*Dak Lak mơjiâng 1 hô̆i đong tơ’noăng, ƀă 53 tíu tơ’noăng rơtế ƀă 948 veăng tơ’noăng châ xoăng a mâu hngêi trung râ má pái ƀă trung tâm yăo yuk thường xuyên a kong pơlê. Tâi tâng kơxô̆ ngế hok tro chêh inâi tơ’noăng cho lối 22.600 ngế hok tro, tung mê ai lối 530 ngế hok tro chêh inâi tơ’noăng hmâng vâ.

Troh nôkố, cheăng séa ngăn ƀă hbrâ mâu kơbong, tơmeăm a mâu tíu tơ’noăng hiăng pêi pro klêi tâi tâng. Cheăng mơgrúa lĕm kong prâi tơnêi tơníu, tơniăn kế kâ, khăm pơlât ƀă túa pơkâ rak vế gak kring, klâ xoăng troăng prôk xuân châ mâu kơvâ cheăng tơrŭm tơbleăng tơniăn. Khu ngăn hnê hriâm ƀă hnê mơjiâng tuăn ngoâ rơkê Dak Lak hiăng po mâu lâm hnê hriâm cheăng ăm lối 2.200 ngế kăn ƀô̆, thái cô, mâu ngế cheăng châ pơtroh thế veăng tung hneăng tơ’noăng.

*Hneăng tơ’noăng mơgêi hriâm râ má pái phôh thong hơnăm kố a Kon Tum ai lối 5.300 ngế chêh inâi veăng tơ’noăng, tung mê, ai vâ chê 1.800 ngế kuăn ngo. Vâ tơniăn tơƀrê hneăng tơ’noăng xuân puí vâ vâ ai hên kơxô̆ hok tro plah tơ’noăng, mâu hngêi trung tung kơpong hngế hngo, ƀă mâu hngêi trung hnê kuăn ngo ai tíu kâ koi ối pơtê dế mot tung mâu hâi thâ rĕng pêi pro vâ ‘mâi mơnhông hlê plĕng  pơtâp tơdroăng ki rơkê tung pro ƀai ăm hok tro.

Hneăng tơ’noăng hơnăm kố cho rôh apoăng Khu xiâm ngăn hnê hriâm ƀă hnê mơjiâng tuăn ngôa rơkê pơ’lêh ko ƀai tơ’noăng, mâu thái cô kơhnâ hnê ăm hok tro pro ăm vâi hmâ ƀă túa tơ’noăng ki nếo ing mâu ƀai kiêm tra rêm hâi troh rôh tơ’noăng mơnúa. Mâu hngêi trung hnê kuăn ngo ai tíu kâ koi ối pơtê tơmâng khât troh tơdroăng rêh ối tơmeăm khoăng ƀă tuăn ngôa dêi hok tro, pro tơ’lêi hlâu ăm mâu vâi o rơbot ƀai ton hdrối vâ tơ’noăng.