VOV4.Xơ Đăng - Pôa Phạm Văn Đồng, Ngế pro xiâm hnê ngăn tơnêi têa hneăng hdrối nah ki hiăng hlâ tối: “ Tung rơxông ối rêh pêi cheăng Kăch măng xuân môi tiah tung tơdroăng rêh ối rêm hâi, Pôa Hồ Chí Minh - Kăn xiâm hnê ngăn tơnêi têa hneăng hdrối rêh ối ƀă rêm ngế, đi đo hnê djâ tơdroăng kơnía, lĕm tro, pêng păm tuăn hơ-ui, mơjo pâ. Pôa Hồ đi đo hơ-ui pâ kơ vâi pú, kuăn pơlê. Tung tơdroăng ki hơ-ui pâ mê, ai tíu ăm rêm ngế, ôh tá piu hiât ngế ki lâi...”. Mê cho môi tơdroăng vâ tối tŭm têk ‘na Pôa Hồ Chí Minh, Kăn xiâm hnê ngăn tơnêi têa ki apoăng - Kuăn mơngế ki plâ rơxông 79 hơnăm chôu ‘măn ăm tơdroăng hơ-ui pâ tơnêi têa, mơjo pâ kơ kuăn pơlê.