Tung 10 hơnăm hiăng hluâ, mâu khu tơrŭm cheăng Đoân Droh rơtăm tung kong pơlê Gia Lai tơrŭm pêi pro lối 1.500 tơmeăm, tơdroăng cheăng droh rơtăm veăng mơjiâng thôn pơlê nếo, tíu kơdrâm kuăn pơlê rêh ối tê mơdró rơkê; tơkŭm po vâ chê 200 tơdroăng pêi ‘’Hâi xah hêi ro Ƀok thái pơkeăng hơnăm ối nếo tiô rơkong Pôa Hồ’’, khăm pơlât, xing xoăng pơkeăng tê kơtê ăm lối 50 rơpâu droh rơtăm ƀă kuăn pơlê ai tơdroăng rêh ối pá puât.

Rak ki châ tơƀrê 110 troăng pêi droh rơtăm ‘’2 ôh, 2 ai’’, tung mê tơkŭm mâu tơdroăng pêi a mâu cheăm mơ-eăm plah thôn pơlê nếo ƀă châ hên tơdroăng châ tơƀrê... Tơdroăng po rơdâ droh rơtăm phô̆m xông kân rơkê hriâm tâp ƀă pêi tiô Pôa Hồ hiăng châ pêi pro rơdâ, mơjiâng ivá vâ droh rơtăm phô̆m xông kân Gia Lai tơkâ hluâ pá puât, mơjiâng tơdroăng rêh ối, mơjiâng cheăng pêi.

Kơxê lơ 14/5, Khu pơkuâ ngăn Đoân Droh rơtăm Dak Nông po khĕn kơdeăn “Droh rơtăm ki rơkê plĕng pêi tiô rơkong Pôa hnê” ƀă đảng viên ối nếo kơhnâ rơkê”. Mâu hơnăm hdrối nah, tơdroăng ki tơbleăng hriâm tâp ƀă pêi tiô tuăn tơmiât, hiâm mơno, túa pêi Hồ Chí Minh hiăng châ rêm râ Đoân tung kong pơlê pêi pro pơhlêh ƀă hên túa pêi, troăng hơlâ tơmiât pêi rơkê, tơƀrê. Ing mê, chiâng ai rế hía rế hên vâi droh rơtăm kơhnâ rơkê, mâu ngế hơnăm ối nếo kro tơdroăng púi vâ, ai hiâm mơno rêh ối lĕm, đi đo djâ troăng tung hriâm tâp, pêi cheăng, tơmiât pêi rơkê ƀă pleăng dêi ivá ăm pơlê pơla.

A rôh leh, khu pơkuâ ngăn Đoân Droh rơtăm Dak Nông hiăng khĕn kơdeăn 28 ngế vâi droh rơtăm rơkê plĕng pêi tiô rơkong Pôa hnê ƀă 17 ngế đảng viên ối nếo kơhnâ rơkê kong pơlê Dak Nông hơnăm 2023 – 2025. Kố cho mâu ngế krê ki kơhnâ rơkê tung hriâm tâp, pêi cheăng, hriăn plĕng khoa hok, pơhlêh nếo tơmiât pêi rơkê, pơxiâm pêi cheăng, mơjiâng thôn pơlê nếo ƀă veăng tung hnoăng cheăng Đoân, Hô̆i, Đô̆i.