VOV.Xơ Đăng - Rêh ối hmâ ƀă kong ngo, têa kroăng, têa krông ƀă pơlê pơla, mâu kuăn ngo Tây Nguyên hiăng hnê mơhno môi tơdroăng ki tro ‘ló; kuăn mơngế thế rêh ối tơtro ƀă kong kế, mơdêk ki pơxúa lĕm tung pơlê hlối loi a ki tơdâng tơ’mô dêi tơdroăng erêh. Tung tơdroăng rêh ối mê, ivá rơdêi ôh tá xê to lo ing ivá ki rơdêi mê ối lo ing tuăn mơ-eăm chân krá, tơdroăng ki rơkê plĕng ƀă hiâm mơno ‘nâ pâ hơ-ui, veăng hơlêm mơhnhôk; ngế ki lot xuân ối châ ƀlêi tâng ‘nâi rak ki krá kak dêi tuăn i hiâm, mơno. Tơdroăng xôi kiâ “Kleăng Hmong prế Pôa Klá” dêi mơngế Jarai cho vâ mơhno tối pêi pro tơdroăng ki tro ga đi đo châ kâi ƀlêi trâng tơdroăng pêi pro xôi, ki ôh tá tơdrăng.