Kố cho tơdroăng pêi ki kal má môi tung tơdroăng po Hneăng hôp Muăn nguăn Pôa Hồ lâp tơnêi têa roh má X vâ kheăn kơdeăn mâu tơdroăng châ tơƀrê dêi mâu Muăn nguăn Pôa Hồ ki rơkê hneăng hơnăm 2020 – 2025 tung pêi pro tơdroăng ‘’Vâi hdrêng Việt Nam tơ’noăng pêi tiô 5 troăng Pôa Hồ hnê’’.

Xông tơpui a Hneăng hôp, pôa Lương Cường, Kăn xiâm hnê ngăn tơnêi têa kheăn kơdeăn mâu tơdroăng châ tơƀrê ki má môi dêi 500 ngế ki kơhnâ rơkê Muăn nguăn Pôa Hồ ki má môi, rơtế tâi tâng đô̆i viên, droh rơtăm phô̆m xông kân, vâi hdrêng lâp tơnêi têa hiăng châ tơƀrê tung pơla kố nah.

Kăn xiâm hnê ngăn tơnêi têa tối ăm ‘nâi, drêng ối rêh nah, Pôa Hồ đi đo ‘măn ăm tơdroăng tuăn pâ ki má môi ăm vâi hdrêng Việt Nam. Kăn xiâm hnê ngăn tơnêi têa loi tơngah mâu vâi hdrêng lâp tơnêi têa kô pơtối mơ-eăm hên tâ, thế mơ-eăm hên tâ mê nếo; tơrŭm môi tuăn rơtế dêi pó rak ƀă tơbêng tơ’nôm mâu ki kơnâ tiô khôi vâi krâ nah lĕm dêi hdroâng mơngế Việt Nam khên tơnôu.