Rôh hôp kố tối rơdêi, Lâm Đồng cho kong pơlê ki djâ troăng ahdrối ‘na pêi chiâk xúa kong ngê̆ rơxông nếo tung lâp tơnêi têa, ƀă hên inâi tơmeăm pêi lo ing chiâk deăng ki tê yă kơnâ châ mơnhên tung tung tơnêi têa ƀă a kong têa ê.

Rơtế amê, kơvâ ôm hyô hiăng chiâng kơvâ cheăng xiâm dêi kong pơlê. Hên ngế tối a rôh hôp hiăng tơpui tối leăng, pêi pro nhên mâu tơdroăng ‘na pêi chiâk xúa kơmăi kơmok chal nếo tro ƀă ôm hyô thôn pơlê; cheăng kâ tâ tá ƀă tơrŭm tơnêi tơníu cheăng kâ klêi ‘mot tơkŭm kong pơlê; xúa kong ngê̆, pơhlêh kơxô̆ ƀă AI tung mơnhông cheăng kâ krúa tơniăn; mơ’no tah trếo ‘mêi pro xiâm tung hưh cơ ăm pêi chiâk krá ton ƀă hên ki ê.

Tiô Phŏ Yăo sư-Tiê̆n sih Ngô Thị Thu Trang, Đại học Quốc gia Hà Nội, tơdroăng ‘mot tơkŭm 3 to kong pơlê Lâm Đồng - Dak Nông – Bình Thuận chiâng kong pơlê Lâm Đồng nếo, hiăng pro tơ’nôm ki tơ’lêi hlâu vâ mơnhông cheăng kâ krúa tơniăn krá ton.