VOV4.Xơ Đăng - A kong pơlê Dak Nông ai kơdung ngo ki pơtối dêi pó, tung mê ai Nâm Nung, Nâm Njang klêi mê troh a ngo Í Prâi. Ti xê to kong kế lĕm lih mê ối ai tơnêi tíu, loăng pơlái, kong kế drêh lĕm, têa hnăng tơngói, ai hên khu chêm, tung mê ai í prâi. Ngo Í Prâi ối tung cheăm Nâm NJang, tơring Dak Song. Xua ti lâi khoh chiâng ai ngo Í Prâi, xua ngo ki mê ai hên í prâi rêh ối. Mơngế M’Nông hmâ hơ’muăn tối xiâm kối ngo Í Prâi cho vâ mơhno tối ki xiâm rêi dêi tơdroăng pro nhŏng o pơla mâu pơlê dêi pó. Tơdroăng xôi kiâ kố xuân vâ tơbâ ăm hnoăng kring vế, rak ngăn kong kế, loăng pơlái, kuăn kiâ tung kong.