Kơxê lơ 4/5 a Pơlê kong kân Cần Thơ, pôa Tô Lâm, Kăn xiâm pơkuâ hnê ngăn Đảng pơkuâ roh pêi cheăng ƀă Khu pơkuâ tơdroăng cheăng Đảng pơlê kong kân Cần Thơ ƀă Khu hnê mơhno mâu kong pơlê Sóc Trăng ƀă Hậu Giang ‘na tơdroăng po rơdâ pêi pro mâu tơdroăng pơkâ, mơgêi dêi Khu xiâm tơnêi têa; tơdroăng tơmot chiâng môi, tơkŭm chiâng môi tíu pêi cheăng râ kong pơlê ƀă mơjiâng Đảng ƀô̆ pơlê kong kân Cần Thơ klêi kơ’nâi tơmot chiâng môi tiô Tơdroăng pơkâ 60 dêi Khu xiâm tơnêi têa a 3 kong pơlê.

Kăn xiâm pơkuâ hnê ngăn Đảng mơnhên, tơdroăng tơmot chiâng môi 3 kong pơlê, Pơlê kong kân Cần Thơ nếo kô mơjiâng tơdroăng ki tơ’lêi vâ pêi pro tơdjêp krá ‘na tơdroăng cheăng kâ, khôi túa lĕm, rêh ối pơlê pơla, rah xo bro lế lĕm tro, mơdêk ki xêt, châ tơƀrê pơkuâ tơnêi têa, mơnhông ki tơ’lêi tiô troăng pêi ƀă tơdjêp ki rơdêi dêi rêm kong pơlê.

Klêi mê tối, hơnăm 2025 cho hơnăm ki kơnâ kal khât, drêng vâ pêi kêi đeăng tơdroăng tơmot chiâng môi râ kong pơlê, rế cho hơnăm tơkŭm po Hneăng hôp Đảng mâu râ hâk vâ chê troh Hneăng hôp má XIV dêi Đảng, Kăn xiâm pơkuâ hnê ngăn Đảng pơchân tối, tơkŭm mơdoh chôu tơxâng ăm tơdroăng hbrâ ƀă tơkŭm po châ tơƀrê Hneăng hôp Đảng ƀô̆ mâu râ, tung mê, tơdroăng mơjiâng mơ-éa ki kal hneăng hôp, thế tơkŭm pêi pro rơkê, tơtro ƀă khoa hok, pêi tiô Pơkâ kơxô̆ 45 dêi Khu xiâm kal kí.