Tung mâu hơnăm hdrối mê hía nah, Đông gak tơkăng kong ti xê to pêi pro klêi hnoăng cheăng hiăng pơcháu mê ối cho đông ki djâ troăng bâ eăng tung hnoăng cheăng kring vế cheăng pơkuâ ngăn, cheăng kal kí, kring vế tơniăn ăm troăng tơkăng kong pơla Việt Nam-Kul.

Khoh châ ai tơdroăng mê, kơnôm đông hiăng tơrŭm cheăng lĕm tro ƀă khu râ kăn pơkuâ tơring, cheăm, mê khoh châ pơtối rak “Idrâp kơ’lêng kơpong tơkăng kong”. Túa pêi pro kố hiăng châ pro sap ing hơnăm 2012 troh nôkố hiăng châ 10 hơnăm la hiăng hlo châ tơƀrê khât.

Ối drô tíu tơkăng kong pơla Việt Nam ƀă kong têa Kul, 2 to cheăm Mỹ Quý Đông prế Mỹ Quý Tây châ ngăn cho kơpong ki tô ó khât ‘na tơdroăng ki hmâ ai xía vâ xua xah ƀâi kâ liăn, tong hơ’vĕng kế tơmeăm, djâ mơngế luâ tơkăng  kong  xah ƀai kâ liăn. Hlo ai tơdroăng mê, hơnăm 2012, Đông gak tơkăng kong a bo cheăm Mỹ Quý Tây hiăng tơrŭm cheăng ƀă Khu hnê mơhno lêng, kŏng an tơring Đức Huệ ƀă khu kăn pơkuâ 2 to cheăm pơkâ pêi pro “Idrâp kơ’lêng kơpong tơkăng kong”, túa pêi pro kố hiăng kum mơhnhôk kuăn pơlê veăng pêi pro kơhnâ khât ƀă đi đo tối pơtâng ăm khu mô đô̆i gak tơkăng kong drêng ai tơdroăng xía vâ.

Trung tă Cao Xuân Hiền, Kăn pơkuâ ngăn cheăng kal kí, cheăng tung Đông gak tơkăng kong Bo cheăng Mỹ Quý Tây, Mô đô̆i gak tơkăng kong dêi kong pơlê Long An tối ăm ‘nâi:

“Klêi kơ’nâi hên hneăng hnê mơhno tối, pơtâng khĕn mê kuăn pơlê hiăng hlê plĕng nhên túa “Idrâp kơ’lêng kơpong tơkăng kong”. Ing tơdroăng ki hlê plĕng mê, vâi krâ-nhŏng o hiăng pêi pro kơhnâ khât rơtế ƀă Mô đô̆i gak tíu tơkăng kong ƀă khu lêng ki ê veăng pêi pro, xua mê, hnoăng cheăng pêi mê khoh châ tơƀrê khât “Idrâp kơ’lêng kơpong tơkăng kong”. Riân sap ing pơkâ tơdroăng cheăng mê troh nôkố, kong pơlê hiăng kring vế rak vế tơniăn ăm kơpong pơlê cheăm, ôh pá ai hlo xếo tơdroăng ôu drôu pôu, xah ƀai kâ liăn, tơxiăn tơpâm dêi pó, mâu tơdroăng mê hiăng kơdroh hên”.

Drêng pơxiâm pơkâ pêi pro túa ki kố, kăn ƀô̆ gak tơkăng tơkăng kong hiăng hnê mơhno nhên, rơhí rơhó ăm kuăn pơlê túa tŏn kơ’lêng tiô tơdroăng pơkâ krê, tơkŭm hnê mơhno pêi pro mâu tơdroăng ki tơ’lêi vâ kuăn pơlê, khu lêng pêi pro tro tiô tơdroăng hiăng pơcháu. Klêi kơ’nâi pơtâp tơdroăng kố, mê kuăn pơlê hiăng hlê plĕng idrâp kơ’lêng ga chuât ti lâi, ki lâi cho vâ pơtâng tối ai hngêi trăng tro chếo, ai kế tơmeăm pơtôu, idrâp kơ’lêng ki tiah lâi ai khu ki pro tơxul tơxal, lơ ai khu ki tong hơ’vĕng kế tơmeăm vâ tơvế râng mâu tơmeăm ki kal drêng pơtâng thế tơkŭm.

Pôa Võ Văn Bình ối a kơtâu 3, cheăm Mỹ Quý Đông, tơring Đức Huệ, kong pơlê Long An tối ăm ‘nâi:

“Tâi tâng mâu tơdroăng ki xía vâ a pơlê cheăm, mê vâi krâ-nhŏng o hiăng rơtế veăng mơdât, veăng pro i lĕm. Ki nhên, ai môi rơpŏng ki mê xía vâ mê hmâng idrâp kơ’lêng kô troh a kuăn pơlê vâi tơkŭm vâ tŏng kum rơpŏng hngêi ki mê. Klêi mê nếo, tơrŭm cheăng pơla kuăn pơlê ƀă khu kăn pơkuâ ngăn, ƀă khu đông mô đô̆i gak tíu tơkăng kong, tơdroăng pêi pro mê krá tơniăn khât”.

Ối tung pơla 2 to cheăm ki ối trâm hên xahpá, hên kuăn pơlê tơ’lêi tro khu ‘mêi tí tăng pơlông djâ pêi pro mâu tơdroăng xôi, xua ti mê, Đông gak tíu tơkăng kong Mỹ Quý Tây đi đo tơrŭm cheăng ƀă khu râ kŏng an, khu lêng tơkŭm hnê tối mơhnhôk thế kuăn pơlê veăng kring vế gak ngăn troăng tíu tơkăng kong, a mâu tơneăn ƀă hnối rak vế ngăn pơlê kơtâo, kring vế tơniăn tơnêi têa. Troh nôkố, tâi tâng mâu rơpŏng ki ai tơnêi pêi chiâk pêi deăng achê ƀă kong têa Kul pơrá hiăng chêh dêi inâi vâ veăng kring vế tơniăn tơneăn, troăng tơkăng kong, mâu chiâk deăng dêi rơpŏng tơná, ing mê, tơdroăng kring vế tơkăng kong hiăng chôa ‘lâng tơniăn, khu ki pro xôi hiăng chôa ‘lâng châ kơdroh.

Ƀă kuăn pơlê a tíu ki kố, kăn ƀô̆, mâu lêng Đông gak tíu tơkăng kong Mỹ Quý Tây chôu phut kố cho mâu ngế ki nhŏng o tung rơpŏng hngêi. Xuân xua ti mê, drêng ai troăng hơlâ pơkâ dêi tơnêi têa, dêi mô đô̆i gak tíu tơkăng kong, kuăn pơlê pơrá vâ môi tuăn kơhnâ khât ƀă pêi tâi ivá mơno tơná rơtế ƀă khu lêng kring gak tíu tơkăng kong, rak vế tơniăn tơnêi têa. Mơjiâng troăng tơkăng kong pơlê Việt Nam ƀă Kul hơniâp lĕm, mơnhông tơtêk.