Tơ̆ Kueng kơphô̆ 6, phường Tân Lợi, plt Buôn Ma Thuột – tơring đei hlŏh 1.000 unh hnam kon pơlei, tơdrong roi tơbăt, iŏk nơ̆r tơgop đơ̆ng kon pơlei đei pơgơ̆r tôch hơiă, hrơ̆ch ‘lơ̆ng păng đei tơdrong tơgŭm tôch pơnĕh đơ̆ng kon pơlei. Ƀok Nguyễn Ngọc Thịnh, Kơdră vei lăng Khul chă iŏk nơ̆r tơgop đơ̆ng kon pơlei ăn tơbăt: “Nhôn tơlĕch trong roi tơbăt lơ̆m radio, atŭm hăm ‘nŏh roi tơbăt anih truh akŏm tơ̆ hnam hôp pơlei kơ Kueng kơphô̆. Truh dang ei, kon pơlei tôch hơiă, vang tơgŭm ăn trong jang đơ̆ng Đảng păng teh đak lơ̆m tơdrong tơmât hơdai, kăt tơjur khul bơngai jang păng hơpơi ‘mĕh tơdrong jang kăch mang âu gô iŏk đei jơnei ‘lơ̆ng.”

Tơ̆ lơ pơlei pơla, mih ma duch nă kon pơlei kon kông kŭm tôch tơtăm hăm trong jang tih âu. Ƀok Y Rul Niê, tơ̆ plei Pốt A, apŭng Cư M’gar ăn tơbăt, kon pơlei kŭm ƀôh lơ tơdrong pơmat tat, gleh hrat blŭng a đơ̆ng rŏng kơ tơmât hơdai, mă lei lui, tơring kơdih gô tŏk jing ‘lơ̆ng ƀiơ̆: “Xăh ‘nâu hăm xăh to tơpă ‘nei tôch hơtăih băl, tơmât hơdai ‘nŏh teh roi xă, kon pơlei yak vih vât, đe kăn ƀô̆ năm bơ̆ jang kŭm roi pơmat. Mă lei mưh pơhnŏng bơ̆ jang bơih ‘nŏh athei hơmet pơ ‘lơ̆ng, kăn ƀô̆ athei adrin hlŏh kơ adrol sơ̆ dơ̆ng. Ƀât măt đei lơ pơmat tat, mă lei tơdăh jang ‘lơ̆ng ‘nŏh ưh jor gô jang đei ‘lơ̆ng ‘năi.”

Hăm lơ kon pơlei, đon lui păng hơmĕng jang tŏk ưh lăp đei hơdrô̆ hăm dêh char, hăm xăh đĕch mă oei lui jơ̆p tơring gô jang tŏk mŭk drăm, tơpôl pran ‘lơ̆ng hloi. ‘Nhŏng Huỳnh Trần Minh Đức tơ̆ plt Buôn Ma Thuột akhan: “Tơdăh Đắk Lắk mât hơdai hăm Phú Yên ‘nŏh gô pơjing đei 1 tơring tôch pran. Muk drăm đak dơsĭ tơmât hơdai hăm choh jang xa đơ̆ng Tây Nguyên gô pơjing đei trong jang tŏk pran kơjăp. Tĕch mơdro, logistics kŭm tôch hiôk hian.”

Oei ƀok Nguyễn Ngọc Hiên, oei tơ̆ phường Tân Lợi, oei xa hơnơ̆ng tơ̆ 2 pơlei, Đắk Lắk păng Phú Yên, pơma: “Inh, plei mĕ ‘nŏh tơ̆ Phú Yên, arih xa tơ̆ Đắk Lắk đơ̆ng ‘lơ̆p. Dang ei tơdăh 2 dêh char đei tơmât hơdai ‘nŏh tôch hơiă. Đắk Lắk đei kông, đei bri, đei đak dơsĭ – tơmât hơdai gô jing tôch pran, hơnhăk teh đak bơ̆n jang tŏk roi pran ƀiơ̆.”

Hơdai hăm lăp đon tơgŭm ăn trong jang tih găh tơmât hơdai, hơmet ming anih vei lăng, kon pơlei Đắk Lắk kŭm tơgop lơ nơ̆r găh dôm tơdrong gĭt kăl hlŏh hăm tơdrong jang kăn ƀô̆ lơ̆m khul kơdră pơgơ̆r tơring 2 tăl truh âu kơnh. Ƀok Hồ Hồng, xăh Quảng Tiến, apŭng Cư M’gar, pơma tôch rơhău: “Inh kŭm tơtăm mơ̆n, dang ei tơmât hơdai lơ thoi noh sư hăm găn trong nhen thoi chăl ƀao kơ̆p athei pơrĕng mưh răt tơmam sơ̆ ưh. Kơna inh hơpơi ‘mĕh tơdăh tơmât hơdai ‘nŏh athei bơ̆ jang mă ‘lơ̆ng, hơmet ming trong pơm hla ar, pơm mă hrĕnh.”

Yă Nguyễn Thị Xuân, tơ̆ plt Buôn Ma Thuột, kŭm akhan, tơmât hơdai, hơmet ming khul bơngai jang ‘nŏh tôch trŏ mă tơdrong jơnei athei gô mơ̆ng đơ̆ng khul kăn ƀô̆ rơgei dang yơ: “Inh ƀôh trong tơmât hơdai ‘nŏh tôch trŏ. Kon pơlei bu bu kŭm lăp đon tơgŭm ăn. Hơpơi ‘mĕh Teh đak chă rơih kăn ƀô̆ rơgei, bơ̆ jang đei yoa vă kon pơlei roi phĭ tơtŏ dơnŏ ‘lơ̆ng, hiôk chơt.”

Tơdrong hơmet ming, tơmât hơdai anih jang vei lăng ‘nŏh jĭ hơyak năm tôch gĭt kăl lơ̆m khei ‘năr tơplih ‘nao Khul bơngai jang kơ teh đak kiơ̆ trong tŏ sĕt bơngai, jang rơgei, đei yoa. Tơdrong tơgŭm, lui kiơ̆ păng hơmĕng đơ̆ng kon pơlei ‘nŏh jĭ jơhngâm pran vă rim khul kơdră pơgơ̆r tơring tơlĕch jang ‘lơ̆ng trong jang ‘nâu, hơnhăk teh đak yak tŏk roi đunh roi pran kơjăp.