Tui Mintri ngak nong saong patagok palei pala, tapa 10 bilan di thun ini, abih tih yaom jien mek tame meng blei tame, pablei tabiak negar langiu dom kaya nong, kaya glai, kaya ikan tui kuhria hu labaih 74,3 tỷ đô la Mỹ, tagok labaih 24 % dut saong tukvak ini thun blaoh. Kuhria pataom veik dalam 10 bilan, bruk pablei tabiak negar lingiu dom kaya nong praong hu jaik 17,4 tỷ đô la Mỹ, tagok 12,7%. Rilo pandap, kapul pandap hu yaom pablei tabiak tagok, abih di nyu nan lac cao su, asar pa-ok blait, bei plaom saong dom pandap meng bei plaom pablei tabiak negar langiu tagok meng số lượng tal yaom jien.

Dom menuac F0 di Tây Nam bộ daok tagok samar dalam dom harei tapa, hu tỉnh oh dok xã, phường halei di tanut pakat 1 (bhum hajao). Tal harei 3/11, Bạc Liêu hu  4.230 urang dương tính song lac 1 tỉnh di bhum taneran krong  Cuu Long mbiah tal tuk vak ni  tagok pakat jit meng  2 tagok 4. Anak dom kan kandah di jit ruak, UBND tỉnh An Giang tabiak sarak peih bruk brei dok karei pak di sang  ka  F0 oh mboh hagait.

Labaih 10 thun jaik di ini, taneh pala li-u di tỉnh Đồng Tháp dak harei dak tagok, meng labaih 600 ha di thun 2015, tagok labaih 1.000 ha di thun 2021. Rilo urang salih mblang bien, pala padai oh hu laba tapa pala li-u, rilo abih lac di huyện Tháp Mười, Thanh Bình, Châu Thành, Cao Lãnh, tui kuhria yaok thun hu labaih 5.000 tấn, tui yaom pablei di bien meng 6.000 - 8.000 đồng sa baoh, laba hu rilo jang dua, klau mbang pala padai.

Thảo cầm viên Sài Gòn brei peih pabah mbang taduan tuai veik hadei di jiak 6 bilan padeih kayua jit COVID-19, tukvak peih pabah mbang meng  harei 5-11. Bruk taduan tuai veik hu pabak ginup dom bruk pacang jit tui adat di ban raya…Thảo Cầm Viên Sài Gòn hu umo 156 thun, dok di pasak  Quận 1,  urak ni dok hu labaih 1.500 drei athur song 900 janih phun kayau. Dom labik rivang main, du lịch ilamu – mbang huak karei karei  di ban raya yau: Đầm Sen, Văn Thánh, Tân Cảng, Bình Quới ... jeng tabiak panuac brei thau lac peih pabah mbang veik di puac adit ni. 

UBND tỉnh Thanh Hóa hu pok Harak mayaom di Akaok UBND tỉnh ka Thượng úy Hà Minh Hải, Phó akaok Công an xã saong saai Đào Thanh Bình, Bí thư Kapul dam dara xã Nga Bạch (huyện Nga Sơn) kayua samar drah, var klaak rup drei daong plaih di metai ka sa ranaih njauk plung ia. Dahlau di nan, kamuan N.T.N. (umo 7 thun) dalam tuk nao haong ayut sahabat tal labik công sở xã Nga Bạch me-in, oh patuah blait takai trun danao ia. Mehit sap ieu daong, saai Đào Thanh Bình nduac tabiak, blaong trun danao ia saong ba hu kamuan N. tagok ar. Tuk ba tagok, rup kamuan jhuk – makngu abih, oh daok suak yava. Tuk nan, Thượng úy Hà Minh Hải samar drah sơ cứu ka kamuan tal tuk rup kamuan pandiak gilac saong baoh hatai magei gilac. Hadei di nan, kamuan hu ba nao tal bilai Y tế xã cấp cứu. Urak ini prein yava di kamuan N.T.N. hu tani tanat saong hu nao sang haong gauk gar.

Dalam tuk dom urang njom COVID-19 bahrau tagok khang di mbang njom mbak ka  4 urak ni, Rajaei  Đức hu panuac lac meda ba tabiak dom adat ngak catang ngan saong dom menuac oh klauk  vaccine pacang COVID-19. Jalan ngak nan meda lac quy tắc 2G, nan lac dom urang abih ruak atau hu klauk jru meng hu  tame dom bruk ngak, dom  labik main sambai, nhà hàng... Dom bruk ngak catang nan pamong tame dom urang lac menuac prong oh khin klauk jru, daok dom urang oh klauk hu kayua ruak kik dalam rup oh daok dalam bruk ngak catang ini.

Hãng pajeng ba jalan kapal haoh Air Canada brei padieh bruk ngan haong labaih 800 urang ngak kayua ka oh klauk ginup vaccine caga COVID-19 tui adat bahrau di liên bang. Air Canada brei thau prein ngak bruk di hãng bier jang biak rilo dut saong dahlau di tuk tamuh jit, saong khat tal yaok rituh triệu đô la Canada.

Latvia patabiak bruk samar drah dalam  3 bilan, meng di harei  8/11, hadei di tuk urang njom bahrau COVID-19 di taneh ia ni tagok glaong tal tanut  glong di abih dalam tuk bruk klauk jru di  Latvia dok dalam dom taneh ia bier abih  di Liên minh châu Âu./.

 Urang lang: Thu Thảo & H.Pha – 4/11/2021