Tung 2 hâi hdrối, a hên kơpong dêi kong pơlê Kon Tum hiăng ai kong mêi krâ kơvâ ƀă kong mê kân. Kong pơlê Kon Tum pơkâ thế khu kăn pơkuâ mâu tơring, pơlê kong kơdrâm rơtế ƀă mâu tíu pêi cheăng ki tơdjâk troh séa ngăn kơtăng tơdroăng hyôh kong prâi; rak vế kơtăng túa ki hbrâ ví, hbrâ rơnáu séa ngăn, ‘mâi rơnêu mâu túa pơkâ, túa ki hbrâ ví.

Mơhnhôk pơtroh mâu rơxế hbrâ ví, ‘mâi mơnhông teăm tơdrêng, tơƀrê mâu tơdroăng ki trâm. Séa ngăn nhên mâu kơpong tíu kuăn pơlê ối, long rơchoâ têa ki xiâm, teăm châ hlo ki ôh tá tơniăn, hbrâ pơtroh khu lêng, rơxế, khŏm ‘nâi xĕn kuăn pơlê lo ing tíu ki rơ-iêo vâ rak vế tơniăn khât ăm châ chăn kuăn pơlê kơdroh iâ tơ’nhiê tơmeăm khoăng dêi Tơnêi têa ƀă Kuăn pơlê.

Vi ƀan kong pơlê Gia Lai ai Mơ-éa ki kal thâ tơdrêng ‘na tơdroăng tơkŭm hbrâ ví ƀă kong mêi kân, tơ’lêi ai têa lân lu, tơnêi tơhnah tơnâp tung kong pơlê. Kong pơlê pơkâ pêi pro tơdrêng khu djâ troăng ahdrối séa ngăn mâu kơpong kuăn pơlê rêh ối kĭng têa kroăng, têa plông, kơpong ki ‘nâng ‘nâi vâ hbrâ xĕn kuăn pơlê troh tíu tơniăn.

Xing xoăng mơngế gâk, tâp kơƀâng tơbleăng a mâu têa plế, kơpong trâu, têa hiu têi. Hbrâ khu ngế, tơmeăm vâ tah lôi tơdroăng ki ôh tá tơniăn, pro tơniăn troăng klông. Hbrâ pêi pro mâu troăng rak vế pêt mơjiâng tơmeăm ing chiâk deăng; tơniăn ăm mâu kơpong kơmăi kơmok, kơpong tíu kơdrâm kuăn pơlê, kơpong kuăn pơlê rêh ối ƀă mâu tơdroăng chiâ xo kế tơmeăm khoăng tung kơdâm tơnêi  a mâu kơpong ai tơ’lêi tro tơdjâk.

Mâu khu pơkuâ long, rơchôa, long têa on tơhrik tơkŭm tơpui tơno, séa ngăn krá tơniăn kong mêi ƀă kơdró têa a mâu long têa; pêi pro mơ’no têa tơtro vâ tơniăn tơmeăm ƀă kơpong pá xôp.