mai mự 7/5 chọm cài ma pưa chếp phúc mạc pộ pền chếp sảy xưa, họt khạy, côn chếp Trần Ngô Bạch Châu, 20 pì, dú xã Vạn Hưng, huyện Vạn Ninh, tỉnh Khánh Hoà đảy pát dà 2 tưa, danh đù đảy khừn dáo 800 triệu mằn ngơn pát dà pưa báu mi thẻ bảo hiểm y tế. Khù đáng pồng chằư ặn lỏ tay hươn côn chếp Trần Ngô Bạch Châu mi 5 côn pọm báu mi thẻ bảo hiểm y tế.

          Cựt pền chua hươn cặt lằng chu chếp hại sảy nào pưa báu chôm hặp bảo hiểm y tế lỏ khù đáng va khòng lài côn chếp cánh dệt hẳư tay hươn côn chếp pọ lài dạk cha, lẹo pưng y , bác sĩ cọ chau lò đảy thót ngơn quỹ ók báu cọ xáo hà chu luông choi dừa côn chếp.

          Khạy nị, mi dáo 20% dần số hê chôm hặp bảo hiểm y tế, tư va dáo 20 triệu côn hê mi thẻ bảo hiểm y tế. Cuồng nặn phân lài lỏ pưng côn dệt hay, dệt na, côn cạ khài lệch nọi, côn mi thù nhập tắm.

          Té mự 1/6 chí họt, cài 1.900 dịch vụ y tế chí khửn ca đối cắp pưng côn báu mi thẻ bảo hiểm y tế. Phân lài pưng dịch vụ lưn té 20 họt 50%, mi pưng dịch vụ lưn cộp té 2 họt 3 tưa, chí lỏ háp nắc hẳư pưng côn báu mi bảo hiểm y tế, lưn xưa lỏ pưng côn cặt cung-chơ chếp nắc. Lung Phan Văn Toàn, Phó vụ trưởng Vụ bảo hiểm y tế, Bộ y tế hẳư hụ: Pì 2016 ca dịch vụ y tế lưn khửn cọ đảy chấp năm đối cắp pưng côn mi thẻ bảo hiểm y tế cánh va tưa nị chí chấp năm đối cắp côn hê mi thẻ bảo hiểm vạy nhẳn pao châng piêng.

          Hák va, khạy nị, mi chơ, mi bón côn dần nhăng pọ lài dạk cha chơ pày xự thẻ bảo hiểm y tế xương: Dệt chỉa lai pọ dạk cha, đảy thả hâng. Mi san bón đảy pồng quyên dệt thẻ nẳng xã phường cuồng dan dệt chỉa lai cọ dệt lồng pưng nang quam nẳng thẻ bảo hiểm y tế, dệt hẳư côn xự báu xủ đảy cánh đảy pày họt cơ quàn bảo hiểm xã hội xò vay pành lau. Cọ mi bón thả tọp hòm đảy lài hồ sơ chắng pày dệt chỉa lai cắp cơ quàn bảo hiểm xã hội, dệt ốt nan hẳư côn chôm hặp bảo hiểm y tế… ăn nị lỏ pưng khù nhăng khắt khỏng dạk cha cận đảy Bảo hiểm xã Hội Việt nàm kẻ khày vạy côn dần mi xương xự thẻ bảo hiểm đảy ngai đì cánh nhẳn pao chấp năm tênh lài dần mương pọm chôm hặp bảo hiểm y tế cuồng pì 2020./.

TTT-Huyền dịch

ꪹꪚꪱ ꪼꪫ ꫃ꪜꪙ ꪋꪺ ꪹꪭꪙ ꪁꪒꪰ ꪨꪉꪰ ꪋꪴ ꫜ ꫃ꪊꪚ ꪭꪱꪥ ꪼꪎ ꪘꪱꪫ

ꪹꪄꪱ ꪹꪭꪙ ꪤꪱ ꪵꪛꪀ ꪢꪱꪥ ꪣꪳ 7ꪁꪣꪾ ꪹꪚꪙ 5 ꪋꪮꪣ ꪀꪱꪥ ꪣꪱ ꪹꪝ ꫃ꪊꪚ ꪠꪴꪀ ꪣꪱꪀ ꪶꪝ ꫃ꪜꪙ ꫃ꪊꪚ ꪼꪎ ꪹꪏ ,ꪭꪮꪒ ꪼꪅ ꫛ ꫃ꪊꪚ ꫄ꪊꪙ ꪶꪉ ꪵꪛꪀ ꪹꪊꪱ 20 ꪜꪲ, ꪤꪴ ꪎꪱ ꪫꪱꪙ ꪭꪉꪳ, ꪭꪫꪙꪸ ꪫꪱꪙ ꪙꪲꪉ ,ꪔꪉꪲ ꪵꪄꪉ ꪬꪫꪱ ꪼꪒ ꪜꪱꪒ ꪤꪱ 2 ꪹꪕ ,ꪵꪥꪉ ꪒꪴ ꪋꪲ ꪼꪒ ꪄꪙꪳ ꪤꪱꪫ 800 ꪋꪫꪸ ꪢꪽ ꫄ꪉꪙ ꪜꪱꪒ ꪹꪤꪱ ꪤꪱ ꪹꪝ ꪹꪚꪱ ꪣꪲ ꪵꪖ ꪚꪱꪫ ꪬꪣꪸ ꪮꪲ ꫃ꪔ. ꪄꪴ ꪒꪱꪉ ꪶꪜꪉ ꪻꪊ ꪯꪽ ꪨꪷ ꪼꪕ ꪹꪭꪙ ꫛ ꫃ꪊꪚ ꪄꪮꪉ ꪵꪛꪀ ꪹꪊꪱ ꪣꪲ 5 ꫛ ꪝꪮꪣ ꪹꪚꪱ ꪣꪲ ꪵꪖ ꪚꪱꪫ ꪬꪣꪸ ꪮꪲ ꫃ꪔ.

ꪁꪒꪳ ꫃ꪜꪙ ꪋꪺ ꪹꪭꪙ ꪁꪒꪰ ꪨꪉꪰ ꪋꪴ ꫜ ꫃ꪊꪚ ꪭꪱꪥ ꪼꪎ ꪘꪱꪫ ꪹꪝ ꪹꪚꪱ ꪶꪋꪣ ꪭꪚꪾ ꪚꪱꪫ ꪬꪣꪸ ꪮꪲ ꫃ꪔ ꪀꪷ ꪄꪴ ꪒꪱꪉ ꪶꪜꪉ ꪻꪊ ꪄꪮꪉ ꪨꪱꪥ ꫛ ꫃ꪊꪚ ꪵꪀꪉ ꫃ꪥꪒ ꪼꪬ ꪼꪕ ꪹꪭꪙ ꫛ ꫃ꪊꪚ ꪝꪷ ꪨꪱꪥ ꪤꪱꪀ ꪋꪱ, ꪵꪩꪫ ꪝꪉꪳ ꪮꪲ ꪚꪱꪀ ꪎꪲ ꪁꪷ ꪹꪋꪱ ꪨꪷ ꪼꪒ ꪖꪮꪒ ꫄ꪉꪙ ꪀꪫꪲ ꪮꪮꪀ ꪹꪚꪱ ꪁꪷ ꪎꪱꪫ ꪬꪱ ꪨꪱꪥ ꪩꪺꪉ ꪋꪮꪥ ꪹꪤ ꫛ ꫃ꪊꪚ.

ꪼꪅ ꪙꪲ ꪣꪲ ꪤꪱꪫ 20% ꫄ꪤꪙ ꪶꪎ ꫃ꪭ ꪶꪋꪣ ꪭꪚꪾ ꪚꪱꪫ ꪬꪣꪸ ꪮꪲ ꫃ꪔ. ꪀꪺꪉ ꪙꪽ ꫄ꪡꪙ ꪨꪱꪥ ꪨꪷ ꪝꪉꪳ ꫛ ꫃ꪥꪒ ꪼꪭ ꪙꪱ, ꫛ ꪁꪱ ꪄꪱꪥ ꫃ꪩꪉ ꪙꪮꪥ ꪣꪸ ꪖꪴ ꫄ꪑꪚ ꪔꪣꪾ.

ꪵꪔ ꪣꪳ ꪁꪣꪾ ꫜ ꪹꪚꪙ 6 ꪋꪲ ꪭꪮꪒ ꪀꪱꪥ 1900 ꪥꪲꪀ ꪫꪴ ꪮꪲ ꫃ꪔ ꪋꪲ ꪄꪙꪳ ꪁꪱ ꪶꪒꪥ ꪀꪚꪾ ꪝꪭꪳ ꫛ ꪹꪚꪱ ꪣꪲ ꪵꪖ ꪚꪱꪪ ꪬꪣꪸ ꪮꪲ ꫃ꪔ ꪹꪩꪙ ꪹꪏ ꪨꪷ ꫛ ꪁꪒꪰ ꪁꪴꪉ ꫄ꪋ ꫃ꪊꪚ ꪘꪀꪰ.ꪩꪴꪉ ꪠꪱꪙ ꪪꪽ ꪔꪫꪱꪙ ꪠꪷ ꪫꪴ ꪹꪊꪉ ꪫꪴ ꪚꪱꪫ ꪬꪣꪸ ꪮꪲ ꫃ꪔ ,ꪶꪛ ꪮꪲ ꫃ꪔ ꪼꪬ ꪭꪴ: ꪜꪲ 2016 ꪁꪱ ꪥꪲꪀ ꪫꪴ ꪮꪲ ꫃ꪔ ꪹꪩꪙ ꪄꪙꪳ ꪼꪒ ꫄ꪊꪚ ꪙꪣꪾ ꪶꪒꪥ ꪀꪚꪾ ꫛ ꪣꪲ ꪵꪖ ꪚꪱꪫ ꪬꪣꪸ ꪮꪲ ꫃ꪔ ꪵꪀꪉ ꪫꪱ ꪹꪕ ꪙꪲ ꪋꪲ ꫄ꪊꪚ ꪙꪣꪾ ꪶꪒꪥ ꪀꪚꪾ ꫛ ꫃ꪭ ꪣꪲ ꪵꪖ ꪚꪱꪫ ꪬꪣꪸ ꪼꪫ ꪐꪽ ꪝꪱꪫ ꫄ꪋꪉ ꪝꪉꪸ.

ꪬꪱꪀ ꪫꪱ ꪼꪅ ꪙꪲ, ꪣꪲ ꫄ꪋ ꪣꪲ ꪚꪮꪙ ꫛ ꫄ꪤꪙ ꪑꪉꪰ ꪝꪷ ꪨꪱꪥ ꪤꪱꪀ ꪋꪱ ꫄ꪋ ꪼꪜ ꪏꪳ ꪚꪱꪫ ꪬꪣꪸ ꪮꪲ ꫃ꪔ ꪹꪏꪉ: ꫄ꪥꪒ ꪊꪸ ꪩꪱꪥ ꪝꪷ ꪨꪱꪤ ꪤꪱꪀ ꪋꪱ, ꪼꪒ ꪖꪱ ꫄ꪬꪉ. ꪣꪲ ꪏꪱꪘ ꪚꪮꪙ ꪼꪒ ꪶꪜꪉ ꪁꪫꪙꪸ ꫃ꪥꪒ ꪵꪖ ꪘꪉꪰ ꪎꪱ ꪹꪠꪉ ꪀꪺꪉ ꪥꪱꪙ ꫃ꪥꪒ ꪊꪸ ꪩꪱꪥ ꪁꪷ ꫃ꪥꪒ ꪶꪨꪉ ꪝꪉꪳ ꪙꪱꪉ ꪁꪫꪱꪣ ꪘꪉꪰ ꪵꪖ ꪚꪱꪫ ꪬꪣꪸ ꪮꪲ ꫃ꪔ ꫃ꪥꪒ ꪼꪬ ꫛ ꪏꪳ ꪹꪚꪱ ꪎꪴ ꪼꪒ ꪵꪀꪉ ꪼꪒ ꪼꪜ ꪭꪮꪒ ꫄ꪀ ꪀꪫꪱꪙ ꪚꪱꪫ ꪬꪣꪸ ꪎꪱ ꪶꪭꪥ ꪎꪷ ꪼꪫ ꪵꪜꪉ ꪹꪩꪱ. ꪁꪷ ꪣꪲ ꪚꪮꪙ ꪖꪱ ꪕꪮꪚ ꪬꪮꪣ ꪼꪒ ꪨꪱꪥ ꪶꪬ ꫄ꪏ ꪊꪉꪰ ꪼꪜ ꫃ꪥꪒ ꪊꪸ ꪩꪱꪥ ꪀꪚꪾ ꫄ꪀ ꪀꪫꪱꪙ ꪚꪱꪫ ꪬꪣꪸ ꪎꪱ ꪶꪭꪥ, ꫃ꪥꪒ ꪶꪮꪒ ꪙꪱꪙ ꪻꪬ ꫛ ꪶꪋꪣ ꪭꪚꪾ ꪚꪱꪫ ꪬꪣꪸ. ꪯꪽ ꪙꪲ ꪨꪷ ꪝꪉꪳ ꪄꪴ ꪑꪉꪰ ꪄꪒꪰ ꪄꪮꪉ ꪤꪱꪀ ꪋꪱ ꪚꪱꪫ ꪬꪣꪸ ꪎꪱ ꪶꪭꪥ ꪫꪒꪸ ꪘꪱꪣ ꫄ꪁꪙ ꪼꪒ ꪵꪀ ꪼꪄ ꪼꪫ ꫛ ꫄ꪤꪙ ꪣꪲ ꪹꪏꪉ ꪏꪳ ꪵꪖ ꪚꪱꪫ ꪬꪣꪸ ꪼꪒ ꪉꪱꪥ ꪵꪀꪉ ꪐꪽ ꪝꪱꪫ ꫄ꪊꪚ ꪙꪣꪾ ꪩꪺꪉ ꪜꪴꪙ ꫃ꪕꪉ ꪨꪱꪥ ꫄ꪤꪙ ꪹꪣꪉ ꪶꪋꪣ ꪭꪚꪾ ꪚꪱꪫ ꪬꪣꪸ ꪮꪲ ꫃ꪔ ꪀꪺꪉ ꪜꪲ 2020.

ꪹꪩꪉ ꪬꪫꪙꪸ ꪥꪲꪀ