Pơma pơih blŭng hop akŏm, Kơdră Quốc hội Trần Thanh Mẫn ăn tơbăt, ‘Măng hop akŏm mă 9, Quốc hội jăl XV vă pơih pơgơ̆r lơ̆m ‘năr 5/5 (đơ̆ng rŏng kơ lêh ‘năr 30/4 păng ‘năr 01/5), đei pơm jing 2 đơt vă set hơlen, tơchơ̆t lơ tơdrong jang tih, lơ tơdrong jang tôch gĭt kăl ‘nao đei Trung ương drơ̆ng nơ̆r tơ̆ Hop akŏm mă 11. Tơchĕng adrol hop akŏm, tơchơ̆t 45 tơdrong găh chih pơjing luơ̆t ƀơm truh tơdrong hơmet anih vei lăng jơ̆p tơring, kăt tơjur khul bơngai jang; 14 grŭp tơdrong găh mŭk drăm - tơpôl, thu mong, tơlĕch jên jang kơ teh đak, dăr hơlen păng dôm tơdrong gĭt kăl nai hai.

Tơ̆ hop akŏm, Thủ tướng Phạm Minh Chính pơma hơdăh: Khul kơdră teh đak vă adrin tôch ai, răp mơ̆ng păng chih răk rim nơ̆r tơgop vă Hop akŏm gơ̆h iŏk đei jơnei ‘lơ̆ng hlŏh. Dôm tơdrong đei tơroi ăn Quốc hội hlôi đei tơchĕng hơlen tôch hơlen, kiơ̆ trong năng tơdrong đei yoa kơ teh đak, kơ hơdrĕch hơdrung ‘nŏh kăl hlŏh. Thủ tướng tơƀôh đon lui, hăm tơdrong chĕp kơ̆l pơgơ̆r đơ̆ng Đảng, tơdrong drơ̆ng 1 nơ̆r đơ̆ng Khul kơdră teh đak, mĭnh jơhngâm đơ̆ng Quốc hội, tơdrong tơgŭm đơ̆ng Kon pơlei, Hop akŏm mă 9 gô đei jơnei ‘lơ̆ng; hơnơ̆ng tưk tơiung tơdrong gĭt kăl đơ̆ng bơ̆ jang kăch mang, kăt tơjur khul bơngai jang vei lăng.