Bài 1:

https://vov4.vov.vn/xodang/todroang-neo-ai-pole-pola-thoi-su-xa-hoi/khu-bai-pohleh-kan-tung-rah-xo-ia-monge-pro-pokua-meamonua-a-on-pa-puat-monua-kan-bo-bai-1-mau-vai-kodrai-mo-eam-cheang-pa-ngia-486789.vov4

Bài 2:

https://vov4.vov.vn/xodang/todroang-neo-ai-pole-pola-thoi-su-xa-hoi/mea-monua-a-on-ing-mau-roh-po-troang-pa-ngo-486895.vov4

Tơdroăng hâi kố, tung ƀai mơ’nui dêi khu ƀai chêh, ngin tối  rơtế ƀă tơdroăng hnê tối dêi rơpó tá tơdroăng kal kí ƀă rêm râ kuăn pơlê. Ôh tá xê to hbrâ tíu pêi cheăng, mâu rơxế prôk lăm prôk vêh, tíu ối ƀă hriâm tâp, mê tá tơdroăng ki tơniăn drêng pơxiâm pêi cheăng nếo. “Môi tuăn dêi pó mơ-eăm xông tơdjuôm môi tơdroăng mơnhông tơƀrê” cho ing tuăn vâ tơbleăng sap Tây Nguyên troh kĭng têa kơxĭ pêa hdroh Tơdế Tơnêi têa, xuân cho ko ƀai ki mơ’nui tung hên ƀai.

Mâu hâi ki kố, tơdroăng pêi cheăng a Khu pơkuâ mơhno khôi túa lĕm Tơ’noăng ivá ƀă ôm hyô Lâm Đồng tung kơpong Tíu xiâm pơkuâ tơnêi têa tơkŭm dêi kong pơlê thăm chiâng thâ. Cho tíu pro tíu pêi cheăng tơnêi têa nếo klêi kơ’nâi tơmot chiâng môi ƀă Dak Nông ƀă Bình Thuận, Lâm Đồng dế thâ pêi pro hbrâ tâi tâng tơmeăm vâ tơdah vâ chê 2.000 kăn ƀô̆ ing péa kong pơlê pú hmâ. Pôa Trần Thanh Hoài, Phŏ Kăn pơkuâ Khu pơkuâ ‘na Khôi túa lĕm ƀă Ôm hyô kong pơlê Lâm Đồng tối ăm ‘nâi, tíu cheăng dế hbrâ tâi tâng tơmeăm vâ tơdah tơ’nôm 150 ngế - khu tơrŭm pêi cheăng:

‘’Mâu kăn ƀô̆, kŏng chưk troh a kố mâu ngoh nâ khu tơrŭm pêi cheăng a tíu cheăng kô tŏng gum ti tăng hngêi trung hriâm tơtro, tíu ối tơtro achê tíu pêi cheăng. Xua, ai mâu ngế kăn ƀô̆ kŏng chưk ai tŭm on veăng rơtế lăm pêi cheăng a kong pơlê Lâm Đồng nếo mê mâu kuăn ‘nĕng xuân prôk tiô. Mơhé mâu tơdroăng kố ôh tá ai tung hlá mơ-éa laga kố cho tơdroăng tơrŭm môi tuăn, tŏng gum nhŏng o mâu kong pơlê pú xuân cho tŏng gum ăm tơná pin’’.

Tiô Tơdroăng tơkêa bro tơmot chiâng môi 3 kong pơlê Lâm Đồng, Bình Thuận ƀă Dak Nông, Khu pơkuâ tơnêi têa kong pơlê Lâm Đồng nếo ai lối 5.900 kăn ƀô, kŏng chưk. Tiô tối hdrối 80% kơxô̆ mơngế châ rah xo pêi cheăng a pơlê kong kơdrâm Đà Lạt. Tung mê, ai vâ chê 2.000 kăn ƀô̆, kŏng chưk ing 2 kong pơlê Bình Thuận ƀă Dak Nông. Pôa Nguyễn Ngọc Phúc, Phŏ Kăn hnê ngăn Vi ƀan kong pơlê Lâm Đồng tối ăm ‘nâi: Klêi kơ’nâi lối 3 khế hbrâ, mâu troăng pêi hngêi tơnêi têa, tíu pêi cheăng, rơxế pơto xuân dế châ Lâm Đồng pêi pro tơdâng tơ’mô.

‘’Ngin dế séa ngăn dâng 10 tíu vâ xing xoăng ăm mâu kăn ƀô̆ mâu kong pơlê troh pêi cheăng. Tíu ối, hngêi tơnêi têa mê xuân dế mơnhên xing xoăng tíu ối tơniăn mâu nhŏng o ai tíu kâ, tíu ối tơniăn. Kong pơlê xuân pâ thế ƀă Chin phuh ai mâu troăng po, troăng hơlâ tŏng gum, kơxô̆ liăn tơdrêng ƀă mâu kăn ƀô̆ kố vâ kăn ƀô̆ tíu ki ê troh hmiên tuăn pêi cheăng’’.

Rơtế ƀă Lâm Đồng, tơdroăng hbrâ xuân thâ ƀă inhên a kong pơlê Dak Lak. Kong pơlê hiăng po troăng pêi tâi tâng, ing tơdroăng xing xoăng tíu ối, hngêi trung, lâm ăm kuăn ‘nĕng kăn ƀô̆; rơxế kơto prôk lăm ƀă xing xoăng tơdroăng cheăng ăm 1.000 kăn ƀô̆ ing kong pơlê Phú Yên. Jâ Cao Thị Hòa An, Kăn pơkuâ hnê ngăn cheăng Đảng kong pơlê Phú Yên hiăng rơrêk tung hiâm mơno ƀă mâu troăng pêi inhên ki Dak Lak dế pêi pro:

‘’Sap ing Phú Yên to a kố mê hlo tro ‘nâng cho pin cho mơngế môi hngêi. Ngin ing Phú Yên to a kố ai hên tơdroăng ki hbrâ, ai tơmiât hên laga djâ môi tơdroăng tuăn pâ, môi tuăn pâ kân ƀă pói tơngah ‘na môi kong pơlê kân vâ pin ai môi tíu pêi cheăng tung la ngiâ tơxâng ƀă tơdroăng pói tơngah dêi kăn ƀô̆, đảng viên, kuăn pơlê ƀă tơdroăng loi tơngah dêi Tơnêi têa’’.

Tơmot chiâng môi kong pơlê, cheăm, rah xo bro lế lĕm tro khu râ kăn pêi cheăng tơnêi têa... Nôkố ôh tá xê cho to hiâm mơno mơ-eăm tơkâ hluâ pá puât dêi rêm kăn ƀô̆, cho hnoăng ƀă tơdroăng ki hbrâ inhên dêi khu râ kăn pơkuâ mâu kong pơlê mê ai tơdroăng hnê mơhno ki plĕng ing Tơnêi têa rơtế pơklât dêi mâu râ kuăn pơlê. Rêm rơkong tơpui dêi kuăn pơlê a mâu roh trâm mâ, tối tơdroăng môi tuăn ƀă pói vâ Tơnêi têa rơtế mâu kong pơlê pêi pro châ tơƀrê, tơdrêng amê tối rơdêi ki kal dêi tơdroăng cheăng kăn ƀô̆:

‘’Rah xo bro lế lĕm tro khu râ kăn pêi cheăng tơnêi têa ing Khu xiâm troh kong pơlê cho kuăn pơlê môi tuăn. Kăn ƀô̆ tíu pêi cheăng xuân môi tiah kuăn pơlê loi tơngah Đảng, Tơnêi têa. Pói vâ tung la ngiâ Đảng, Tơnêi têa pêi kơtăng khât’’.

Tơmot chiâng môi tiô troăng Đông – Tây kô kum Tây Nguyên ai têa kơxĭ, Nam Trung bộ ai kong, tơkŭm tâi tâng tơmeăm ki ai hlâu, tơdjêp khôi túa lĕm ƀă kuăn mơngế. Mâu kong pơlê Lâm Đồng, Dak Lak, Bình Định, Quảng Ngãi hiăng mơhno tơdroăng ki khŏm mơ-eăm hên tung tơdroăng hbrâ rêm tơdroăng vâ tơniăn khu pêi cheăng tơnêi têa pêi cheăng xêt khât, châ tơƀrê drêng tơdah rơpâu kăn ƀô̆ ing Kon Tum, Gia Lai, Phú Yên, Dak Nông ƀă Bình Thuận. Mâu tơdroăng pá puât kal châ tơkâ hluâ tung roh kăch măng kố, dế cho on mơnúa mêa, pá puât mơnúa kăn ƀô̆! Tơkâ mâu tơdroăng pá puât apoăng, mâu kong pơlê kô tơ’lêi hlâu rơtế dêi pó mot hneăng mơnhông nếo./.