VOV.Xơ Đăng - Ai hên tơdroăng hơ‘muăn, xôi kiâ roh ton nah dêi hdroâng mơngế K’Ho, rêm tơdroăng hơ’muăn ai hên tơdroăng kơnía git, vêa vong, túa lĕm tro ƀă ƀai mơhriâm ki pơxúa tung rêh ối. Ing mâu tơdroăng hơ’muăn mê, hên tơdroăng ăm hlo, pin hlê tơ’nôm ‘na mơngế ton nah ngăn plâi tơnêi, tối nhên tơdroăng ‘na kong kế ƀă rak tơniăn ăm kuăn mơngế. Tơdroăng hơ’muăn mê tối nhên ti lâi mâu khu to ai kéa krí to khoh hbo, môi tiah tro on chếo - môi tơdroăng hơ’muăn hlối tiah hmâ, hlối cho ƀai hriâm ‘na tơdroăng pro tơhmâ, ai hiâm rĕng tôu, hêng hô ƀă ki tơdâng tơ‘mô tung rêh ối.