Ăm rơkong veăng tơpui tối a rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i tối nhên môi hdrôh nếo tơdroăng ăm rơkong veăng tơpui tối ‘na kơxop hlá mơéa Pơkâ dêi Kuô̆k hô̆i ‘mâi pơhlêh, ‘mot tơ’nôm mâu tơdroăng dêi luât hơnăm 2013 châ pêi pro tung 8/120 troăng ƀă 2 khu tơdroăng kal pơkâ tơdjâk troh Măt trâ̆n Tơnêi têa Việt Nam, mâu khu tơrŭm tơdroăng kal kí pơlê pơla ƀă mâu pơkâ a Chương IX vâ pêi pro túa tơkŭm khu kăn pơkuâ kong pơlê 2 râ, ôh tá po rơdâ mâu tơdroăng ki ê.

Kăn xiâm hnê ngăn Kuô̆k hô̆i tối tiah kố, nôkố kuăn pơlê dế tơkôm tơdroăng pêi pro tơkŭm iâ, lế lĕm kơ koan cheăng tơnêi têa, pêi cheăng xêt tơƀrê. Xua tung tơdroăng ki ai khât, tung pơla hdrối nah, Đảng, Tơnêi têa xuân hiăng pơkâ hên tơdroăng vâ pro tơkŭm iâ kơ koan cheăng tơnêi têa la tung tơdroăng ki ai khât kơdroh ối cho tơdroăng ki apoăng, chiâng tơdjâk troh kơ koan pêi cheăng tơvâ tơvâ ƀiên chê̆ mê gá chiâng:

“Rôh kố pin pêi pro troăng hơlâ tơkŭm iâ kơ koan cheăng tơnêi têa tiô tơdroăng pơkâ 18. Kố cho troăng hơlâ tro ƀă hiâm mơno kuăn pơlê vâ. Túa tơmiât dêi Đảng, tro hiâm mơno kuăn pơlê. Púi vâ pêi pro mâu tơdroăng ki kal kố mê pơla má péa gá xơpá. Xơpá cho athế ‘mâi rơnêu Luât. Pin hiăng tơbleăng mơjiâng Vi ƀan kơxop mơ-éa ‘mâi pơ’hlêh, ‘mot tơ’nôm mâu tơdroăng dêi Luât hơnăm 2013 hiăng tơbleăng, túa pơkâ ‘mâi pơhlêh Luât to lâi tơdroăng tơbleăng xo rơkong tơpui tối kuăn pơlê sap ing hâi lơ 6/5 troh hâi lơ 5/6, tung pơla môi khế, tơkŭm 5 hâi, tâi tâng cho 35 hâi”.

Kăn xiâm hnê ngăn Kuô̆k hô̆i xuân tối tiah kố, tơdroăng ‘mâi pơhlêh, ‘mot tơ’nôm mâu tơdroăng dêi luât hơnăm 2013, khu tơdroăng cheăng pêi pro klêi mâu hlá mơ-éa hnê mơhno pêi pro vâ ‘mâi pơhlêh luât, chêh pro klêi troăng pơkâ tŏng gum luât ƀă mâu pơkâ athế prôk hdrối môi hvêa, vâ pro chiâng tơdroăng luât krá rơdêi ăm khu tơrŭm pêi pro.

Mâu kăn Kuô̆k hô̆i xuân môi tuăn ƀă 8 tơdroăng ‘mâi pơhlêh luât hơnăm 2013. Tung mê, kơxop mơ-éa Pơkâ khŏm pêi pro nhên hnoăng cheăng ƀă tơdroăng pôu râng dêi mâu khu tơrŭm kal kí pơlê pơla môi tiah: Kŏng đoân Việt Nam, Khu ngăn kuăn pơlê pêi chiâk Việt Nam, Khu pơkuâ ngăn Đoân Droh rơtăm Kŏng san Hồ Chí Minh, Khu ngăn vâi kơdrâi Việt Nam, Khu ngăn mố đô̆i hneăng hdrối Việt Nam cho mâu khu tơrŭm kal kí – pơlê pơla ối tung Măt trâ̆n Tơnêi têa Việt Nam, rak vế tiô hiâm mơno tơpui mơgêi 127 dêi Khu xiâm pơkuâ tơdroăng kal kí.

Tiô jâ Nguyễn Thị Thu Nguyệt, ngế ki lo ing Dak Lak, pakĭng mâu khu tơrŭm kal kí pơlê pơla ối tung Măt trâ̆n Tơnêi têa Việt Nam ối ai mâu kuăn pơlê, dế pêi mâu hnoăng cheăng dêi Đảng ƀă Tơnêi têa. Xua mê, jâ pơkâ thế, Khu chêh pro kơxop mơéa Pơkâ ‘mâi pơhlêh, ‘mot tơ’nôm mâu tơdroăng dêi luât hơnăm 2013 séa ngăn, pơkâ tíu ối dêi luât dêi mâu khu tơrŭm kố:

“Tíu cheăng luât dêi mâu kuăn pơlê ối tung Vi ƀan Măt trâ̆n tiô Mơgêi 127 mơhno tung luât môi tiah lâi, pin kal athế pêi pro nhên. Ôh ti xê pin bú pơkâ a môi víu ki lâi ôh cho tung khu tơrŭm mâu ngế cheăng ƀă Măt trâ̆n mê tá hâi tŭm, tá hâi ai tíu cheăng luât ăm mâu Khu kố pêi cheăng tiô tơdroăng luât, luât pơkâ ƀă ‘mâi pơhlêh tiô Pơkâ dêi Chin phuh, klêi kơ’nâi Luât ‘mâi pơhlêh”.

Ối ai mâu rơkong tơpui tối tôu tuăn, a Troăng 110, tíu 3 pơkâ, tơdroăng mơnhên mâu túa tíu pêi cheăng a kong pơlê, pơlê kong kân ối tung tơnêi têa ƀă xing xoăng, mơ-éa chêh pro mơjiâng, pơtê, ‘mot tơkŭm, klâ xoăng tíu pêi cheăng, ‘mâi pơhlêh tơnêi tơníu tíu pêi cheăng xua Kuô̆k hô̆i pơkâ. Tung pơla, tiô luât hơnăm 2013, tơdroăng kố athế xo rơkong tơpui tối dêi kuăn pơlê. Pôa Nguyễn Minh Hoàng, ngế ki lo ing Pơlê kong kân Hồ Chí Minh ăm ‘nâi:

“Tơdroăng ki mơjiâng, pơtê ‘mot tơkŭm, klâ xoăng tíu pêi cheăng, ‘mâi pơhlêh tơnêi tơníu xua Kuô̆k hô̆i pơkâ. Pơkâ kố athế xo rơkong tơpui tối dêi kuăn pơlê kong pơlê, tiô tơdroăng, hlá mơ-éa chêh pro luât pơkâ. Akố á ối tôu tuăn pin ôh tá ‘nâi tơpui tối leăng tiah lâi pin tah lôi tơdroăng kố, tung pơla ki kố mơdêk tơniăn krê a kong pơlê tơring cheăm, mơdêk rơkong tơpui tối dêi kuăn pơlê kong pơlê ƀă hnoăng cheăng ki kal vâ mơhno túa tơmiât dêi Đảng tro hiâm mơno kuăn pơlê”.

Pôa Nguyễn Thành Trung, ngế lo ing Yên Bái tối:

“Kơxop mơ-éa rôh kố ôh tá pơkâ xo rơkong tơpui tối dêi kuăn pơlê a kong pơlê drêng mơjiâng pơtê lôi, ‘mot tơkŭm ‘mâi pơhlêh tơnêi tơníu pêi cheăng mê kô xua Kuô̆k hô̆i pơkâ. Á tối tiah kố ngăn tung mâu mâu tơdroăng luât, pơkuâ ngăn tơnêi têa ƀă pơlê pơla mê tơdroăng xo rơkong tơpui tối kuăn pơlê drêng mơjiâng, pơtê, klâ xoăng tíu pêi cheăng, ‘mâi pơhlêh tơnêi tơníu cho kal khât”.