Vâ hbrâ pê klêi tơniăn ăm mâu kơ koan, tíu pêi cheăng  khu tơrŭm, râ cheăm pêi cheăng khât sap hâi lơ 1/7, Tỉnh ủy Kon Tum hnê mơhno mâu Đảng ủy dêi tung kong pơlê; mâu khu ngăn đảng tơring, pơlê kong kơdrâm ƀă mâu khu râ kơvâ cheăng kong pơlê tơkŭm pêi klêi xing xoăng pro rế lĕm mơngế cheăng ăm tơnei tê; tơleăng mơnhên klêi tơdroăng xơpá, tơvâ tơvân tơniăn ăm mâu khu pêi cheăng tơ’lei hlâu, tơƀrê.

Tỉnh ủy Kon Tum pơcháu ăm rêm râ ủy séa ngăn, pê klêi troăng hơlâ xing xoăng mơngế pêi cheăng, tíu pêi cheăng, rơxế to, tơmeăm khoăng tíu pối... thế tơniăn vâ xuá ăm mâu râ cheăm pêi cheăng hlối sap hâi lơ 1/7; Khu kăn Đảng ủy Vi ƀan kuăn pơlê dêi kong pơlê pơkuâ, hnê mơhno tăng ngăn vâ ‘nâi tơdroăng rak ngăn, ngăn pro ti lâi tíu pêi cheăng, tơmeăm khoăng, tơnêi ki rơlối klêi xing xoăng pro rế lĕm tíu pêi cheăng tơniăn tơƀrê, vế pôi tá mơ’nhiê; Khu kăn Hô̆i đŏng kong pơlê teăm pơkâ hnê mơhno ăm Kăn xiâm hnê ngăn tơnêi têa, Phŏ kăn hnê ngăn, Ngế pơkuâ khu kăn Hô̆i đong kuăn pơlê râ cheăm; Kăn hnê ngăn, Phŏ kăn hnê ngăn Vi ƀan kuăn pơlê râ cheăm vâ tơkŭm diâp pơkâ a hâi lơ 24/6.

Kăn hnê ngăn Đảng ủy mâu kơ koan pơkuâ hnê ngăn Đảng kong pơlê Kon Tum – pôa Nguyến Đức Tuy ăm ‘nâi, tơdroăng cheăng pêi thâ rĕng kêi kal thế rêm kăn ƀô̆, kŏng chưk, viên chưk bă mơngế pêi cheăng thế pơtối rak vế tuăn mơ-eăm hbrâ ƀă ai hnoăng tơná vâ khu kăn cheăm, bêng ki nếo pêi cheăng tơniăn tơƀrê.