

‘Nou jĭ mĭnh lơ̆m rim tơdrong jang vă kơkuh chơt hơ iă ăn pơjing dêh char Lâm Đồng hle. Trong gre rĕnh Bảo Lộc – Liên Khương hơtăih 74 km, tơƀưh 2 pơlei tơm Bảo Lộc hăm Đà Lạt, găn hloh rim apŭng Bảo Lâm, Di Linh păng Đức Trọng kơ dêh char Lâm Đồng. ‘Nou trong gre rĕnh hơƀưh hăm trong gre rĕnh Tân Phú - Bảo Lộc păng Dầu Giây – Tân Phú, tơƀưh hăm pơlei tơm Đà Lạt, dêh char Lâm Đồng hăm pơlei tơm Hồ Chí Minh păng rim dêh char Đông Nam Bộ, pơjing hơyak pran atŏk tơ iung ăn dêh char Lâm Đồng hle. Tơdrong vă jang ou jăl blŭng ‘noh hloh 17.700 ti hlak jên, lơ̆m ou đei hloh 7.600 ti kon jên đơ̆ng teh đak, pă dôm yơ ‘noh kon jên đơ̆ng hơnih tơmơ̆t jang chă hơvơn. Khul hơnih tơmơ̆t jang Kŏng ty Tơmơ̆t jên jang păng Atŏk tơ iung trong nơnăm T&T – Kŏng ty Tơmơ̆t jên jang Grŭp Phương Trang FUTA Group – Kŏng ty Tơmơ̆t jên jang Tơ iung pơjing ming man trong nơnăm Phương Thành iŏk jang, hăm kơ jă đei iŏk jang vă jê̆ 11.924 ti hlak jên, khei ‘năr chĕp pơgơ̆r vei lăng trong gre lơ̆m 19 sơnăm 10 khei. Kiơ̆ trong pơprŏ, tơdrong vă jang ou đei ming man lơ̆m 30 khei.
Viết bình luận