VOV.Xơ Đăng - Rơnó pơtê hriâm cho pơla rôh vâi hdrêng châ pơtê, xah hêi kơ’nâi môi hơnăm hriâm tơbrêi. La bú tung to lâi khế kố nah. A Tây Nguyên hiăng ai lối 20 rôh klâk têa, mâu ngế klâk têa mê ki hên cho vâi hdrêng. A mâu thôn pơlê hơngế hngo, drêng mâu kân tơvâ tơdroăng pêi chiâk, vâi hdrêng xah hêi xêh a hngêi, brôk dêi rơpó lăm a têa krông têa kroăng têa long vâ hum ăm rơngiâp chiâng trâm tơdroăng klâk têa. Pro pơro hâi kố ai tối: “Pôi ăm rơnó pơtê hriâm chiâng tơdroăng khéa hơ‘nêng” tối tơbleăng hdrối tơdroăng mê.