Mâu kăn hiăng tơpui a tôh ‘na Tơdroăng hbrâ pơkâ mơnúa pêi pro mâu luât pơkâ, luât kơjo kum phá xêh ăm tơdroăng vâ mơnhông pơlê kong kơdrâm Ƀuôn Ma Thuột, kong pơlê Dak Lak. Mâu tơdroăng veăng tối mê vâ môi tuăn kal ai pơkâ mơ’núa pêi pro tro tiô luât pơkâ, luât tŏng kum ki krê xêh vâ mơdêk pơlê kong kơdrâm Ƀuôn Ma Thuột, xua mê, cho pơlê kong kơdrâm ki ai tíu pêi cheăng xiâm dêi kơpong Tây Nguyên, tơdjêp ƀă mâu tíu xiâm mơnhông peăng hdroh Tơdé tơnêi têa, peăng mâ hâi Lo pa Hdroh tơnêi têa ƀă pái tơnêi têa Lếo, Việt Nam, Kul.

Ai ivá rơdêi ‘na cheăng kâ, mơhno túa lĕm tro, ai tíu cheăng xiâm kal kí tung tơdroăng cheăng kâ rêh ối, ‘na lêng, kring vế tơniăn kơpong Tây Nguyên ƀă tung lâp tơnêi têa. Pôa Trần Văn Tiến, Ngế kăn Kuô̆k hô̆i kong pơlê Vĩnh Phúc tối nhên:

“Tơdroăng pơkâ dêi Kuô̆k hô̆i ‘na mơnúa pêi mâu tơdroăng luât tŏng kum mơnhông pơlê kong kơdrâm Ƀuôn Ma Thuột cho kal khât, vâ mơdêk mơjiâng Ƀuôn Ma Thuột cho kơphô̆ ki xiâm dêi kơpong Tây Nguyên cho tơdroăng vâ mơhnhôk mơnhông mơdêk cheăng kâ rêh ối dêi kơpong Tây Nguyên, kố cho kơpong ki kal, tung tơdroăng kring vế  tơdroăng cheăng lêng rak tơniăn ăm tơnêi têa ƀă cho kơpong ai hên hdroâng kuăn ngo rêh ối, la tơdroăng cheăng kâ rêh ối hrá mơnhông tơtêk mê kal thế ai môi luât pơkâ ki nhên khât ăm kơpong kố vâ mơnhông cheăng kâ rêh ối dêi kơpong’’.

Pôa Nguyễn Phú Cường, Kăn pơkuâ Vi ƀan ngăn liăn ngân, Hngêi rak liăn Kuô̆k hô̆i  tơbleăng tơdroăng séa ngăn tung hlá mơ-éa Pơkâ ‘na mơnúa mâu luât pơkâ, luât tŏng kum mơnhông mơdêk pơlê kong kơdrâm Ƀuôn Ma Thuột, Dak Lak

Pôa Lê Ngọc Hải, khu kăn kong pơlê Dak Lak tối nhên, nôkố Ƀuôn Ma Thuột xuân ối hên tơmeăm khoăng ki hâi teăm ai ki malối cho tơmeăm khoăng tơnêi têa, xua mê tung hlá mơ-éa tơbleăng pơkâ po rơdâ luât pơkâ tŏng kum krê xêh, pro tơƀrê vâ tơ’mot khu ‘no liăn cheăng mơjiâng tơmeăm khoăng ăm kơpong kố:

“Tơdroăng thế pêi pro ahdrối ăm mâu khu mơdró, xua tơdjêp pro troăng prôk gá pá, mê tơdroăng mâu khu mơdró pêi cheăng tung kơpong Tây Nguyên xuân môi tiah pơlê kong kơdrâm Ƀuôn Ma Thuột ối pá, xua mê a tơmiât thế pro kơdroh hnoăng mơhá ƀă mâu khu mơdró vâ tơ’mot mâu khu mơdró troh ƀă mâu hdroâng kuăn ngo dêi Tây Nguyên vâ mơnhông mơdêk cheăng kâ rêh ối ăm i tro tâ. Xuân môi tiah thế rak ngăn pơkâ ƀă kum mâu  ki rơkê ‘na khoa hok rế rơkê tâ vâ chât  mơjiâng pơlê kong kơdrâm Ƀuôn Ma Thuột ăm rế tơƀrê’’.

Mâu tơdroăng tối mê, mâu tơdroăng kal tơdjâk troh mâu luât pơkâ ki kal ‘na liăn ngân, liăn ‘no pêi cheăng kal châ hbrâ rơnáu, xua ai mâu tơdroăng ki ‘nâ hâi tơtro ƀă luât pơkâ tơdjuôm. Môi tiah ‘na kum kơdroh pro hnoăng mơhá, nôkố dế kum kơdroh pro hnoăng mơhá tá khu mơdró ƀă mâu ngế ƀă kơpong hdroâng kuăn ngo ki kơtiê xơpá ó, la drêng xúa luât mê a Hlá mơ-éa chêh Pơkâ mê ai séa ngăn tung tơná kong pơlê Dak Lak kơjo kum ăm tíu ki mơnhông má môi, mâu pơlê cheăm tơring ki ê ôh tá châ kơjo kum.

Xua mê kal hbrâ rơnáu vâ tơniăn tơtro khâp, tơdâng tơ’mô tung tơdroăng tơbleăng khu luât xua Kuô̆k hô̆i pơkâ. Tối nhên kal thế pro ti lâi vâ tơ’mot ƀă mâu ngế ki pêi cheăng rơkê ăm pơlê kong kơdrâm Ƀuôn Ma Thuột, pôa Đỗ Tiến Sỹ, Khu kăn Kuô̆k hô̆i kong pơlê Hưng Yên ai tối tiah kố:

“Tơdroăng pơkâ pêi tung 5 hơnăm tiô á kô pro ăm kơtăn pơla 7 troh 10 hơnăm. Xua mê cho tíu ki kal môi tiah tối mơgêi a kơxô̆ 67 dêi khu xiâm kal kí. Tíu ki ê nếo kơjo kum ƀă mâu ngế rơkê khu cheăng khoa hok ki rơkê lăm pêi cheăng a mâu kơ koan cheăng kơvâ ki mê, tung pơla pêi pro tiô pơkâ mê châ pơkâ ôh tá êa nâp hnoăng mơhá tơná pêi lo tung pơla 5 hơnăm. Tiô á, vâ pro ăm tơtro ‘ló mê xuân thế pro   dâng 10 hơnăm vâ châ tơ’mot hên’’.

Pôa Lê Tấn Tới (Khu kăn Long An), Pơkuâ Vi ƀan cheăng lêng kring tơniăn

Tối nhên, ƀă 4 khu luât pơkâ châ tơbleăng tung tơdroăng Hlá mơ-éa Pơkâ ‘na luât ki pơkâ ăm pơlê kong kơdrâm Ƀuôn Ma Thuột, pôa Nguyễn Tuấn Anh, Khu kăn Long An tối, tâng Pơkâ mê châ Kuô̆k hô̆i vâ tơbleăng, kố cho rôh apoăng Kuô̆k hô̆i pơkâ luât pơkâ luât tŏng kum ăm môi pơlê kong kơdrâm cho tíu pêi cheăng xiâm râ tơring, hnoăng cheăng dêi ngế kăn púi vâ mâu tơdroăng pâ thế dêi mâu kăn Kuô̆k hô̆i xuân môi tiah kuăn pơlê kô châ tí tăng ngăn, tơ’nôm vâ mơjiâng chiâng môi tíu kô châ mơnhông mơdêk ăm mâu cheăm tơring kong pơlê ki ê.

Pakĭng 4 khu luât pơlê hiăng châ tơbleăng tung Hlá mơ-éa Pơkâ, pôa Nguyễn Anh Tuấn pơkâ thế Khu rah chêh hbrâ rơnáu tơ’nôm mâu tơdroăng pâ thế dêi kuăn pơlê tung kơphô̆. Mê cho, pơcháu ăm Hô̆i đong hnê ngăn pơkê kong kơdrâm châ phêp chiâng pơkâ xoăng liăn ngân pơlê kong kơdrâm vâ ‘no hrê  tiô pêi lo rêm ngế tâk tơ’nôm ăm mâu kăn ƀô̆, kŏng chưk, viên chưk dêi kơpong cheăng rak ngăn, Tơnêi têa, tơkŭm po tơdroăng kal kí rêh ối ƀă tíu pêi cheăng dêi tơnêi têa xua pơlê kong kơdrâm rak ngăn tiô tơdroăng pêi rơhéa tơdroăng cheăng pa kĭng châ mơ’no ăm liăn pê lo tâk tơ’nôm tiô pơkâ dêi Luât nôkố ‘na luât pơkâ pơkuâ dêi liăn ngân ƀă kơ koan cheăng pro hlá mơ-éa, tíu pêi cheăng tơnêi têa.Luât pơkâ mê xuân môi tiah Kuô̆k hô̆i hiăng ăm phêp pêi tiô Pơkâ 54 hơnăm 2014 ‘na mơnúa pêi pro tiô luât pơkâ mơnhông mơdêk Pơlê kong kân Hồ Chí Minh.

Môi tuăn ƀă luât pơkâ ăm Ƀuôn Ma Thuột, pôa Lê Tấn Tới, ngế kăn dêi khu Long An, pơkuâ Vi ƀan ngăn cheăng lêng kring tơniăn xuâ pâ thế tơ’nôm luât pơkâ vâ mơdêk kơxô̆ mơngế pêi cheăng Kăn xiâm hnê ngăn Vi ƀan cheăng lêng kring tơniăn, xuân pâ thế tơ’nôm luât pơkâ vâ mơdêk hnoăng cheăng ‘na lêng kring tơniăn ăm pơlê kong kơdrâm Ƀuôn Ma Thuột a kơpong Tây Nguyên, tung pơla mê, Tây Nguyên ai tíu pêi cheăng ‘na lêng ôh tá xê to a peăng mâ hâi lo mê tá peăng mâ hâi lu tơnêi têa.

Tiah mê, luât pơkâ vâ mơnhông cheăng kâ rêh ối dêi Ƀuôn Ma Thuột cho kal la ki kal tâ tơrŭm mơnhông mơdêk ƀă cheăng lêng kring tơniăn, tâng kring gak tơniăn mê nêó châ mơnhông cheăng kâ. Xua mê, ngế kăn troh pâ thế  mê ai tá luât pơkâ ki kal ƀă mâu kŏng an lêng, khu lêng gak tơkăng kong a kơpong ki mê.