Urak ni, anek saih  dalam negar tamat bloh thun bac 2017-2018 yam tame mbang padeih hè. Hè lac  tuk vak bo  anek saih halei jeng takre kayua hu padeih padei, main sambai hadei di 9 bilan kham bac gleih glar . Song dom anek saih di ban raya  HCM, oh lac adei halei jeng hu main sambai tui hatai di drei, bo dom adei padeih hè tui jalan gam bac gam main tui hatai khin di amaik ame. Kadha vak di  Cao Thoa, urang vak dok di ban raya HCM hu ndom ka bruk ni:

          Tuk hu tangi sua ka cong khin di drei dalam bilan hè, adei Nguyễn Cao Trí, anek saih tal bac 7 di  Quận 10, ban raya HCM brei thau:

          “ Anek biak khin lac hè ni , anek hu amaik ame ba nao main, nao du lịch, mai rivang palei, rivang gauk gar. Anek biak khin hu padeih padei, me-in sambai hadei di sa thun bac biak gleih glar.”

Amaik di adei  Trí- saai  Quỳnh Trang, sa  công chức  di ban raya HCM brei thau: Lavik mai saai bhian sahaneng lac, hè lac tuk vak brei ka anek drei padeih padei, main sambai, yau nan ye saai oh brei anek nao bac thêm janih bac halei dalam bilan hè. Anak tal, saai kuhria tut angan ka anek drei hu mbaok tame trại hè Thanh Đa kayua  Liên đoàn Lao động ban raya HCM song  Thành Đoàn pambuak bruk peih ngak, piah brei ka anek hu sa bilan hè hu makna di nyu.

 “ Hadei di sa thun bac gleih glar, nan ye hulin oh tuk halei sahaneng tal bruk brei anek nao bac dalam bilan hè ni. Hulin brei anek hu mbaok tame trại hè Thanh Đa biak gheih song kein lagaih. Meyah brei anek hu mbaok tame trại hè, anek drei bac hu rilo kỹ năng sống song main sambai taom gaok ndom nyai nao mai song rilo ayut sahabah nde gauk, piah ka anek hu sa bilan  hè biak sambai”

Dalam tuk saai Quỳnh Trang song urang anek likei umo 12 thun daok cang taduan bilan hè song dom bruk daok caga dahlau biak chreih chrai ye saai  Lê Thị Minh Nguyệt dok di  quận Bình Thạnh harei melam duh hatai kayua anek likei di saai, sa anek saih tal  9 sang bac THCS Phú Mỹ  dok gleih glar ôn thi piah caga tame tal 10. Saai Nguyệt brei thau: Hadei di tuk anek di saai pakacah tame tal  10 bloh brei anek main sambai dalam bilan  hè:

 “ Drei brei anek main bui sambai. Min nyu takre  main bóng rổ min. Di sang bilan hè anek drei  nyu tabiak  công viên main oh nao halei atah, kayua amaik ame ngak bruk luac adit, meda padeih hu sa harei adit, yau nan ye oh hu tukvak nao mian atah rilo.”

Min, jeng hu rilo amaik ame duh hatai lac bilan hè anek drei kuhria main saoh, var abih bruk bac da-a, nan ye amaik ame brei anek main 1 bilan, hadei di nan ba anek tame quy cũ, jeng lac brei anek nao bac thêm dom môn chính, yau : anh văn song toán piah tame thun bac bahrau anek oh bỡ ngỡ. Saai Dương Thị Hồng Đào daok di Quận 1 brei thau:

 “Sa thun bac biak gleih glar, nan ye brei anek padeih. Padeih hè takik, ye brei bac takik veik brei nyu main hasit, piah tame thun bac hu thoải mái. Hulin kuhria lac anek thi bloh, brei nyu nao  Đà Lạt main”

Meng hatai sahaneng lac bilan hè brei anek main lac chính, bac lac  phụ, saai Nguyễn Thị An hu anek dok bac di sang bac Nguyễn Bỉnh Khiêm Quận 1 brei thau  saai oh  ép anek bac hè , kayua huac anek bac biak rilo njauk áp lực, nyu meda oh khin bac tuk yam tame thun bac bahrau. 

 “Bac rilo meda  ba tal  áp lực ka bruk bac daa hadei ni. Bac rilo meda ngak ka anek huac bac, nan ye bac njauk nao gam song main”

Rilo amaik ame jeng brei thau, yaom lac hadei di tuk tamat thun bac, sang bac bhian phát phiếu sinh hoạt hè ka dom adei anek saih piah tut angan tame  sinh hoạt  song  đoàn thanh niên khu phố, phường, xã di labik nan. Min, biak takik tuk urang brei anek hu mbaok tame, kayua bruk ni puac adit meng hu song labik sinh hoạt dok atah biak gleih glar pajeng ba anek nan ye njauk padeih. Kayua yau nan ye rilo boh sang palih ruah jalan kreik pambah mbang brei dom anek dalam sang ma-in haong gauk.  

Meda lac, main atau bac dalam bilan hè di anek saih di ban raya  HCM lac kayua hatai sahaneng di amaik ame dalam bruk pato pakai, iek glang anek taco song tui bruk yaok boh sang. Min hu sa bruk bo urak ni lac dak harei dak hu rilo amaik ame salih jalan sahaneng, oh daok pachap anek “bac hè yau bac chính khóa” yau dahlau deih,  bo urak ni , urang caik tuk vak brei ka anek gam bac gam main atau nao du lịch, pasram kỹ năng sống dalam dom harei hè song cong khin anek drei biak  thoải mái tinh thần song hu umo ranaih biak mekre./.