VOV.Xơ Đăng - A mâu pơlê, hên ngế xuân hiăng hmâ tơmiât: kơnốu pêi tơdroăng cheăng kân - lăm a chiâk, a deăng, lăm tung kong; kơdrâi pêi viâ mâu tơdroăng cheăng tung hngêi, trối pế pơchên hmê kơchâi, păn roăng, rak ngăn kuăn ‘nĕng, pêi viâ hên hĕng mâu tơdroăng cheăng tung hngêi trăng. La nôkố, drêng tơdroăng rêh ối hiăng pơ’lêh, ngế kơdrâi xuân pêi cheăng hơngăm, xuân lăm a chiâk, xuân tơbrêi tơbrêh há, la vêh a hngêi xuân thế kơpuih văng tung hngêi, rak ngăn kuăn ‘nĕng, pơchên hmê kâ... ing kơxo má troh kong măng xuân tá kâi tâi tơdroăng cheăng. Pro pơro dó inâi “Hơpiâp on tơdjuôm’’ kô tối ăm pin ‘nâi tơdroăng pro pơro ’na prế on veăng Nôu K’Rông prế Pâ K’Rông, vâ pin rơtế tơmiât ngăn hơ-ui ƀă veăng hơlêm rơpŏng hngêi.