VOV.Xơ Đăng - Ai mâu idrâp chêng chuât a tơdế kong kế, ngo ngối, dó xêh idrâp ki mê ai to tung hâi mơdĭng. Môi tiah rơhĭng iâ, pin kô hlo tung mê ai tuăn khíu mơjo pơlê, hơ-ui dêi rơpó, rơkong tối pơchân dêi kuăn mơngế ‘nâi rêh ối achê dêi rơpó, pâ dêi rơpó hên tâ. Tơdroăng xôi kiâ “Idrâp chêng krếo pú”, cho vâ hơ’muăn tối ‘na o kơnốu A Linh, mơngế Rơteăng hdrối nah tro xôi, klêi mê ‘nâi hmréa dêi châ, pâ pôi tá ‘nhó, ‘nâi tối tơná xôi, ‘nâi tơmâng mâu ki ê hnê. Ing idrâp chêng ki chuât dêi pơlê, A Linh hlê plĕng môi tơdroăng ki tiah hmâ la mot trâu rơdâ tung tuăn mơno: idrâp chêng ro má môi ôh tá xê idrâp ki chuât têi, mê cho idrâp chuât ki krếo tơdjâ kuăn mơngế lăm tăng dêi rơpó, rơtế rak tuăn khíu dêi rơpó ƀă mơhúa xiâm dêi pơlê pơla.