VOV.Xơ Đăng - Hdroâng mơngế Raglai ai tơdroăng rêh ối túa lĕm tro hên hĭn, malối cho ‘na prôa, têng nêng, tơdroăng rơngêi ting pro khiú pâ tung hiâm mơno rêm ngế ki hmâng. Tơdroăng Hơ’muăn “Idrâp hơdruê dêi ngế hmốu’’ cho vâ hơ’muăn tối ‘na ngế o kơnốu ối kŭn Đá Ngọc hơdruê mâu ƀai khên tơnôu, pro kuăn pơlê rơhêng tơmâng xua ro, piu lôi mâ khế hiăng klêh a rŏng ngo, bê ta troh kong hiăng gâ, kong hiăng hâi. Rơkong hơdruê dêi ngế hmốu pro mâu chêm chok, chăm chói, kơnai kơnot veăng kơhnhon xuăng, piu kâ ’nhiê mâu báu-prá-alâi-plâi pôm a chêk deăng. Ƀă rơkong hơdruê dêi ngế hmốu xuân hiăng pro ăm ngế ki kơneăm dju lôi dêi pháu, hơnêa, vêh ƀă tơdroăng rêh ối hơniâp lĕm.