VOV.Xơ Đăng - A hên pơlê dêi Tây Nguyên, iâ mơngế ôh tá vâ rĕng tơmâng pơlât a hbáu tro chó kâ, miếo kơ’viêo, bú xếo to ƀă têa lơ pâk pơkeăng mơdât pơreăng. Ki ôh tá vâ rĕng tơmâng mê dế pro tơ’lêi chiâng hlâ mơngế. Pro pơro “Mơngế ki plĕng mâ tá hlâ xua tro chó rơxok kâ’’ hâi kố cho vâ pơchân tối ăm rêm rơpŏng hngêi thế hbrâ rơnáu, pâk pơkeăng tŭm hbrâ mơdât pơreăng ăm chó miếo ƀă hlối djâ ngế ki tro cho miếo ki kâ mê lăm pâk vaccine vâ teăm rak tơniăn dêi tơná ƀă vâi hdrêng.