Dom harei jiak di ni, dom boh sang pala nho di xã Xuân Hải, huyện Ninh Hải, Ninh Thuận kayua pandar jru pametai hareik, nho tal tuk paik boh nyu metai rilo ngak khat lihik yaok tỉ đồng. Bruk njauk nyai nan lac, dom urang njauk khat lihik ini, lac dom urang nong hu ilamu pala nho dalam rilo thun ni mai. Makna kayua yau halei?. Kadha vak di urang pambuak bruk Hữu Tầm song Văn Cảnh:
Pang tui panuac tacei di labik pablei jru khik caga phun pala, labaih 2 bilan dahalu, ong Nguyễn Xưởng daok di palei Thành Sơn, xã Xuân Hải, h. Ninh Hải, tỉnh Ninh Thuận hu blei jru pametai hareik BecAno hu asar meng negar Đức piah pruh pametai hareik ka bein nho dok dalam tuk tabiak boh. Tapa nan, tal urak ini, tong abih 6 sào nho di ong tal tuk paik boh nyu metai nao, tui kuhria khat lihik jiak 1 tỷ đồng. Ong Xưởng brei thau:
“Tuk Nho di hulin hu 3 bilan, hulin tame đại lý jru di muk Châu daok di Phường Đô Vinh, Tháp Chàm, jalan 21/8, hulin blei jru di Việt Thắng piah mai sang pruh, min muk Châu yaih khan hulin lac jru ni nyu siam jang. Hulin sua jru ni nyu lagaih sonng phun nho halei oh, muk lac lagaih song phun nho, tui tacei pato di đại lý , hulin pruh hu meteh bilan hadei di nan nho di hulin metai
Rilo sang di labik ni brei thau, piah abih takik pren yava, jien ndo ngak hareik, nan ye mik va pandar jru pruh hareik piah pametai hareik. Min thau halei, hadei di tuk pandar jru pametai hareik nyu khat lihik rilo yau ni, nyu ngak ka nho metai, taneh khut, labaih sa thun hadei oh pala hu phun hagait tra.
Meng di tuk hu panuac khan di bhap bini ka bruk nho metai kayua pandar jru hareik. Chi cục khik caga phun pala tỉnh Ninh Thuận hu peih bruk pasang iek chip 2 cơ sở pablei salih jru khik caga phun pala pablei jru pametai hareik ka bhpa bini song mek dom janih jru, taneh song gha phun nho metai piah payua nao dut iek duah thau makna di Pasak kiểm định song khảo nghiệm jruk khik caga phun pala bhum gah merong.
Makna tuk camereip tui ong Phạm Dũng, Akaok Chi cục khik caga phun pala tỉnh Ninh Thuận lac:
“Makna tuk camereip khol hulin mboh lac kayua mik va pandar jru oh tui jalan 4 njauk, dalam nan, abih di nyu nan lac pandar oh njauk janih jru, tong abih 2 janih jru BecAno song Limasong oh tut angan tame harak pandar pametai hareik di phun nho, min mik va pandar nyu”
Tal tuk vak ni jeng oh ka hu panuac puac abih di gah chức năng ka makna phun nho metai. Meng đại lý, nhà phân phối, Công ty taduan trách nhiệm di Việt Nam ngan song jru pametai hareik BecAno hu asar meng negar Đức song urang pala nho njauk khat lihik jeng dok ginum biai ka bruk bayar jien, dong brei.
Anak bruk nan, Chi cục khik caga phun pala tỉnh Ninh Thuận hu kakei bhap bini tuk pandar dom janih jru khik caga phun pala ka phun pala di drei brei ngak catang tui jalan 4 njauk piah nyaih khat lihik oh njauk hu./.
Viết bình luận