VOV.Xơ Đăng - Dế ối rêh nah, Pôa Hồ Chí Minh, Kăn xiâm hnê ngăn tơnêi têa ki apoăng pâ khât kơ mâu kuăn ngo. “Ngo kô chiâng tơhnah tơhnâp, têa kroăng kô chiâng xiâ, la hiâm mơno Pôa đi đo mơjo pâ kơ mâu kuăn pơlê peăng Hdroh tơnêi têa, tơdroăng mê ôh tá la lâi kâi pơ’lêh”- Rơkong Pôa pơchân tung kơthô pơtroh ăm Hneăng hôp mâu hdroâng kuăn ngo peăng Hdroh hơnăm 1946 xuân ối pâ vế đi đo tung tuăn ngôa dêi mâu rơxông. Tơbâ 135 hơnăm hâi kot mâ Pôa Hồ lơ 19/5 cho rôh vâ mâu hơnăm ối nếo mâu pơlê a Tây Nguyên mơhno hiâm mơno ‘nâi pâ mơnê kơ Pôa Hồ, tối vâ mơ-eăm pơxiâm pêi cheăng, pro xiâm kŏng ngê̆, kring vế hyôh kong prâi ƀă rak vế khôi túa vêa vong lĕm tro kuăn ngo. Pro pơro “Hơnăm ối nếo Tây Nguyên pêi pro tiô rơkong pôa” vâ mơhno tuăn pâ.