Tơpui a rôh trâm mâ, pôa Đỗ Văn Chiến, Kăn hnê ngăn Vi ƀan xiâm Măt trâ̆n Tơnêi têa Việt Nam pơtroh rơkong mơnê khât ‘na mâu hnoăng cheăng ki pleăng, ivá cheăng, tuăn ngoâ ƀă tơdroăng ki hâk vâ dêi mâu khu ki chêh hlá tơbeăng ƀă tơdroăng cheăng tơrŭm tâi tâng hdroâng mơngế; tơdrêng amê hlối đi đo rơtế prôk ƀă Măt trâ̆n Tơnêi têa Việt Nam, mâu khu râ tung pơla tơdroăng cheăng pêi dêi tơná drêng tơbâ 100 hơnăm Hâi Hlá tơbeăng kăch măng Việt Nam.

Tiô ăm ‘nâi tung la ngiâ ah, Măt trâ̆n Tơnêi têa, mâu khu râ Tơnêi têa kô tơbleăng túa pêi cheăng nếo, pôa Đỗ Văn Chiến, púi vâ rêm ngế ki chêh hlá tơbeăng kô pơtối pêi tro túa pơkâ kố ƀă tơdjâk hiâm mơno tơrŭm, hiâm mơno pêi cheăng, tơmiât pêi rơkê, pleăng ivá ăm hên hĭn mâu khu mơdró kâ, kuăn pơlê, rơtế veăng gum mơjiâng tơnêi têa mot tung chal ki nếo, chal mơnhông tơná dêi tơnêi têa.