VOV4.Sêdang - Tung 2 hâi, lơ 4 ƀă 5/10, pơlê kong kơdrâm Ƀuôn Ma Thuột, kong pơlê Dak Lak pơtối châ hlo 9 ngế tro tâ COVID-19 tá hâi ‘nâi xiâm kối tâ tú tung pơlê pơla. Tung kơxô̆ 9 ngế khăm rĕng yương tĭnh ƀă SARS-CoV-2, ai 3 ngế châ hlo a bêng Tân An, kơxô̆ ki ê tơdjâk troh mâu ngế tro tâ pơreăng a cheăm Hòa Thuận. Ki rơhêng vâ tối cho 3 ngế tung môi rơpŏng a thôn 4, cheăm Hòa Thuận, rêm hâi trâm mâ ƀă hên ngế ƀă lăm troh hên tíu.

Ing mâu ngế tro tâ pơreăng kố, khu cheăng hiăng châ hlo tơ’nôm 3 ngế F1 test rĕng mê ăm hlo yương tĭnh. Tơdjâk troh pơreăng a cheăm Ea Kao châ hlo hâi lơ 28/9 pơla kố nah, khu cheăng hiăng tôe xo têa môh test rĕng roh má 3 ăm kuăn pơlê tung ƀuôn Tơng Ju, ƀă châ hlo tơ’nôm 22 ngế yương tĭnh ƀă SARS-CoV-2.

A Sa Ly tơplôu ƀă tơbleăng