Giang Thành lac sa huyện bhum tapen negar, atah bayah, kan kandah di abih di tỉnh Kiên Giang. Muac urang takik, rai duik kan kandah, rilo meng lac urang bangsa Khmer nan ye gah pato megru njauk peih rilo labik sit, tal bac ghép. Yaok tal bac ghép meng  2 tal 3 trình độ. Dut song dom labik karei dalam tỉnh, gru pato bhum tapen negar biak gleih glar , kan kandah jang dalam bruk ba akhan haroh ka dom adei. Kadha vak di Lam Hiếu – urang vak di rayo sap ndom  VN dok di bhum taneran krong CL

          Dok gah dalam dom krong ribong, taom dar lac mblang hamu, labik bac sit   HN2 di sang bac tiểu học xã Phú Lợi, palei Cỏ Quen hu  2 balik bac, dalam nan sa balik piah ka tal bac mầm non, balik dok veik hu 16 anek saih, min jeng hu tal 3 trình độ lac  tal 3,4 song 5. Yaok nyaom sit lac sa tal bac, hu meng 5-6 adei,  dok pataom di sa labik. Anai gru ngak bruk gam gam, abih nyaom bac ni tl nyaom  bac karei.  Anai gru Nguyễn Thị Thơm, pato tal bac ghép 3 trình độ brei thau: anai hu  17 thun pato tal bac ghép. Dahlau deih tok pato tal bac ghép 2 trình độ, labaih  2 thun ni mai pato tal bac ghép 3 trình độ. Anai Thơm brei thau:

          Dut song tal bac ghép 2 trình độ ye tal bac 3 trình độ biak kan kandah, meyah  tal bac  bình thường ye 1 tiết bac tok pato sa bài, sa môn min , dok tapa 2 trình độ ye jeng mbuan  jang lac sa gah pato toán, gah deih pato môn karei. Dok tal 3 trình độ biak kan kandah kayua ilamu tal bac  3,4,5 biak kan, nan ye tuk  ghép 3 trình độ ye biak gleih glar. Yaok  tiết bac gru pato brei  roh duah 3 bài, 3 ilamu karei di gauk .

          Sang bac tiểu học xã Phú Lợi hu tal  5 labik bac sit. Labik bac praong atah di labik bac sit jiak di abih lac 5km, atah di abih lac labaih  12km. Taphia di nan,  anek saih rilo meng lac urang bangsa Khmer, hu labaih 54%  yau nan ye, bruk thau sap Yuan di anek saih bangsa dok suai  song gaok rilo kan kandah dalam bruk pato pakai.  Anai Nguyễn Thị Hương di sang bac tiểu học Phú Lợi, pato tal bac  ghép hu labaih  10 thun ndom lac:

           Kan kandah lac dom adei tui amaik ame nao ngak mbang atah dok labik ni labik deih sa tuk vak dom adei mai veik, klaak bac livik harei nan ye brei pato veik ka dom adei.

          Kan kandah lac yau nan, min dom anai gru di bhum tapen negar tuk halei jeng kham merat kak kajap haong sang bac, tal bac, kham merat pato pakai yaok akhar haroh ka dom adei. Bruk njauk biai nan lac dom adei anek saih bhum tapen negar yaom lac tangin takai bak gluh baok, min tal bac tuk halei jeng hacih saat. Dom adei slut mbut, song biak kham bac.

           Bhap bini di labik ni  dok kan kathaot , amaik ame nao ngak mbang atah, dom adei dok song ong muk. Kayua yau nan ye, meyah oh peih dom tal bac  ghép, labik bac sit ye mbuan si ngak ka dom adei klak bac,  oh thau akhan haroh biak glong. Gru pato Trần Thanh Hùng, Hiệu trưởng sang bac tiểu học Phú Lợi brei thau:

          Kayua sang dom adei nao tal sang bac atah, nan ye sang bac njauk peih dom tal bac ghép.  Yaok tal bac hu dom adei, min meyah oh peih ye dom adei oh hu labik piah bac, khat lihik ka dom adei. Yaom lac tal bac ghép , min sang bac hu sở pato megru pasram dom  kỹ năng, jalan  soạn bài ka dom tal bac ghép, nan ye bruk bac daa, yaom lac dut song dom tal bac 1 trình độ ye oh samu, min gah kỹ năng ye dom adei hu ginup tui bruk ba tabiak di gah pato megru  .  

Dalam huyện  Giang Thành urak ni hu  15 sang bac, min hu tal  47 labik sit, dalam nan 2 tal bac  3 trình độ song 8 tal bac  2 trình độ. Kayua menuac sia labik ini daok atah di gauk, oh pataom dom adei hu,  nan ye, gah pato megru brei peih dom labik sit, ghép 2, 3 trình độ piah palagaih ka dom adei bac daa. Ong Hà Quang Minh, akaok jabat pato megru huyện Giang Thành, lac:

          Kayua bruk pato 1 tal bac  3 trình độ ye takik rilo jeng  ngak kan kandah tal dom adei, nan ye khol hulin hu palih gru pato hu pasram  pato tal bac  ghép, hu ilamu, ranam takre bruk ngak piah tame dom tal ni.Chất lượng yaok thun  jeng oh glaong biar jang gauk hadom. Sarak ka gru pato jeng hu sangka dong palagaih.

          Dalam dom harei pahadar harei gru pato Việt Nam 20/11, anek saih bhum palei kan kathaot thau dhar phor cei gru anai gru meng dom janih pandap pandap di palei, dom bingu tamuh tapen jalan, min bruk kham merat nao tal sang bac, bruk tari taring di dom adei lac sa pandap quý di abih, nyu ngak brei lahik abih dom gleih glar, kan kandah dalam bruk pato akhan haroh. Yau panuac di anai gru Nguyễn Thị Thơm: “Drei ranam bruk anit uranaih, kham merat pato ka dom adei. Drap ar prong di abih ka bruk ngak di drei lac cong khin ka tong abih anek saih thau hu ilamu, tari taring, bac daa naih joi  ”./.